AMSAL 2 - Alkitab Singog In Mongondow Masa In Tanaa

Baraguna in hikmat

¹ Abataibí in totundúku mita, adíku, bo umuran torop in tongginaku mita kon inimu.

² Tondudut onda inta mobijaksana bo poḷongasi monotaau kon tua.

³ Adíku, poḷongasi mokouḻí kon raian inta mopandoi bo poigum kon pomomangaḻe.

⁴ Tayak intua ná motayak kon buḷawan, bo batuk intua ná momatuk kon kapunyaan inta noibuni.

⁵ Pongin natua dá kotaauanmudon onu in mangaḻe in motoguondok kon Tuhan bo kotaauanmudon totok in ki Allah.

⁶ Ki Tuhanbí in mobogoi in hikmat; nongkon i-Niabí intau mokouḻí kon pongotahuan bo komomangaḻe.

⁷ Intau inta motuḻid in gina bo inta diá in bogit, tuḷungan-Nea poḷat ḷukadan.

⁸ Ki Tuhan in moḷukad kon intau mita inta mongoadil, bo moḷukad kon i monia inta motabi kon i-Nia.

⁹ Aka iko bo motoindudui kon inakó, adíku, yo kotaauanmubí onu in moadil, mojujur bo mopia. Kotaauanmu doman naonda in kobobiagmu.

¹⁰ Iko in mobaḻíbí mobijaksana, bo sinotaaumu in mokosanangbí kon ginamu.

¹¹ Komomangaḻe bo kopopandoimu tua in moḷukad kon inimu,

¹² bo moḷamboi kon inimu dumudui kon kobobiag inta diá mopia, bo mopoyayú doman kon inimu nongkon intau mita inta moraat in bibig.

¹³ Mosia in doíbí dumudui kon kobobiag inta mopia; mosia in mongindaḷanbí inta mosindip bo nopuḻing in dosa.

¹⁴ Mosia in mokouḻí kon kososanang nongkon aid monia inta moraat.

¹⁵ Mosia in motombogá bo kobobiag monia in diá moitutui.

¹⁶ Iko, adíku, in mokotaḻingbí kon dondouḷug in bobay sundaḷ inta moḷongasi modondouḷug kon inimu pongin tosingogon mita inta mopia.

¹⁷ Bobay tatua in diábí mosatia kon i buḷoinea bo kinoḻionganneadon in dandinea kon i Allah.

¹⁸ Aka iko mayá in baḷoinea notongkaibí in mayá in popatoi. Mayá kon inia notongkaibí in mayá kon dunia in intau minatoi.

¹⁹ Intau inta mayá kon inia diábí kon dodai in onda in mobui kon daḷan inta mayá in kobiagan.

²⁰ Tuamai, adíku, duduiaidon in kobobiag in intau mopia, bo kobiagdon podudui in ibog i Allah.

²¹ Sin, intau inta mobiag podudui in ibog i Allah, tuata in intau inta motuḻid in ginanea, mosia tua inta mogutun kon butá inta pinodandi i Tuhan.

²² Táe intau moraat bo binaradosa in pogambat kon ḷuai i Allah nongkon butá tatua, naonda bo bonok irabut nongkon butá.