AMSAL 19 - Alkitab Singog In Mongondow Masa In Tanaa

¹ Maníka bo intau bogá inta motuḻid in kobobiagnea, dika in intau bodok inta moibog monguboḷ.

² Rajing diá takinan pongotahuan, diábí mopia; intau inta ḻimika-ḻikat in mogaidbí kon inta moitaḷá.

³ Intau in moporugibímai kon awaknea tontaní popisí in bodoknea, onda intua mopotaḷá kon i Tuhan kon onu inta nobaḻí tatua.

⁴ Intau nooyúon, yobayatnea in umuran modugang; intau bogá taḷaanmai in yobayatnea.

⁵ Intau inta monguboḷ kon pongadilan, diábí moisimparut kon hukuman.

⁶ Komintan intau in moḷongasibí sinbá koibog in intau moponting; bayongan in intau moibogbí moyobayat in intau inta moibog motuḷung.

⁷ Intau bogá poompáanbímai i utatnea, apadoman yobayatnea. Naondaka in pororamujinea, sia in diábí mokogamá kon gina monia.

⁸ Ki ine in momatuk kon pongotahuan, motabi kon awaknea tontaní; bo ki ine in mokotorop kon onu in binalajarnea, mopiabí in kobiagannea.

⁹ Intau inta monguboḷ kon pongadilan notantú bidon kon hukumon bo yopúon.

¹⁰ Diábí patus in intau bodok mobiag mooyúon, bo diábí doman patus in bobantung momarenta kon mongongawasa.

¹¹ Intau mobijaksana in mokoigonbí kon torúnea. Sia in dayowon sin diá mopandungmai kon taḷá in intau kon inia.

¹² Torú in datu naonda bo ganggor in singa; kopopia in datu naonda bo oḷú inta momobat kon mobobiag mita.

¹³ Adí inta bodok mokorimumud kon i amánea. Buḷoi bobay inta mounsingog in naonda bo tubig inta umuran mototuyú.

¹⁴ Baḷoi bo kapunyaan motaaubí in mouḻí nongkon guranga, táe buḷoi bobay inta mobijaksana in barakatbí nongkon i Tuhan.

¹⁵ Aid maḷat mokopopisí kon intau mosiug moanok, bo imbuitnea intau maḷat koaputan in gogoy.

¹⁶ Intau inta dumudui kon parenta mita i Allah in mosaḷamat, intau inta diá mopandung in matoibí.

¹⁷ Motuḷung kon intau bogá notongkaibí in nopoḷuan kon i Tuhan; bain ki Tuhan doman in motuḻí kon tua.

¹⁸ Tundú kotompiraan in ki adímu kon dodai in oyúonpa in kamang; aka diá dá mangaḻenea ibogonmu in morimumud in sia.

¹⁹ Biódon mako in intau inta moḷongka-ḷongkang mako in tumorú motarima tontaní kon bungainea. Aka iko motuḷung kon inia, iko in tongábí modugang kon torúnea.

²⁰ Aka iko moibog mobalajar bo mokidongog kon tonggina, yo kon singgai moiduduimai iko in mobaḻí intau inta kohikmat.

²¹ Intau mobayong in tomayá, táe tongábí onu in sinantú i Tuhan in mobaḻí.

²² Sipat inta oḷaton mako kon intau tobatú in kotoinduduineabí. Mopia-piabí kon bogá dika in mobaḻí mouboḷ.

²³ Horomatbí in ki Tuhan, dá mosanang in kobiaganmu; mopuasbí in iko bo moiyayú kon bodito.

²⁴ Oyúon in intau maḷatnea in ponango-nangoian; umpaka mopoyoyok in kaanon kon bibignea yo mobú in sia.

²⁵ Aka intau moḷoḷatú hukumon, intau inta diá kopongalaman mokouḻí kon topotundú. Aka intau mopia toboḷowon yo modugang in sia mobijaksana.

²⁶ Adí inta momongkug bo mopoguntun kon guyanganea, in adíbí inta mokooyá bo nohina.

²⁷ Adíku, aka iko doídon mobalajar bui, yo koḻionganmudon onu inta ain binalajarmu.

²⁸ Mobogoi in sakusi inta diá totuu, tua in mangaḻenea moningkuḻe kon hukum; mopobodito kon intau, mopiabí kon intau moraat.

²⁹ Intau bodok inta motosiḷantud notantú bidon kon bongkugon.