AMSAL 16 - Alkitab Singog In Mongondow Masa In Tanaa

¹ Intau in motaaubí in momia kon tomayá, táe ki Allahbí in monantú.

² Bayongan aid in intau degá mopiabí in ontongonnea tontaní, táe ki Tuhanbí in noindoimai kon bonu in ginanea.

³ Poandoḷdon kon i Tuhan in bayongan tomayámu, dá kodapotanmubí intua.

⁴ Bayongan yagi-yagi inta inaidan i Tuhan oyúonbí in makusudnea; bo makusud in intau moraat tuata in bodito.

⁵ Bayongan in intau moḷoḷatú kinodoí i Tuhan; Diábí pomayá-Nea mako in mosia kotaḻiban in hukuman.

⁶ Intau inta tumoḷutui kon i Allah in ampunganbí; intau inta mopirisaya in moisimparutbí kon bayongan inta moraat.

⁷ Aka iko mokosanang kon gina i Tuhan, musungmu mita in baḻíon-Neabí yobayat.

⁸ Maníka moyakag in mouḻí táe noidoyon kon gina motuḻid, dika in mobayong in mouḻí táe pinongin aid motombogá.

⁹ Intau in motaaubí momia kon tomayá, táe ki Allahbí in monantú kon daḷan kobiagannea.

¹⁰ Datu in motarima kon kawasa nongkon i Allah, dá, diábí in sia kotaḷá in monantú kon ibognea.

¹¹ Ibogon i Tuhan intau mokopotuḻid kon gina aka modagang, ná doman tua in mopomaké in ukuran bo simbangan.

¹² Kon mongongawasa, mogaid kon inta moraat in mokooyábí, sin pomarentaannea in moroton popisí in moadil.

¹³ Tosingogon totuu in mokosanang kon mongongawasa, sia in motabibí kon intau inta mosingog mobanar.

¹⁴ Torú in datu in naonda bo habar hukuman matoi; intau inta mobijaksana moḷongasi mopoonow kon inia!

¹⁵ Kopopia in gina i datu mokopoangoi kon kobiagan motompia, naonda bo goḷom mopoḷabú in uyan kon tungkuḷ in pononinggai.

¹⁶ Mokouḻíbí kon hikmat in mopia-pia kon mokouḻí kon buḷawan; mokouḻí kon sinotaau in mobara-baraguna in mokouḻí kon saḷaka.

¹⁷ Intau mopia yumayúbí kon inta moraat; intau inta monaridi kon kobobiagnea, moḷukad kon awaknea.

¹⁸ Aid moḷoḷatú mokopopisí kon korimumudan; mododia mokopopisí kon korumbunan.

¹⁹ Maníka bo moompá in dodia bo diá kokaoyunan, bo dika in dumudui kon intau moḷoḷatú bo mokaan kon kaoyúonan inta inagow monia.

²⁰ Taridi in onu inta ain sinundú kon inimu, dá iko in mokouḻíbí kon onu inta mopia. Popirisaya kon i Tuhan, dá mosanangbí in iko.

²¹ Intau mobijaksana in kotaauanbí kon pororainea inta mopandoi; potosingognea inta mokosanang, mokorigon kon onu in siningognea.

²² Kobobijaksana in nobaḻí pangkoi in kopiaan kobiagan in intau mopia; intau bodok in rorigaan in bodoknea tontaní

²³ Raian in intau mopia in mokopomuká kon tosingogonnea mita mobijaksana, bo totundúnea mokoyakindon totok.

²⁴ Tosingogon moḷukó notongkai in biluk; moromimit in korasaan bo mokosehat kon awak.

²⁵ Oyúon in daḷan koontongan in motuḻid, táe imbuitnea daḷan tatua modia mayá in popatoi.

²⁶ Ibog mongaan moguman kon intau sinbá mogaid; popisí in siannea, dá pakisadon in sia mogaid.

²⁷ Intau moraat moḷongasi mopobodito kon tumpaḷa intau; tosingogonnea mita moraat ná tuḷú mokopokak.

²⁸ Intau motombogá mokopomuká kon rogenggeng; intau inta moibog moponapud in uboḷ mokogoguyaat kon yoyobayatan.

²⁹ Intau moromú monguboḷ kon yobayatnea mita, bo modia kon i monia sinbá mobodito.

³⁰ Mokopoingatdon kon intau inta momomi bo mongiloi, sia in koyogotbí in morai kon inta moraat kon bonu in ginanea.

³¹ Intau mojujur in ogoianbí in umur moḷanggó; ubannea in naonda bo mahkota inta mopouḻi-uḻinag.

³² Diá ḷagi tumorú tuabí in mopia-pia in kokawasa; mokoigon kon gina in mopia-pia in mokotaḷow kon kotá.

³³ Popisí in monotaau kon ukur, intau mopogonik in undi, táe inta motubag in tongábí ki Tuhan tontaní.