AMSAL 3 - Alkitab Singog In Mongondow Masa In Tanaa

Tonggina kon intau inta nobagupa in kobiagan

¹ Dika koḻiongan onu inta ain sinundúku kon inimu, adíku. Umuran torop in parentaku,

² sinbá moumur bo motompia in kobobiagmu.

³ Umuran popirisaya bo mokopotoindudui kon i Allah bo kon tumpaḷa intau. Torop intua bo tagú kon ginamu,

⁴ sinbá iko in koibog bo horomaton i Allah bo in tumpaḷa intau.

⁵ Popirisayabí kon i Tuhan takin ḻimbatú in ginamu, bo dika mopongata in pandoimu tontaní.

⁶ Toropbí in ki Tuhan kon bayongan in aidanmu, dá tundúon-Neabí in kobobiagmu inta mopia.

⁷ Dikabí kainimu kon iko in mopando-pandoi nongkon inta sabanarnea; pokotoindudui kon i Tuhan bo pokopoyayú kon inta moraat.

⁸ Dodiamu tua in mobaḻí naonda bo undam kon inimu inta mokopia kon awakmu bo mokosanang kon ginamu.

⁹ Horomat in ki Tuhan pongin moposumba kon i-Nia in inta mopia totok nongkon bayongan kapunyaanmu bo nongkon bungai in pinomuḷamu,

¹⁰ dá ontagmu mita in mopuḻingbí in gandum, bo tubig in anggurmu mobarongdon totok modapot in diádon in pobonuan kon tua.

¹¹ Aka ki Tuhan mosambok kon inimu, adíku, baḻí intua tobatú tompoingat, bo dika tumorú in iko kon totundú-Nea tatua.

¹² Ki Tuhan in mosambok kon intau inta kinotabi-Nea, naonda guyanga ḷoḷaki mosambok kon i adínea inta kinotabinea.

¹³ Mountungdon totok in intau inta nobaḻí mobijaksana bo nokouḻí kon pomomangaḻe.

¹⁴ Kauntungannea in moiḻiubí kon inta nouḻí kon saḷaka, bo momaha-mahaḷ nongkon buḷawan.

¹⁵ Hikmat in momaha-mahaḷ nongkon batu permata; bayongan inta koibogmu in diábí mokotongkai kon tua.

¹⁶ Hikmat mobogoi kon inimu in umur moḷanggó, kaoyúonan bo kahoromatan.

¹⁷ Hikmat mobogoi kon inimu in kobiagan mosanang bo mooyúon.

¹⁸ Intau inta kumadai motantú kon hikmat in mokouḻíbí kon kobiagan inta moitutui bo mosanang.

¹⁹ Pinongin hikmat, ki Tuhan in nomaḻí kon dunia; pinongin pandoi-Nea sinongká-Nea in ḷangit kon tampat-Nea.

²⁰ Pinongin sinotaau-Nea pinomia-Nea in bokaká mita kon ḻimonag in butá nobotak bo nomuká in tubignea bo goḷom kon ḷangit mopobutak in tubig kon butá.

²¹ Tuamai, kadaidon kon hikmat bo kon pororai inta modaḷom, adíku! Dika mokoimontanmai in umukat kon inia,

²² dá kobiaganmu in koḷukadanbí – mopia bo mokosanang.

²³ Iko in moamanbí in mayá, bo diábí moipintud.

²⁴ Iko in mayá mosiug takin diá moondo-ondok, bo moḷoḷotbí in iko kinoouput in doḷom.

²⁵ Dika bidon in iko moondok kon bodito inta modaḻí moiangoi naonda bo deḷang, bo mondumpak kon intau moraat.

²⁶ Ki Tuhan in moḷukadbí kon inimu. Diábí pomayá-Nea mako in iko moibaaḷ kon poyogaḷap.

²⁷ Aka oyúon in komampuanmu mopoaid in inta mopia kon intau inta moparaḷu kon kopiaanmu, yo dikabí pondamonmu in mogaid kon tua.

²⁸ Dikabí mokioḷat kon tumpaḷa intau modapot in mobangon monik, aka kon singgai tua bo motaaumupa tuḷungan in sia.

²⁹ Dika monomayá kon inta mokorugi kon tumpaḷa intau topodiugmu inta mopirisaya kon inimu.

³⁰ Dika morogenggeng kon inta diá in popisínea takin intau inta diá kon dodai in onda nopoaid in moraat kon inimu.

³¹ Dika mointoi kon intau inta mopoaid in moromú, bo dika dumayan kon dodia monia.

³² Sin, ki Tuhan in doíbí kon intau inta mogaid kon inta moraat, táe Sia in modaginbí kon intau inta motuḻid in kobobiagnea.

³³ Ki Tuhan in mongutuk kon baḷoi in intau moraat, táe momarakatbí kon baḷoi in intau inta motoindudui kon i-Nia.

³⁴ Ki Tuhan in doíbí kon intau inta motosiḷantud, táe momarakatbí kon intau inta moompá in dodia.

³⁵ Intau inta mobijaksana i modugangbí mobondu in tangoinea, táe intau nobodok in umuranbí singkuḻeon.