AYUB 1 - Alkitab Singog In Mongondow Masa In Tanaa

Ibilis nonungkuḷ kon i Ayub

¹ Kon butá in Us nogutun in ḷoḷaki tobatú tangoinea in ki Ayub. Sia in nosumba kon i Allah bo mosatia kon i-Nia. Sia in intau inta mopia in gina bo diábí nogaid kon onu inta moraat tongopiḻikmai.

² Sia in kogadí kon adí ḷoḷaki taya pitu bo adí bobay taya toḷu.

³ Koḻikud intua nobayong doman in atanea, dombanea in 7.000, unta in 3.000, sapi in 1.000, bo keledai in 500. Impoḷok mako in singog, sia tua in intau inta totok in nooyúon kon sigad in intau inta nogutun kon butá kon dotá in pomukaan.

⁴ Ki adí i Ayub taya pitu in mokakit momia kon bobutungan kon baḷoinea-baḷoinea mopoyo-poyoḷuan. Kon bobutungan tatua ki adí bobay i Ayub taya toḷu in oiníon doman, bo mosia komintan in mongaan bo monginum moyotakin.

⁵ Mopaḷut mako in bobutungan, ki Ayub in tantú mobangon doḷo-doḷom bo moposumba in kuruban ponukid kon batúan in adínea sinbá ampungan i Tuhan. Sin kon raian i Ayub, dika-dikabo ki adínea mita ain noiaid kon dosa bo noiḷautdon nokopoompámai kon i Allah takin diá sinuod.

⁶ Kon singgai tobatú mahaḷuk mita in soroga namangoi kon tayowon i Tuhan, bo Ibilis in kon sigad doman monia.

⁷ Ki Tuhan in noḻibó kon inia, “Nongkon onda in iko?” Tubag in Ibilis, “Bobantung naa in bagupa nodondaḷoi magí-mako bo noḻibu kon bayongan in butá.”

⁸ Bo ki Tuhan in noḻibó, “Degá sinaridimudon in mogogundoi-Ku ki Ayub? Kon sinangkub in dunia naa diábí in intau inta ná kotoindudui bo ná kopopia in ginanea. Sia in nosumba kon i-Nakó bo diábí nogaid kon tobatúmai in moraat.”

⁹ Táe Ibilis tatua in notubag, “Nopastibí kon ki Ayub in nosumba kon ini-Mu sin notarimadon in sia kon tontuḻí in aidnea.

¹⁰ Sia, motoḷuadínea bo bayongan in kaoyúonannea umuran iḷukadan-Mu. Oaidannea in binarakatan-Mu bo inogoian-Mu in sia in bobiagon nobayong totok kon butá tanaa.

¹¹ Táe aka kuma bo bayongan in kaoyúonannea tatua bo gamáan-Mu, yo notantúbí kon bayá-bayáneabí kutukon in Iko!”

¹² Dá guman i Tuhan kon Ibilis, “Mopia, aidaidon in onukabí kon bayongan in kaoyúonan i Ayub, asaḷ bo dika yoyigaanmu in sia!” Bo minayádon in Ibilis tatua nongkon tayowon i Tuhan.

Ki adí mita i Ayub takin kaoyúonan iyompat

¹³ Diá noonggot nongkon tua ki adí mita i Ayub in nomia kon bobutungan kon baḷoi i guya-guyang totok monia.

^14-15 Bo daḻídon noiangoi kon baḷoi i Ayub in totabá tobatú koriba-ribatuk bo nopotaau, “Tuang, intau in Syeba ain namangoi bo nonubu kon inami kon dodai in sapi mita pinomajekopa nami kon gobá bo keledai mita in mokaanmai kon bonok kon diugneamai. Mosia in nogagowdon kon bobiagon mita tatua, bo noḻimod kon bobantung mita i Tuang inta kon tua. Tongádon akuoi in nokoḷagui dá notaaudon namangoi nopotaau intua kon i Tuang.”

¹⁶ Kon dodai in sia mosingogpa mako, namangoidon in bobantung nogindua bo noguman, “Domba mita i Tuang bo gombala mita in sinampídon in kilat bo minatoi komintan. Tongádon akuoi in nobiag dá notaaudon namangoi nopotaau intua kon i Tuang.”

¹⁷ Diápa in sia nopaḷut nosingog, kon dodai in bobantung intoḷunea namangoi nopotaau, “Toḷu nopaanan in mogogagow intau in Kasdim in nogagowdon kon unta mita i Tuang bo noḻimod kon bobantung mita i Tuang. Tongádon akuoi tontaní in nokoḷagui dá notaaudon namangoi nopotaau intua kon i Tuang.”

¹⁸ Kon dodai in sia nosingogpamai, namangoi domandon in bobantung ibanea inta nodia kon habar, “Ki adí mita i Tuang koyogot in nomia kon bobutungan kon baḷoi i adí i Tuang inta guya-guyang totok.

¹⁹ Bo daḻíbí in deḷang nogirup nongkon rawang in bungaion bo nondangat kon baḷoi tatua nodapot in noumpag bo noidantug kon i adí mita i Tuang dá minatoidon komintan in ki adí mita i Tuang. Tongádon akuoi naa in nobiag dá notaau namangoi nopotaau intua kon i Tuang.”

²⁰ Bo sinimindogdon in ki Ayub bo nomerak kon ḷambungnea nobaḻí tomponuot kon ponogumatoian. Nongarug in sia kon buoknea, bo sinumungkud

²¹ bo noguman, “Siḷandat in akuoi in pinononggadí, yo siḷandat doman in akuoi in mobui kon i-Nia. Ki Tuhan in nobogoi bo ki Tuhan doman in bui nogamá. Dinayo-dayowdon in tangoi-Nea!”

²² Dá, umpaka in ki Ayub kinoantugan in bayongan bodito, diábí in sia nogaid kon dosa bo diábí nopotaḷá kon i Allah.