AMSAL 25 - Alkitab Singog In Mongondow Masa In Tanaa

Tonggina mita i Salomo ibanea

¹ Moiduduimai naa oyúon doman in tonggina mita nongkon i Salomo inta pinais bui in pogawai mita kon komaḻig i Hizkia, datu in Yohuda.

² Ki Allah pinoḷantud popisí in onu inta iharasia-Nea; datu in ihoromat popisí in onu in motaau ininsilangannea.

³ Naonda bo baḷangon inta modaḷom bo ḷangit inta moḷantud, natuata in raian in datu diá kotaauan.

⁴ Daritaipa muna in saḷaka nongkon utagnea, baintua bo inta mopira in motaau aidan in mongongurig.

⁵ Untundon in monononggina mita inta moraat nongkon komaḻig, baintua bo moroton in pomarenta sin moadil.

⁶ Aka mayá kon tayowon in datu yo koompá in dodia, dika tumangoi intau inta koḷoḻitúan moḷantud.

⁷ Mopia-piabí kon pokipoḻitúan kon tampat inta mopia-pia dika pokipomampingan kon ḷoḻitúan sin ḻitúan in intau inta kon ḻimonikanmu.

⁸ Dikabí ḻimika-ḻikat in modia kon pelekara kon pongadilan; sin, aka kon singgai moiduduimai bo noniatamai ikobí in noitaḷá yo onupa in motaaumu aidan?

⁹ Aka moyotaḷá takin yobayatmu, yo poyotutuipa intua tongá takinnea, táe onu in iharasia in intau dikabí potaaumu.

¹⁰ Sin, iko in anggapon monia intau inta moruit in bibig bo tangoimu in mogoguyaatdon kon kinoouput in kobiaganmu.

¹¹ Bonu in raian inta pinoposingog noitongkaná kon wakutunea in naonda bo bungai in buḷawan kon bonu in pindan saḷaka moḷoben.

¹² Toboḷow in intau moarip kon i intau inta moibog mokidongog, in naonda bo sising buḷawan andeka ḷambá madiow.

¹³ Totabá inta motoindudui in mokosanang kon intau inta nopotabá, naonda bo tubig moonow kon mororatab kon gobá in tudunea.

¹⁴ Dandi mita inta diá inintompodan, in naonda bo goḷom bo tompot inta diá mopoonag in uyan.

¹⁵ Aid mosabar takin tosingogon mita inta moḷukó in mokoyakinbí kon intau inta nongawasa, bo mokorimumud kon bayongan inta moḷawang.

¹⁶ Dika mokaan kon biluk mobarong; sin angoiandon in rongó in iko.

¹⁷ Dika mokopokakit in iko momangoi kon baḷoi in topodiugmu, sin mobúdon in sia bo doídon in sia koangoianmu.

¹⁸ Moponapud in uboḷ in mokopatoibí, naonda bo kedang, popangkuḷ andeka piot inta moḷanit.

¹⁹ Mopirisaya kon intau momomaḻidawan kon dodai in mororiga in naonda bo mopongokob in ingipon inta ain nodandú andeka mopobayá in sioḷ nopengkoḷ.

²⁰ Modondong kon intau inta kinopatoian in naonda bo nomilang kon inia kon sempo in tumping naonda bo nomutak in boil kon kekebnea.

²¹ Aka musungmu bo gogoyon, yo ogoiai in kaanon in sia; bo aka morogang in sia, ogoiai in inumon.

²² Aidmu natua mokopooyámai kon inia bo barakatan i Tuhan in iko.

²³ Tompot in utuan notantúbí kon mopoangoi in uyan; natua doman in rorebegan notantúbí kon mokopomuká kon rogenggeng.

²⁴ Mogutun kon siku in ḷuntung in mopia-pia nongkon mogutun tobaḷoian in buḷoi bobay inta moibog mobobayowan.

²⁵ Motarima kon habar inta mopia nongkon ḻipú inta moyayú in naonda bo monginum kon tubig moonow kon dodai in morogang.

²⁶ Intau mopia inta tumungkud kon intau moromú in naonda bo bokaká inta noḷobog andeka parigí inta nokarensó.

²⁷ Diábí mopia in mokaan kon biluk moiḻiu, natua doman diábí mopia in moiḻiu in pododayow.

²⁸ Intau inta diá mokoigon kon ginanea in naonda bo kotá inta ain noumpag in dindingnea.