AMSAL 28 - Alkitab Singog In Mongondow Masa In Tanaa

¹ Intau moraat moḷagui umpaka diá in mogaḷow kon inia, táe intau motuḻid in gina, mobarani ná singa.

² Aka bangusa baradosaan, pongawasanea in umuran baḷuian; aka itoi bo mobijaksana, yo bangusa in umuranbí koḷukadan bo tantúbi ponango-nangoian.

³ Intau inta nongawasa inta mondorot kon intau bogá, naonda bo uyan morogot inta momoguyaat kon bungai in boyó.

⁴ Ki ine in diá dumudui kon hukum, yo dinumotá kon intau moraat; ki ine in dumudui kon hukum moḷawang kon intau moromú;

⁵ Inta moadil in diábí kotaauan in intau binaradosa, táe intau inta mosumba kon i Tuhan, totu-totuubí kon nonotaau.

⁶ Maní doman bo intau bogá inta motuḻid in ginanea bo dika in intau nooyúon inta motombogá.

⁷ Tayowmobiag inta dinumudui kon hukum in intaubí mobijaksana. Táe intau inta moyobayat in intau inta mourab in mokopooyábímai kon i amánea.

⁸ Ki ine in mobaḻí mooyúon popisí in moigum kon rente bo motayak kon kauntungan inta moḷoben totok, kaoyúonannea in moiḷabúbí kon intau inta motabi kon intau bogá.

⁹ Aka iko bo diá motoindudui kon hukum i Allah, yo ki Allah in doíbí doman kon sambayangmu.

¹⁰ Ki ine in modondouḷug kon intau motuḻid sinbá mogaid kon inta moraat, yo siabí tontaní in moḷabú kon poyogaḷap. Intau inta modarit in ginanea barakatanbí dá mosanang.

¹¹ Intau nooyúon umuran morai kon sia in mobijaksana, táe intau bogá inta mopia in kotaauanneabí mongo ki ine in sia tua.

¹² Aka intau mopia in mongawasa, bayongan intau in mosanangbí, aka intau moraat in momarenta, yo rayat in mogadopbí.

¹³ Ki ine in mobuni kon dosanea diábí momujur. Ki ine in mongaku bo monaḷámaidon, kotabibí i Tuhan.

¹⁴ Horomatbí tantú in ki Tuhan, dá mosanang in iko. Aka iko moḷawang kon i-Nia, moboditobí in iko.

¹⁵ Intau moraat inta mongawasa kon intau inta kinodaitan, naonda bo singa inta moganggor andeka beruang inta mondudur.

¹⁶ Mongogawasa inta mondorot kon intau ibanea, diábí koraian inta mopia; mongogawasa inta doí kon inta motombogá in momarentabí kon taongannea.

¹⁷ Intau moḷoḻimod in mokorasabí kon ná umuran aḷo-aḷowan mako modapot in sia matoi; diábí tobatúmai intau in mokoḷamboi kon inia.

¹⁸ Intau inta mobiag diá in bogit in mosaḷamatbí. Intau inta mopoḷandó, in moḷabúbí.

¹⁹ Monononggobá inta simiḷopí in mogaid in diábí kodaitan in kaanon; intau inta diá motaau mopomaké in wakutu in kodaitanbí in kaanon.

²⁰ Intau motuḻid in gina barakatanbí i Tuhan, táe intau inta moibog ḷagi mooyúon, diábí kotaḻiban in hukuman.

²¹ Diábí mopia in mopoyoposi in intau; táe oyúonbí doman in hakim inta motombogá tongá popisí in bá mokouḻí kon doit topiḻik.

²² Intau inta motamaa moibog ḷagi mooyúon; diábí kinotaauannea kon roriga in ḷagidon moiantug kon inia.

²³ Intau inta moibog monoboḷow imbuitnea yo siabí in moiḻiu horomaton in intau inta moibog moduí.

²⁴ Ki ine in monakow nongkon guyanganea bo kainia intua in deemanbí dosa, yo notongkaibí in mononakow mita ibanea.

²⁵ Tongá morai kon kopontingan tontaní in mokopomukábí kon bobayowan; mountu-untungbí in iko aka mopirisaya kon i Tuhan.

²⁶ Ki ine in mopongata in raiannea tontaní, diábí koraian mopia. Ki ine in dumudui kon totundú in intau mobijaksana mosaḷamatbí.

²⁷ Ki ine in mobogoi kon intau bogá diábí in sia kodaitan. Ki ine in doí moindoi kon onu in paraḷu in intau bogá, yo butungonbí.

²⁸ Aka intau moraat mongawasa, rayat mogadop; aka intau moraat in moputú, intau inta moadil in mobaḻí itoi.