AMSAL 21 - Alkitab Singog In Mongondow Masa In Tanaa

¹ Naonda bo pononompia i Tuhan kon tubig in ongkag sinbá moiḻig podudui in ibog-Nea, natua doman in pokokapit-Nea kon raian in datu.

² Bayongan aid in intau degá mopiabí in kon bonu in raiannea tontaní, táe ki Tuhanbí in moindoi kon makusud in ginanea.

³ Oaid inta moadil bo mobanar in mokosanang totok kon gina i Tuhan moiḻiu kon bayongan in sosumba.

⁴ Intau moraat tatua in binaradosa, popisí in kinawasa in dodia bo ḷoḷatúnea.

⁵ Tomayá in intau morajing in mobogoi in mobarong; pogogaid inta tongá yumombi-yombit mokopoangoi kon kodaitan.

⁶ Kaoyúonan inta nouḻí pinongin diá motuḻid ḷagi mobuḻi bo modia kon intau mopobayá in poḷobongan.

⁷ Intau moraat in doíbí dumudui kon hukum; sia in mororigabí in romúnea tontaní.

⁸ Intau inta kotaḷá, moikaing in daḷannea; intau inta mopia tantú motuḻid in kobobiagnea.

⁹ Mogutun kon siku in ḷuntung in mopia-pia in mogutun tobaḷoian in buḷoi bobay inta tantú moibog moropatoi.

¹⁰ Intau moraat umuranbí moibog mogaid kon inta moraat; Kon i inekabí diábí in tabinea.

¹¹ Hukuman kon intau mononingkuḻe in mobaḻí topotundú kon intau inta diá kopongalaman. Aka intau mopia in toboḷowon, modugang in sia mobijaksana.

¹² Ki Allah Inta Totok in moadil monotaaubí kon onu in mobaḻí kon bonu in baḷoi intau moraat. Sia in mopotabatbí kon i monia dá moyopú in mosia.

¹³ Ki ine in doí mokidongog kon amui in intau inta kinodaitan diábí doman pandungonmai aka sia in mopoigum in totuḷung.

¹⁴ Sinbá moonow in torú bo napusu, yo uni-unidon mako bo ogoiai in tombuinag.

¹⁵ Aka inta moadil in pobayá, dá mosanangbí in gina in intau mopia, táe intau moraat in moondokbí.

¹⁶ Intau inta diá dinumudui kon kobobiag inta mopia, notantúbí kon modapot in dunia in intau minatoi.

¹⁷ Intau inta moibo-ibog mobarasanang in umuranbí kodaitan; intau inta imibo-ibog in mopomaké in onu inta kon inia yo diábí mobaḻí mooyúon.

¹⁸ Aka intau mita hukumon i Tuhan, deemanbí intau mopia, táe intaubí moraat in mokouḻí kon roriga.

¹⁹ Maníka bo mogutun kon rawang kayuon, dika in mogutun takin buḷoi bobay inta mounsingog bo tantú tumorú.

²⁰ Intau mobijaksana in tantúbí mobiag motompia bo mooyúon; táe intau bodok imibo-ibogbí in mopomaké in kapunyaannea.

²¹ Ki ine in umuran mopobayá in inta moadil bo totabian, yo mokouḻíbí kon kobiagan motompia, kahoromatan bo umur moḷanggó.

²² Intau inta mopandoi mokotongodbí in mogagow kon kotá inta iḷukadan in tontara inta mongotorindog; sia in mogumpagbí kon poḷoḷukadan mita inta pongata monia.

²³ Sinbá moisimparut kon roriga, yo mustidon mokopoingat in mosingog.

²⁴ Intau moḷoḷatú bo mosiḷantud in moibogbí moningkuḻe bo diá koendar.

²⁵ Intau maḷat inta doí mogaid; moḻimod kon inia tontaní pongin ibognea.

²⁶ Kinoouput in singgai sia in tongábí morai kon onu inta kinoibognea. Táe, intau inta motuḻid in kobobiagnea motaaubí mobogoi in mobarong.

²⁷ Ki Tuhan in doíbí kon sosumba in intau inta moraat, apa doman aka pinosumba pinongin makusud inta mokooyá.

²⁸ Sakusi inta mouboḷ in diábí pirisayaan; táe tosingogon in intau inta nonotaau in kinobobaḻí in pelekara, in tarimaanbí.

²⁹ Intau motuḻid in moyakinbí kon awaknea; intau moraat in diá kooyá.

³⁰ Diábí in hikmat, bo pomomangaḻe andeka kobobijaksana inta mononoi kon tayowon in Tuhan.

³¹ Umpakabí parang sinontouḷutan in kabaḷo in parang, inta monantú kon kauntungan in ki Tuhanbí.