AMSAL 8 - Alkitab Singog In Mongondow Masa In Tanaa

Baḷú in hikmat

¹ Indongogai! Ki inta bijak in momaḷú magí-mako, hikmat mobuká kon bibig.

² Sia in sinimindog kon buḷud mita kon bingkí in daḷan, bo kon pinoyotangaan mita in daḷan.

³ Kon bonawang, kon daḷan tumuot in kotá, kon tua kodongogan in singognea.

⁴ “Ei, umat intau, akuoi in momaḷú kon inimu; bayongan in intau kon dunia, taridiai onu in pogumanku!

⁵ Moiko inta diápa kopongalaman, pobalajar kon raian inta mopandoi; moiko inta moraat, pobalajardon momangaḻe.

⁶ Taridiai in tosingogonku mita, sin tua mita in totuubí bo moḷoben in mangaḻenea.

⁷ Onu in siningogku, komintanbí totuu, sin akuoi in doíbí kon inta uboḷ.

⁸ Tosingogonku mita in mongotuḻidbí mita, diábí tobatúmai in moibaya-bayá mako andeka noitaḷá.

⁹ Kon inta mopandoi, tosingogonku in totuubí, kon intau moarip, tosingogonku in noitaná.

¹⁰ Horomatbí in tongginaku moiḻiu kon saḷaka taakan, popoḷontú in sinotaau moiḻiu kon buḷawan totokan.

¹¹ Akuoi naa in hikmat, kon ḻimonikan in berlian; diábí motaau poyotongkaion in onuka in koibogmu.

¹² Akuoi naa in hikmat; kon inakó naa oyúon in pongortian, kabijaksanaan bo pongotahuan.

¹³ Mohoromat kon i Tuhan tua in mangaḻenea in mondoí kon inta moraat; akuoi in doíbí kon aid moḷoḷatú bo mododia. Kodoíkubí in dodia inta moraat bo tosingogon mita inta monguboḷ.

¹⁴ Akuoibí inta nopogonú in raian. Bo akuoi doman in nomaḻí kon inia. Akuoi in mopandoi bo moropot doman.

¹⁵ Datu mita in dinuḷuanku momarenta, mongongawasa mita in sinuḷunganku moposindog in inta moadil.

¹⁶ Popisí in aidku, intau mita moḷoben bo intau mita inta ihoromatmai nomarenta bo nopobayá in onu inta moadil.

¹⁷ Akuoi in motabi kon i monia inta moibog kon inakó; inta motayak kon inakó, in moyodungkuḷkubí.

¹⁸ Kon inakó in sinadiabí in kaoyúonan, kahoromatan bo kobiagan inta motompia.

¹⁹ Inta mouḻímu nongkon inakó in noiḻiubí kon buḷawan totokan; momaha-mahaḷbí nongkon saḷaka taakan.

²⁰ Akuoi in dinumudui kon daḷan inta moadil, bo akuoi in nongin daḷan inta moitutui.

²¹ Intau inta motabi kon inakó, baḻíonku mooyúon; puḻinganku in baḷoinea in kaoyúonan.

²² Akuoi in binaḻí i Tuhan kon pinomangkoian in oaidan-Nea, akuoi naa in bungai in aid-Nea inta muna-munamai kon tungkuḷ intua.

²³ Akuoi naa in pinomia muna-munamai, nongkon pinomangkoian, kon dodai in dunia diápa binaḻí.

²⁴ Akuoi in oyúondon kon dodai in baḷangon diápa binaḻí, kon dodai in diápa in bokaká mita.

²⁵ Akuoi in oyúondon kon tungkuḷ in buḷud mita diápa, kon dodai in tombuḷudnea mita diápa pinosindog,

²⁶ kon dodai in ki Tuhan diápa nomaḻí kon butá bo rawangnea mita, kon dodai in diápa binaḻí-Nea in butá mita inta dungkuḷ.

²⁷ Inindoianku mako kon tungkuḷ in ḷangit binuká, bo ḷokutoi binuká kon ḻimonik in dagat,

²⁸ kon tungkuḷ in ki Tuhan nonampat kon goḷom kon toḷungayá, bo nomukat kon bokaká mita in baḷangon,

²⁹ kon tungkuḷ in Sia nomarenta kon tubig in dagat sinbá dika ḻimimpat kon tonsigadnea mita. Akuoi in kon tua doman kon dodai in aip in butá naa pinoompat-Nea.

³⁰ Akuoi in kon diug-Nea saḷaku adí inta totok in kinotabi-Nea, pomuḷoi in singgai kinosanang in gina-Nea in akuoi; tantú in akuoi mogogitogmai kon tayowon-Nea.

³¹ Akuoi in nobarasanang kon tudu in butá-Nea, bo moḷunganga totok kon sigad in intau.

³² Tuamai, indongogaidon in akuoi, ei intau mita inta mongobagupa! Duduiaidon in topotundúku, dá mosanangbí in iko.

³³ Tarimadon in tongginaku bo kobaḻídon mobijaksana, dikabí toḻikudanmu intua.

³⁴ Pia in kamang in intau inta mokidongog kon inakó inta pomuḷoi in singgai ḻimitú mogoḷat mako kon ngara in baḷoiku, bo umuran moḷukad kon bonawang in pinogutunanku.

³⁵ Ki ine in mokouḻí kon inakó, mokouḻí kon kobiagan, sia in kinoibog i Tuhan.

³⁶ Ki ine in diá mokouḻí kon inakó, moporugimai kon inia tontaní; intau inta doí kon inakó, moibog in popatoi.”