AMSAL 14 - Alkitab Singog In Mongondow Masa In Tanaa

¹ Tonibuḷoi in pinosindog dinoyon kon kobobijaksana in bobay, táe irumbun in kobobodoknea.

² Intau inta mojujur in moondok bo mohoromat kon i Tuhan Allah; intau inta kobiagannea diá motuḻid in gina moningkuḻe kon i-Nia.

³ Popisí in ḷoḷatúnea, dá intau bodok dumuí tontaní; intau mobijaksana in ḷukadanbí in tosingogonnea tontaní.

⁴ Aka diá in sapi, dá diábí doman in bungai in boyó; pinongin ropot in sapi, dá mobarongdon totok in bungai in boyó.

⁵ Sakusi inta mojujur tantúbí moguman kon onu inta totuu, sakusi inta diá motaau pirisayaan tantúbí monguboḷ.

⁶ Intau moḷoḷatú in diábí mobaḻí mobijaksana, táe intau mopandoi motoyongbí in pobalajarannea.

⁷ Dika moyobayat in intau dondunguḷ; sin diábí in motaaunea tundúon kon inimu.

⁸ Intau mobijaksana in kotaauanneabí onu in aidannea, intau bodok koakaḷan in kobobodoknea.

⁹ Intau bodok in diábí mopandungmai mongo dosanea ampungan andeka diá; intau mopia in moibogbí ampungan in dosanea.

¹⁰ Ḷunganga andeka robonoḷ in gina in noinonombí kon bonu in dodob; intau ibanea in diábí moitakin mokorasa kon tua.

¹¹ Baḷoi in intau mopia umuranbí moroton; baḷoi in intau moraat in moumpagbí.

¹² Oyúon in daḷan inta koontongan in motuḻid, táe imbuitnea daḷan tatua in modiabí kon popatoi.

¹³ Kon ḻikud in kosing degá oyúonbí in ombaḷ; ḷunganga in gina oyúonbí doman in imbuitan in robonoḷ in gina.

¹⁴ Intau moraat in motarimabí doman kon bungai in aidnea moraat, intau mopia in motarimabí doman kon bungai in aidnea mopia.

¹⁵ Intau bodok in mopirisayabí kon bayongan in tosingogon, intau mobijaksana in umuranbí mokopoingat.

¹⁶ Intau mopia in umuranbí mokopoingat bo yumayú kon inta moraat, intau bodok in tumorú totok, bo mokorasa kon moaman.

¹⁷ Intau tumorú in mogaid kon inta mobodok; intau mobijaksana in mosabar.

¹⁸ Intau inta diá kopongalaman in motombodok; intau mobijaksana modugang in pandoinea.

¹⁹ Intau moraat in tumungkudbí kon intau inta motuḻid in gina, sin mopoigum sinbá totabionpa.

²⁰ Intau bogá in kodoíbí umpaka yobayatnea mita; táe intau nooyúon nobayong in yobayatnea.

²¹ Ki ine in mopoompámai kon intau ibanea, mogaid kon dosa; ki ine in mopia in gina kon intau bogá yo mosanang in ginanea.

²² Ki ine in momatuk kon inta mopia, yo pirisayaanbí bo horomaton; ki ine in monomayá kon inta moraat sia in moiḷaḻebí.

²³ Kon bayongan in totayak oyúonbí in kauntungan; ouman inta diá totuu mokopopisí kon mobiag mobogá.

²⁴ Intau mobijaksana dinayow popisí in kabijaksanaannea, intau bodok ponango-nangoian popisí in kobobodoknea.

²⁵ Aka sakusi tobatú mosingog kon totuu, yo sia in moposaḷamat kon kobiagannea; aka monguboḷ in sia; yo sia in momaḻidawan kon tumpaḷa intau.

²⁶ Intau inta motoguondok kon i Tuhan in mobiag mosanang, bo motoḷuadínea in ḷukadan.

²⁷ Motoguondok kon i Tuhan in mobaḻí pangkoi in kobiagan mopia; bo daḷan simimparut kon popatoi.

²⁸ Kokokawasa in datu noidoyon kon kobayong in rayatnea; aka diá in rayat diábí in sia motaau mongawasa.

²⁹ Intau mobijaksana diábí in sia bayá-bayá tumorú; intau bodok diá mokoigon kon ginanea.

³⁰ Gina moonow mokosehat kon awak; intoi naonda bo takit inta mokopatoi.

³¹ Ki ine in mopoaid in mopia kon intau bogá, mohoromat kon i Allahnea; ki ine in mopororiga kon intau moyangkó, mopoompámai kon i Inta nomaḻí kon inia.

³² Intau moraat moyopú popisí in aidnea moraat, intau mopia ḷukadan in aidnea inta motuḻid.

³³ Hikmat in tantúbí oyúon kon bonu in raian in intau mopia; táe diábí in sia kon gina in intau bodok.

³⁴ Aid moadil bo aid mopia mopoḻintakbí kon tangoi in bangusa, táe dosa in mokopopisí kon bangusa poompáanmai.

³⁵ Mopiabí in gina i datu kon pogawai inta mopandoi; táe torúanneabí in pogawai inta diá motaau mogaid kon oaidannea.