AYUB 10 - Alkitab Singog In Mongondow Masa In Tanaa

¹ Akuoi in mobú bo morongó kon kobiaganku, dá oumanonkudon in roriga in dimukudku.

² Oo Allah, dikadon in akuoi potaḷáan-Mu; insilangaidon nongonu sin akuoi in iḷawang-Mubí.

³ Onubí in untungnea aka Iko mopororiga nanaa, bo moḷumbú kon inta pinomia-Mu tontaní? Onubí in untungnea aka tarimaan-Mu in raian bo tomayá in inta mongoraat mita?

⁴ Poyoyindoi-Mu in diábí notongkai ná poyoyindoi in intau

⁵ bo umur-Mu in diábí ná kopoḷok in umurnea.

⁶ Aka natua, nongonu sin tayakon-Mubí in bayongan dosaku? nongonu sin aḷowan-Mubí in pomuḷoi in taḷáku?

⁷ Sabanarnea in kinotaauan-Mubí bo nosadar, kon akuoi in diá kotaḷá, táe nobanarbí. Kinotaauan-Mubí kon tobatúmai intau diábí in mokotongod in moposaḷamat kon inakó nongkon kawasa-Mu.

⁸ Akuoi naa in pinomiabí in ḻima-Mu, umpaka yo tanaa yopúon-Mu in akuoi?

⁹ Toropdon kon nongkon butá ḷamentong Pinomia-Mu in akuoi! Umpaka yo baḻíon-Mu bui in akuoi ḷobud?

¹⁰ Inogoi-Mu in ki amáku nomia kon inakó bo binaḻí-Mu in akuoi noḷoben kon bonu in bobuḷadían i ináku.

¹¹ Awakku pinosindog-Mu kon tuḷan bo pinakéan in ugat; tuḷanku in inoḻitan-Mu in tapú bo binakut in kuḻit.

¹² Inogoian-Mu in akuoi in kobiagan; kinotabi-Mu in akuoi, dimukudku iḷukadan-Mu pinongin pomomiag-Mu.

¹³ Táe tanaa in kinotaauankudon kon tua in kino oonggot, inumuni-uni aindon pinomia-Mu in boditoku.

¹⁴ Iḷukadan-Mu in akuoi dika-dikabo mogaid kon noitaḷá sinbá diá ogoian-Mu in pongampungan.

¹⁵ Aka akuoi mogaid kon dosa, dá nasibku in totuudon kon mobodito! Táe aka aidku diá in noitaḷá, umuranbí doman in akuoi inanggap nomia kon dosa! Diá mokobaḻí in akuoi ḷumangag, sin morobonod in gina bo ná siningkuḻe.

¹⁶ Aka kodapotanku onu in inaidanku, umpaka diá moḷoben, Iko mogaḷow kon inakó naonda bo singa. Bo poontong-Mu bui in kawasa-Mu, tongábí mopogogondok kon inakó.

¹⁷ Umuran poangoi-Mu in sakusi moḷawang kon inakó; bo modugangdon moḷoben in torú-Mu kon inakó. Potabá-Mu in tontara mita mobagu sin monubu bo momarang kon inakó.

¹⁸ Nongonu sin pinomayá-Mubí in akuoi pinononggadí kon dunia? Mopia-piabí kon minatoi in akuoi kon dodai in diápa inontong in intau!

¹⁹ Dá naonda bo diá dodai in onda in akuoi pinononggadí, sin nongkon bonu in bobuḷadían baḷúdon iḷobong.

²⁰ Ah, diádon moonggot bo matoi in akuoi, dá pomayádon mako in akuoi tontaní, sinbá korasaankupa in kobiaganku inta kiagatneapa tanaa.

²¹ Diádon moonggot mayá in akuoi bo diádon mobui mangoi, mopobayá in dunia inta mosindip bo modingungui totok,

²² dunia inta mosindip, nopuḻing in oḻinow bo notombauk, bayag notongkai in pungit.”