AMSAL 26 - Alkitab Singog In Mongondow Masa In Tanaa

¹ Ná uyan kon sempo in pononinggai, bo salju kon dodai in singgai mopatú, natua doman in dodayow kon intau bodok diá in maanannea.

² Ná ḷagapan inta iḷumayug bo modondaḷoi kon ḷokutoi, natua doman in odi-odi diábí moitugat kon intau inta diá kotaḷá.

³ Keledai in musti baḷaḷáan, kabaḷo in mustibí sambokon, natua doman in intau bodok musti bongkugon.

⁴ Intau inta motubag kon onu in ḻibóon in intau dondunguḷ, yo noyobodokdon in intau tatua.

⁵ Ḷoḻibó inta mobodok mustibí tubagan in tontubag inta mobodok doman, sinbá ki inta moḻibó in monotaaudon kon diábí in sia mopandoi ná inta kon raiannea.

⁶ Mopotabá kon intau bodok pokidiaan in habar, in notongkaibí in momutoḷ kon sioḷ tontaní bo motayak kon bodito.

⁷ Naonda bo intau ḻempeng mopoḷampang in sioḷnea, natua doman in intau bodok inta mononggina.

⁸ Modayow kon intau inta diá in kototaau, naonda bo motogot kon batu korigonon kon popakot.

⁹ Ná intau noḷoḷangu nopoḷuai in dugi kon ḻimanea, natuata in intau bodok inta mononggina.

¹⁰ Ki ine in mokiaid kon intau bodok andeka kon intau inta moitaḻib yo mokoporugibímai kon intau mobarong.

¹¹ Ná ungkú inta bui mokaan kon totukanea, natua doman in intau bodok inta mobuimai kon kobobodoknea.

¹² Intau inta totok in bodok in mopia-piabí kon intau inta tumangoi mopandoi.

¹³ Intau maḷat in moibogbí sinbá umuran kon baḷoi; sia in moguman, “Oyúon in singa kon ḷuai, dika-dika domokonnea in akuoi kon daḷan.”

¹⁴ Naonda bo ḷoḻingkop moburow kon totadangannea, natuata in aid in intau maḷat momurow kon awaknea kon tudu in tosiugannea.

¹⁵ Oyúon in intau inta totokbí in moiḻiu in maḷatnea; umpaka mopoyoyok in kaanon kon bibignea tontaní yo mobú doman.

¹⁶ Intau maḷat in monganggap kon siabí in motaa-taau nongkon intau pitu inta moitutui in pinototubag.

¹⁷ Intau inta dumugang kon bobayowan inta deeman totaaunea notongkai in intau inta nodomok kon ungkú ḻindong kon bongoḷannea.

^18-19 Intau inta monompobaḻik, bodongka moguman, “Akuoi in tongábí momaḻitumbui,” in notongkai in intau nobundai inta mopogogitog in ḷoḷutam inta mokobodito.

²⁰ Aka kayu modaitdon, yo tuḷú in mopiong domandon; aka intau bibigon diádon, yo bobayowan in mogogaibí domandon.

²¹ Ná buing bo kayu mokopopisí kon tuḷú umuran moyongkit; yo natuata in intau inta moibog mobobayowan monundud kon rogenggengan.

²² Moponapud in uboḷ tua in mopia in konanaman; mopiabí in gina in intau in moḻiom kon tua.

²³ Naonda bo kuyon butá sinopuan in saḷaka, natuata in intau inta mopia kon singog, táe moraat kon gina.

²⁴ Intau inta moraat in mopiabí in tosingogonnea mita táe ginanea nopuḻing in moromú

²⁵ Umpaka mobahasa mako in sia, yo dikabí pirisayaan; sin yaatnea ain nongawasa kon ginanea.

²⁶ Umpaka bunionnea in yaat in ginanea, yo ontongonbí kon bayongan in aidnea inta moraat.

²⁷ Ki ine in mongaḻi kon bubú sin poniat kon intau ibanea, yo siabí tontaní in moḷabú kon bonunea. Ki ine in moḻiḻid kon batu sinbá moidantug kon intau ibanea, yo siabí tontaní in kodantugan in batu tatua.

²⁸ Monguboḷ kon intau notongkaibí in moyaat in gina kon inia. Moburidilá mako mokopoangoi kon bodito.