AMSAL 20 - Alkitab Singog In Mongondow Masa In Tanaa

¹ Oinumon mokoḷoḷangu mokopopisí kon intau mobaḻí ná diá dinidik bo modowawá. Bodokdon in intau inta monginum dapot in moḷoḷangu.

² Torú in datu naonda bo ganggor in singa; intau inta mokopomuká kon torúnea notongkaibí in mopobodito kon awaknea tontaní.

³ Tongábí intau bodok inta moibog morogenggeng; aid inta dayowon in yumayúbí kon rogenggengan.

⁴ Monononggobá inta maḷat diá mobuká kon gobánea kon wakutunea; imbuitnea kon sempo in posipunan kon bungai in boyó yo butánea in diábí mobogoi in onu bo onu.

⁵ Bonu in gina in intau naonda bo tubig kon bonu in parigí inta modaḷom; táe kotayukanbí in intau inta mopandoi.

⁶ Mobarong in intau mongaku kon yobayat, táe inta totu-totuu mosatia, in mororigabí in mouḻí.

⁷ Adí mita mountung aka oyúon in guyanga ḷoḷaki inta mopia bo motuḻid in kobobiagnea.

⁸ Aka datu ḻimitú kon kadera in pongadilan, koontonganneabí in bayongan inta moraat.

⁹ Oyúon degá in intau inta motaau mosingog, “Ginaku in modarit, akuoi in noiḷuatdon kon dosa?”

¹⁰ Simbangan bo pogogukuran inta motombogá kinodoíbí i Tuhan.

¹¹ Nongkon oaid in adí yo kotaauan bidon mongo dodianea mopia bo motuḻid.

¹² Bongoḷan in pakéon mokidongog bo mata in poindoi, doyowa tua in ki Tuhanbí in nomaḻí.

¹³ Intau inta siugon mobiag mobogá. Intau inta morajing mogaid mobarong in kaanon.

¹⁴ Mototaḷui in tantúbí mogamui kon momahaḷ in boḻinea. Táe naonda in motaḷui mako, mopiabí in ginanea kon boḻi inta nouḻínea.

¹⁵ Tosingogon mita inta tombonunea in sinotaau, in momaha-mahaḷbí nongkon buḷawan bo berlian.

¹⁶ Ki ine in moibog moguboḻi kon boḻi in intau ibanea, motaaubí gamáan in kaoyúonannea mobaḻí tontagú kon dandinea.

¹⁷ Kapunyaan inta nouḻí inuboḷan, dungkuḷ mopira in nanamnea, táe moiduduimai kon tua nádon batu inta moḷanit.

¹⁸ Tomayá kodapotan in roraian; tuamai, dika moḷongasi aka diápa moḷutú in tomayá.

¹⁹ Intau inta moibo-ibog mongonguman kon intau ibanea, diábí motaau motagú kon rahasia; dika moyobayat in intau inta moantó in ouman.

²⁰ Intau inta mogodi-godimai kon guyanganea, kobiagannea in moinggamábí naonda bo togá inta mopiong kon doḷom inta sindip.

²¹ Kapunyaan inta nouḻí nodaḻin-daḻí, kon imbuitnea noniata magí deemanbí barakat.

²² Dikabí mopotuḻí in moraat kon inta moraat; popirisayadon kon i Tuhan, Siabí in motuḷung.

²³ Simbangan bo batu pononimbangan in intau motombogá in kinodoíbí i Tuhan.

²⁴ Ki Tuhan in nonantú bidon kon daḷan kobiagan in intau kon dunia naa; tuamai intau in diábí monotaau kon daḷan kobiagannea tontaní.

²⁵ Raipa muna kopiraan kon dodai in diápa mopodandi in kuruban kon i Tuhan. Dika-dika bo momanasaḷ in iko in kon singgai moiduduimai.

²⁶ Datu inta mobijaksana kotaauanneabí in intau inta moraat; hukumonneabí in mosia bo diábí in ampung.

²⁷ Gina in intau in nobaḻí bayag nongkon i Tuhan inta monimbayag kon bayongan in bonunea.

²⁸ Aka datu momarenta podoyon kon tabi, kajujuran bo koadilan, dá sia in tantúbí mongawasa.

²⁹ Intau moguodpa in ponango-nangoian popisí in ropotnea, bo guyanga in horomaton popisí in ubannea.

³⁰ Moiḷanuimai pongalaman inta diá mopia momopat kon aid moraat, bo mondarit kon gina in intau.