AMSAL 15 - Alkitab Singog In Mongondow Masa In Tanaa

¹ Singog inta moḷukó, mokopiong kon torú; tubag inta mopatú mokotagab kon torú.

² Tosingogon in intau mobijak mokopomia kon gina moangá kon sinotaau; tosingogon in intau bodok tongábí moguman kon kobobodok.

³ Ki Tuhan in nokoontongbí kon bayongan inta nobaḻí kon bayongan in tampat; Sia in noindoibí kon bayongan inta mopia bo inta moraat.

⁴ Tosingogon mita inta mopia mokoroton kon gina, tosingogon mita inta moraat mokoinggamá kon ibog.

⁵ Intau bodok diá mopandung kon tonggina i amánea, intau mobijak mokidongog kon toboḷow.

⁶ Kon baḷoi in intau mopia mobarong in kaoyúonan; kaoyúonan in intau moraat iyompat in bodito.

⁷ Tosingogon mita in intau mobijaksana nopuḻing in sinotaau, táe raian in intau bodok in diábí natua.

⁸ Ki Tuhan in motarima kon sambayang in intau mopia, táe doíbí in Sia kon sosumba in intau moraat.

⁹ Ki Tuhan in doíbí kon kobobiag in intau moraat, táe Sia in motabibí kon intau inta moḷongasi mogaid kon onu inta kinoibog-Nea.

¹⁰ Intau inta mogaid kon inta moraat in rorigaanbí; intau inta doí toboḷowon in matoi.

¹¹ Ki Tuhan in nonotaaubí kon dunia in intau minatoi bo bayongan in yagi-yaginea; yo umpaka dá raian in intau bunion kon i-Nia?

¹² Intau inta moibog mopoompámai kon intau ibanea in doíbí toboḷowon; doíbí in sia mopoigum in tonggina kon intau mobijaksana.

¹³ Gina mosanang mokotarimbuka kon pogot; gina inta morobonoḷ in mokoḷungkoyó.

¹⁴ Intau mobijaksana motayak kon sinotaau; intau bodok tongá mosibuk in kobobodoknea.

¹⁵ Intau inta molamurú mako musti tantú rumopot kon bonu in kobiagannea, táe inta mokosing mako umuranbí mosanang.

¹⁶ Maníka bo moyakag in kapunyaan táe takin motoguondok kon i Tuhan, dika in mobayong in kapunyaan táe umuran moondok mako.

¹⁷ Mopia-piabí kon mokaan kon kuyat táe takin totabian, dika in mokaan kon ponoyá inta mopira táe takin yoyaatan.

¹⁸ Intau inta motoyong tumorú mokopomuká kon bobayowan, intau inta mosabar modia kon dodamean.

¹⁹ Intau maḷat umuranbí koantugan in roriga; intau motuḻid in gina diábí moyodungkuḷ in roriga.

²⁰ Adí inta mobijaksana, mokosanang kon gina i amánea; adí inta mobodok diábí mohoromat kon i inánea.

²¹ Kobobodok in kasananganbí in intau dondunguḷ, intau mobijaksana in mobiagbí motuḻid.

²² Tomayá diábí motudun, aka diá muna raion kopiaan; tomayá in kodapotan, aka umuran mononggina.

²³ Tosingogon mita inta siningog inta noitaná kon wakutunea, mokopoangoi kon sanang in gina.

²⁴ Intau mobijaksana dumudui kon daḷan monakod inta mopobayá in kobiagan; deemanbí daḷan mosiḻig inta mopobayá in popatoi.

²⁵ Ki Tuhan in mogumpagbí kon baḷoi in intau inta motosiḷantud, táe butá in intau boba-bobay ḷukadan-Nea.

²⁶ Ki Tuhan in doíbí kon tomayá inta moraat; táe tosingogon mita inta mopia mokosanang kon gina-Nea.

²⁷ Ki ine in motayak kon kauntungan pongin mosindip, in morimumudbí kon motoḷuadínea tontaní. Ki ine in doí motarima kon doit pinosogó, mobiag mosanang.

²⁸ Intau mopia morai muna bo mosingog; intau moraat mosingog kon inta moraat.

²⁹ Ki Tuhan in mokidongogbí aka intau mopia mosambayang, táe Sia in doíbí mopandungmai kon intau moromú.

³⁰ Pogot mosanang mokoḷunganga kon gina, habar inta mopia mokoundam kon gina.

³¹ Intau inta mokidongog kon toboḷow in moyotakinbí in intau mobijaksana.

³² Intau inta doí tongginaan, diábí mohoromat kon awaknea tontaní; intau inta moibog toboḷowon, mobaḻí mopia.

³³ Motoguondok kon Tuhan in nobaḻí dodoyonan in topotundú inta mopia; kahoromatan inunaan in ompá in dodia.