AMSAL 12 - Alkitab Singog In Mongondow Masa In Tanaa

¹ Intau inta motabi kon sinotaau in moibog toboḷowon; táe intau inta doí toboḷowon in intaubí inta dondunguḷ.

² Intau mopia kinosanang i Tuhan, táe intau inta monomayá kon inta moraat in motarimabí kon hukuman.

³ Diábí in tobatúmai in intau inta umuran mooyúon kon bonu in aidnea inta moraat; táe intau inta motuḻid in gina umuranbí motorindog, diábí motundan.

⁴ Buḷoi bobay inta mopia in mokosanang kon i buḷoinea ḷoḷaki, buḷoi bobay inta nokopooyámai kon i buḷoinea in naonda bo panyaki in tuḷan inta mongaratmai.

⁵ Intau motuḻid in moraibí kon onu mita inta mopia; intau moraat in monomayá kon naonda in pongonguboḷ.

⁶ Tosingogon mita in intau moraat in mokopatoi; tosingogon mita in intau motuḻid in mokosaḷamat.

⁷ Intau moraat in moḷabúbí bo moyopú takin diá in paḷotnea; táe intau mopia in umuranbí moroton modapot in adí bo ompu.

⁸ Intau dayowon podudui in kobobijaksananea; intau in singkuḻeon podudui in dondunguḷnea.

⁹ Maníka bo mobaḻí intau mointok inta oyúon in oaidan, dika in tumon intau inta moḷoben bokaka diá in kaanon.

¹⁰ Intau mopia in umuran monaridi kon bobiagonnea; táe intau moraat in mopogutúbí.

¹¹ Monononggobá inta simiḷopí in mogaid mobayong in kaanon, táe intau inta tongá mokopodait kon wakutu kon inta diá baraguna in intaubí bodok.

¹² Intau moraat moibog motayak kon kauntungan nongkon intau moromú; intau mopia in notongkaibí in pangkoi in ayop inta momungai.

¹³ Intau moraat in koakaḷan in tosingogon mita moraat inta siningognea; intau mopia kotaḻiban in roriga.

¹⁴ Batúan in intau mokouḻí kon tontuḻínea podudui in singog mita bo oaidnea; kon batúannea inogoian in boḻinea podudui in aidnea.

¹⁵ Intau dondunguḷ in diábí mokoimontanmai in monotaau kon sia in noitaḷá, táe intau mobijaksana moibog mokidongog kon tonggina.

¹⁶ Aka intau bodok kosigidan, yo kon dodaipa doman tuata bo potaaunea in nakit in ginanea; táe intau mobijaksana in diábí pandungonneamai aka potaḷáan.

¹⁷ Takin moguman kon inta totuu, intau moposindog in inta moadil; pongin monguboḷ, intau mokopoangoi kon inta diá moadil.

¹⁸ Tongá kino singo-singognea in mokotompaḻí kon gina naonda bo turakon in pitow; tosingogon mita mobijaksana in naonda bo undam inta mokopia.

¹⁹ Uboḷ in moibukábí doman kon bonu in tongá tokokiap in mata, táe tosingogon mita inta mobanar in mononoibí.

²⁰ Intau inta monomayá kon inta moraat in moibogbí in aid diá moadil; intau inta moḷongasi kon inta mopia in mosanangbí.

²¹ Intau mopia in diábí kotugatan in bodito; intau moraat in umuranbí kotugatan in yoyiga.

²² Ki Tuhan in doíbí kon intau mouboḷ; táe mopia in gina-Nea kon intau inta motuḻid in gina.

²³ Intau mobijaksana in diábí mongonguman kon sinotaaunea; intau bodok mopotaa-taau mako in kobobodoknea.

²⁴ Simiḷopí totok mokopobaḻí kon intau mokadai kon kawasa; oaid momaḷat momakisa kon intau mobaḻí bobantung.

²⁵ Ḻia-ḻiaw in gina mokoinggamá kon ibog mogaid, táe tosingogon mita mopia mokorigon kon gina.

²⁶ Intau mopia in mopia-pia in kobiagannea nongkon topodiugnea; intau moraat moiḷaḻe popisí in aidnea moraat.

²⁷ Aka momaḷat yo diábí kodapotan onu in koibog; pongin rumoriga in mogaid intau mobaḻí mooyúon.

²⁸ Intau inta dumudui kon daḷan inta noitutui in mobiagbí mosanang; intau inta dinumudui kon daḷan inta moraat mopobayá in popatoi.