AMSAL 23 - Alkitab Singog In Mongondow Masa In Tanaa

–6–

¹ Aka iko ḻimitú mongaan takin intau moḷoben, torop ki ine in sia.

² Aka mobiasa mobarong in pongongaan, yo pondam in ibogmu tatua.

³ Dika imibo-ibog in mongaan kon mopia inta inoḷudnea, sin dikabo tongábí monungkuḷ in sia kon inimu.

–7–

⁴ Dika rumoriga totok sinbá mobaḻí mooyúon. Taḷaaidon in niatmu tatua.

⁵ Sin, tongábí tokokiap monag in kapunyaanmu bo modait, naonda bo oyúon in koḻikipnea bo ḷumayug kon toḷungayá naonda bo ḷagapan boniá.

–8–

⁶ Dika mongaan moyotakin in intau inta morinut. Dika doman moibog in kaanonnea inta mopira.

⁷ Sin, sia in moguman, “Igai mongaan; podugangpabí,” bokaka makusudnea in deemanbí natua. Mopia in singognea, táe toposibí in kon ginanea.

⁸ Sin dikabo onu inta ain iḻiommu buimu pototuka, bo bayongan in tosingogonmu inta mopia in diá in mangaḻenea.

–9–

⁹ Dika mononggina kon intau bodok; diábí horomatonnea in tongginamu tatua.

–10–

¹⁰ Dika mokoimontanmai in momamping kon sigad in butá tonsilai andeka mogamá kon butá kapunyaan in intau uno-unon.

¹¹ Sin, ki Tuhan in mototuḷung inta moropot Siabí in motuḷung kon i monia moḷawang kon inimu.

–11–

¹² Tondudutbí in totundú in gurumu bo pobalajar totok.

–12–

¹³ Dikabí moondo-ondok in modidik kon i adímu. Aka sambokonmu uwoy in sia, diábí matoi in sia,

¹⁴ sedang bo mosaḷamatbí.

–13–

¹⁵ Adíku, mosanangbí totok in akuoi aka mobijaksana in iko.

¹⁶ Mopiabí in ginaku aka mokodongog kon iko in mopoyaput in singog mita inta moitugat.

–14–

¹⁷ Dika mointoi kon intau binaradosa. Tantúdon kotoindudui kon i Allah

¹⁸ sinbá kobiaganmu moiduduimai in koḷukadan, bo kamangmu in diá mobuḻi.

–15–

¹⁹ Indongogai, adíku! Pokopobijaksana. Tondudut totu-totuu in kobobiagmu.

²⁰ Dika moyobayat in intau moḷoḷangu andeka intau turá,

²¹ sin mosia in mobaḻí mobogá. Aka iko tongá mosiug, dá diádon moonggot bo iko in mogiḷambungdon in ḷambung mobera-berak.

–16–

²² Duduiaibí in ki amámu; sin, aka diá in sia yo diábí doman in iko. Aka ki inámu in mogoguyangdon, yo poniatabí kon iko in mohoromat kon inia.

²³ Totundú inta mobanar, hikmat, topotundú, bo pomomangaḻe – tua komintan in patusbí taḷuion, bo donaaibí potaḷui.

²⁴ Guyanga ḷoḷaki mosanangbí aka ki adínea oyúon in raian bo mopia in oaid; mopiabí in ginanea aka ki adínea mobijaksana.

²⁵ Igumon mako in ki amá bo ki inámu mopia in ginanea kon inimu; igumon mako in mosanangdon totok in bobay inta nopononggadí kon inimu.

–17–

²⁶ Tondudut kopira bo duduidon kon kobobiagku, adíku!

²⁷ Bobay sundaḷ inta sumundaḷ in poyogaḷapbí inta mokoanib.

²⁸ Mosia in moḷabot naonda bo mogogagow bo mokopopisí kon mobayong in ḷoḷaki monuaḻing.

–18–

^29-30 Kotaauanmu degá mongo onu in mobaḻí kon intau inta monginum kon anggur mobarong, bo inta mokakit in monginum kon inta mokoḷoḷangu? Intau tatua in mobogá bo mororiga. Sia in umuran mobobayowan bo mogamui. Matanea in mopura bo awaknea in kekeban, bokaka tua komintan in motaaubí taḷaannea.

³¹ Dikabí mopomayá mako kodondouḷugan in anggur in iko, umpaka batangannea totok in mokoangá bo koontongan mopouḻi-uḻinag kon bonu in galas bo tumuot mopira kon sigogow.

³² Ikoḷom doḷo-doḷom iko in mokorasa kon naonda bo ain sinobak in uḷag mobisa.

³³ Matamu in naonda bo oyúon in doriaká, raianmu motombauk bo bibigmu in kinosingo-singognea.

³⁴ Korasaanmu in naonda bo kon popod in oigi in kapaḷ inta kon yuak in dagat; uḷumu mopusing bo iko in moibangkauḷu.

³⁵ Bo iko in moguman, “Akuoi naa in binongkug bo sinokap in intau, táe diádon kinotoropanku mongo onu in nobaḻí. Kaasí ah, tomposiug totok in akuoi! Modugangpa in akuoi monginum!”