AMSAL 22 - Alkitab Singog In Mongondow Masa In Tanaa

¹ Tangoibí mopia in mopia-pia in kaoyúonan inta mobayong; kotabibí in intau in mopia-pia in ogoian saḷaka bo buḷawan.

² Intau nooyúon bo intau nobogá oyúon in notongkai kon monia: Ki Tuhanbí in nomaḻí kon i monia komintan.

³ Intau mobijaksana momarut aka mokoontong mako kon bodito; intau bodok mayá turus bo koantugan in roriga.

⁴ Intau inta mopirisaya kon i Tuhan bo tumonsiup, in mosanang, mobiag motompia bo horomaton.

⁵ Poyogaḷap bo tontoyaud in kon daḷanbí in intau motombogá; pokoyayúdon kon tua komintan aka iko moibog mosaḷamat.

⁶ Tundúdon in adí tobatú in kobobiag inta patus kon inia, dá modapot in sia kogoguyangannea natuabí doman in kobobiagnea.

⁷ Intau bogá kinawasa in intau nooyúon; intau inta noḷuan kinawasa in intau inta nopoḷuan.

⁸ Intau inta moponimboi in tombogá in mokoyutbí kon bodito; imbuitnea kawasanea mogaid kon onu in koibognea in moinggamádon.

⁹ Intau inta mopia in gina barakatan i Tuhan, tuamai mosilai in sia kon rijiki kon intau inta kinodaitan.

¹⁰ Untundon in intau inta moibog moningkuḻe, dá mogogaidon in ropatoi, sosaturuan bo mosipotaḷáan.

¹¹ Intau inta moibog kon inta motuḻid bo inta mopia in pososingognea, in mobaḻíbí yobayat in datu.

¹² Pongin mongokai kon uboḷ in intau inta motombogá, yo ḷukadan i Tuhan sinbá sinotaau inta mobanar in tantú koḷukadan.

¹³ Intau momaḷat moibog mogutun mako kon baḷoi; sia in moguman, “Oyúon in singa kon ḷuai, dika-dika bo domokonnea in akuoi kon daḷan.”

¹⁴ Dondouḷug in bobay sundaḷ nobaḻí poyogaḷap; intau inta sinorúan i Tuhan moibonu kon poyogaḷapnea.

¹⁵ Nongkon dungkuḷpabímai mongoadí mita in mogaid kon inta mobodok, táe uwoi in motaaubí pomout sinbá mobaḷui in dodia monia.

¹⁶ Ki ine in moibog mooyúon pongin mondorot kon intau bogá bo mobogoi in tombuinag kon intau nooyúon kon imbuitnea in momalaratbí.

Tonggina mita in intau moarip

¹⁷ Indongogai, akuoi in motundúbí kon inimu in tonggina in intau moarip! Tondudutbí in topotundúku.

¹⁸ Iko in mosanangbí aka topotundúku tua bo tagúonmu kon bonu in ginamu. Sin aka natua yo ain koyongan sinadiamu aka mopomaké kon inia.

¹⁹ Tundúonku intua kon inimu in tanaa sin ibogonku iko in mopoandoḷ in pirisayamu kon i Tuhan.

²⁰ Toḷu nopuḷú in tonggina pinaiskudon kon inimu – tonggina mita inta nopuḻing in sinotaau bo tonggina inta mopia;

²¹ bo inta motundú kon inimu onu inta totu-totuu mobanar. Komintanmai, aka iko in poḻibóan, yo iko in mokotubagbí podudui kon onu inta iḻibó.

–1–

²² Dikabí moporugimai kon intau bogá, tongá popisí in sia moyangkó; bo kon sidang pongadilan dika mogagow kon hak in intau inta diá kodaya.

²³ Sin, ki Tuhan in moduḷubí kon pelekara monia bo morabut kon nyawa in intau inta mondorot kon i monia.

–2–

²⁴ Dika moyobayat in intau inta moibog tumorú bo ḷagi moponik in dugú.

²⁵ Sin iko in dumayan doman kon inia, bo diádon motaau monginggamá kon kabiasaan tatua.

–3–

²⁶ Dikabí modandi kon moguboḻi kon boḻi in intau ibanea.

²⁷ Sin aka iko bo diá mokouboḻi kon tua komintan, tosiuganmu tontaní in gamáan doman;

–4–

²⁸ Dika mokoimontanmai in momamping kon sigad in butá inta ain sinantú in mogoguyangmu.

–5–

²⁹ Nokoimontandon degá iko in nokoontong kon intau inta mopandoi nogaid kon oaidannea? Intau tatua in pokiaidanbí kon komaḻig in datu mita, deemanbí kon baḷoi in intau biasa.