AMSAL 7 - Alkitab Singog In Mongondow Masa In Tanaa

¹ Toropdon in tosingogonku mita, adíku, bo dika koḻiongan onu inta pinogumanku kon inimu.

² Duduiaidon in tongginaku mita sinbá mobiag mopia in iko. Duduiaidon in totundúku mita kopiaan ná poḷoḷukadmu kon batoḷ in matamu tontaní.

³ Umurandon torop in totundúku mita tatua, bo tagúdon kon bonu in ginamu.

⁴ Anggapdon in hikmat tua in nobaḻí ki utatmu bo sinotaau in nobaḻí yobayatmu modagin.

⁵ Hikmat in mopoyayú kon inimu nongkon bobay sundaḷ, nongkon bobay inta mopandoi modondouḷug pongin tosingogonnea inta mopia.

Bobay sundaḷ

⁶ Kon singgai tobatú akuoi in iḷumongow nongkon jandela in baḷoiku.

⁷ Bo inontongku nobayong in ede in tayowmobiag; táe sinaridianku totok in intaubí tobatú inta bodok kon sigad monia.

^8-9 Kon dodai in ḷoḷabungnea kon tungkuḷ in moungkoḷomdon, tayow mobiag tatua kibaya-bayámai kon diug in pobeukan in daḷan inta mayá in baḷoi pinogutunan in bobay tobatú.

^10-12 Bobay tatua in bobay inta diá motantú in mogutun kon baḷoinea. Topi-topí kon bingkí in daḷan in sia, onda intua kon rawang, andeka simindog mogoḷat kon poyotangaan in daḷan. Dodianea in mobarani bo diá oyáan. Inontongku in sia iḻumuai nogiḷambung naonda bo sundaḷ, bo nokipodungkuḷ kon tayowmobiag tatua takin tomayá inta moraat.

¹³ Ginumakap in sia kon tayow mobiag tatua bo nongayok takin doman diá nooya-oyá noguman in sia,

¹⁴ “Singgai naa akuoi in musti moguboḻi kon dandiku, dá akuoi in noposumbadon in kuruban.

¹⁵ Tuamai iḻumuai in akuoi sin motayak kon inimu, sinbá iko in mongaan kon baḷoiku. Tanaa in noyodungkuḷkudon in iko!

¹⁶ Tosiuganku ain inompatanku in ompat noyagi-yagimai in batangannea inta nongkon Mesir,

¹⁷ bo ain binutakanku in taḷong mobondu, sondana bo kayu manis.

¹⁸ Tanaa, koḻigai in kita mongongayokan bo mopomaké in doḷom naa mopoguḻí in ibog in awak kinoouput in doḷom naa.

¹⁹ Ki buḷoiku in diá kon baḷoi, sia in minayá in noyayú.

²⁰ Sia in nodia kon nobayong in doit, bo diápabí mobui in doyowa nodiminggu naa.”

²¹ Natuata in pinodondouḷug in bobay tatua kon tayow mobiag tatua pinongin dondouḷug mita inta mokosanang dá kinogodaandon in sia.

²² Diá bidon norai noḷanggó in sia dinumudui kon bobay tatua naonda bo sapi dinia kon tampat pororataan bo notongkai in intau inta dinakop sin motarima kon hukuman inta ain sinadia kon intau bodok;

²³ topiḻikpa bo piot in moiḷambai kon poatnea. Naonda bo ḷagapan inta iḷumayug nopobayá in poyogaḷap, natuata in tayow mobiag tatua diá nonotaau kon nyawanea tua in mopobayádon in popatoi.

²⁴ Tuamai, adí mita, indongogaidon in akuoi. Tondudutdon in tongginaku mita.

²⁵ Dika pomayá mako in bobay ná tatua mongawasa kon ginamu; dika mayá motayak kon inia,

²⁶ sin sia ain nomoguyaat kon kobiagan in nobayong in ḷoḷaki. Diádon koiapan in kobayongnea in noyopú popisí in sia.

²⁷ Mayá in baḷoinea notongkaibí in nomiḻí kon daḷan mopoḷok mopobayá in kopatoian.