AMSAL 27 - Alkitab Singog In Mongondow Masa In Tanaa

¹ Dika tumakabur kon singgai ikoḷom, sin diábí kinotaauanmu onu in mobaḻí.

² Dikabí dumuí tontaní; biódon mako in intau ibanea in modayow kon inimu, modapotbí in intau inta diá kinotaauanmu.

³ Batu bo bungaion tua in mogaanpabí, aka poyobandingonmai in nakit in gina popisí in intau bodok.

⁴ Torú tua in moromú bo mokorimumud, táe tumayow kon intoi ki ine in mokoigon?

⁵ Maníka toboḷow moyogintayowan mako bo dika in tabi inta tongá nonomon mako.

⁶ Yobayat in mopomongkug in tabi, táe musung in monggakap takin bisa.

⁷ Aka mobotug, umpakabí biluk yo diábí tarimaan; aka gogoyon, umpaka pait mopira in konanaman.

⁸ Intau inta monaḷámai kon baḷoinea, in naonda bo ḷagapan inta nonaḷámai kon pugadnea.

⁹ Ná doman ḷana mobondu bo inta bo mongobondu ibanea mako mokosanang kon gina, natua doman in kopopia in yobayat mokoonow kon gina.

¹⁰ Dika koḻiongan in yobayatmu andeka yobayat i amámu. Kon bonu in roriga dikabí mokituḷung kon i utatmu; topodiugmu inta modagin in mobara-baraguna nongkon i utatmu inta moyayú.

¹¹ Adíku, pokobijaksanabí in iko, sinbá mosanang in ginaku bo mokotubag aka singkuḻeon.

¹² Intau mobijaksana momarut aka mokoontong kon anib; intau bodok mayá turus bo koantugan in bodito.

¹³ Ki ine in moibog mobaba kon boḻi in intau ibanea, yo patusbí gamáan in kaoyúonannea mobaḻí tontagú kon dandinea.

¹⁴ Ki ine in doḷo-doḷom mopoyaput in salam kon yobayatnea pinongin tosingogon moropot mako, yo naondabí bo nopoyaput in odi-odi.

¹⁵ Buḷoi bobay inta moibog in bobayowan in naonda bo singog in uyan inta moḷabú tumongosinggai.

¹⁶ Diábí motaau in sia in pokigogaian in mosingog, naonda bo tompot inta diá kodomokan bo ḷana inta diá koyangkoman.

¹⁷ Naonda bo uwaja mogatá kon uwaja, natua doman in intau mobalajar kon tumpaḷa intau.

¹⁸ Ki ine in monompia kon pinomuḷa, yo mokaanbí kon bungainea. Bobantung in kotabibí doman aka motabi kon i tuangnea.

¹⁹ Naonda bo tubig inta mopoontong in oḻinowmu, yo natua doman in ginamu moponiata mongo ki ine in iko.

²⁰ Kon dunia in intau minatoi, umuranbí oyúon in tampat; natua doman in ibog in intau diábí in ayownea.

²¹ Buḷawan bo saḷaka ujion kon bonu in tuḷú; intau in kotaauanbí kon dodianea kon tungkuḷ in dayowon.

²² Umpaka bouton koropoton in intau bodok, yo diábí doman moinggamá in kobobodoknea.

²³ Ḷukadaibí kopia in bobiagonmu,

²⁴ sin kaoyúonan in diábí mononoi, nodapot in kawasa momarenta in diábí doman mononoi.

²⁵ Bonok kon gobá bo kon buḷud in ratabon bo sipunon sin pokaan kon bobiagon tatua, táe kon dodaipa doman intua mobiagdon bui in bonok inta mobagu.

²⁶ Nongkon bubuḷ mita in dombamu tatua iko in mokouḻí kon pakeang, bo nongkon doit boḻi in bembému mita tatua iko in mokotaḷuidon kon butá mobagu.

²⁷ Nongkon bembému mita ibanea iko in mokouḻí kon susu pakéonmu bo pakéon in motoḷuadímu takin bobantungmu mita.