AMSAL 17 - Alkitab Singog In Mongondow Masa In Tanaa

¹ Maníka kaanon topoputok takin popiaan, dika in kaanon mopia inta mobarong takin bobayowan.

² Bobantung inta mopandoi in mongawasabí kon adí inta moḷawang; bo motarimabí kon tonsilai moyotakin i utat mita in adí tatua.

³ Buḷawan bo saḷaka in ujionbí kon tuḷú, táe gina in intau in ujionbí i Tuhan.

⁴ Intau moraat dumuduibí kon tonggina mita inta moraat, intau mouboḷ moibog mokidongog kon tosingogon mita uboḷ inta ponapud.

⁵ Ki ine in moningkuḻe kon intau bogá yo mopoompábímai kon i Allah inta nomaḻí kon inia. Ki ine in mosanang in gina kon koboditoan in intau, yo notantúbí kon mokouḻí kon hukuman.

⁶ Inta mokoḷunganga kon intau inta ain nogoguyang in adí bo ompubí; mokoḷunganga kon adí in guyanganeabí.

⁷ Intau inta ihoromat in diábí patus mosingog kon uboḷ; intau bodok diábí patus mosingog kon tosingogon mita inta baraguna.

⁸ Oyúon in morai kon doit sogó in mokopoangoibí kon inta mokoherang; pongin doit sogó yagi-yagi in koaidanbí.

⁹ Aka moibog kosanang in intau, ampungai in taḷá inta inaidan monia. Tantú mongonguman kon taḷá tongábí mokobontow kon yoyobayatan.

¹⁰ Toboḷow komintan moiḻiu in mangaḻenea kon intau moibog mokidongog bo mopia-piabí kon ḷubag kogatut kon intau bodok.

¹¹ Intau moraat umuranbí mokopomuká kon ropatoi, táe popatoi in mamangoi kon inia nobaḻí totabá inta moromú.

¹² Mopia-piabí kon moyodungkuḷ in ki iná in beruang inta kinobuḻian i adínea, dika in moyodungkuḷ in intau bodok inta kinawasa in kobobodoknea.

¹³ Ki ine in mopotuḻí in moraat kon inta mopia, yo aid moraat tatua in diábí doman kopoḷuaian nongkon baḷoinea.

¹⁴ Momangkoi kon rogenggeng in naonda bo mobuká kon daḷan in tubig; tuamai in undokdon wakutu in diápa momangkoi in rogenggeng.

¹⁵ Ki Tuhan in doíbí kon intau inta mopobanar kon intau moraat, bo inta mopotaḷá kon intau inta diá kotaḷá.

¹⁶ Diá baraguna in intau bodok mokopodait kon doit motayak kon hikmat, sin sia in diábí koraian inta mosehat.

¹⁷ Yobayat tobatú umuranbí mosatia kon topotakin, táe utat tobatú moitakin mobaba kon roriga.

¹⁸ Intau inta modandi moguboḻi kon boḻi in tumpaḷa intau in intaubí inta bodok.

¹⁹ Intau inta moibog kon dosa, in moibogbí morogenggeng. Intau inta moambungangaḷ, motayakbí kon korimumudan.

²⁰ Intau inta mouboḷ in diábí mosanang, intau inta tongá kinosingo-singognea in mokouḻíbí kon bodito.

²¹ Mokouḻí kon adí inta dondunguḷ in notongkaibí in nokouḻí kon robonoḷ in gina; mobaḻí amá in adí inta bodok diábí mobogoi in inta mokosanang kon gina.

²² Gina inta mosanang in mokosehatbí kon awak; gina molamurú mokoinggamá kon ibog.

²³ Hakim inta diá moadil, in umuni-uni motarima kon doit posogó bo diábí in sia mopobayá in onu inta moadil.

²⁴ Inta batukon in intau mopandoi in tongábí bá mokouḻí kon hikmat, táe inta batukon in intau bodok in diá motantú.

²⁵ Adí inta bodok mokosusa kon i amánea, bo mokoajar kon gina i inánea.

²⁶ Diábí patus in momaké in denda kon intau inta diá kotaḷá; diábí patus in mondorot kon intau inta mopia in oaid.

²⁷ Intau inta mopandoi in raiannea, diábí mobarong in singog. Intau inta mobijaksana, umuranbí moodom.

²⁸ Intau inta nobodokabí yo sangkaanbí mopandoi bo mobijaksana aka sia bo tongá kibio-biómai bo diá moposingo-singog.