AMSAL 11 - Alkitab Singog In Mongondow Masa In Tanaa

¹ Ki Tuhan in doíbí kon intau inta mopomaké in simbangan inta motombogá táe mopia in gina-Nea kon intau inta mopomaké in pononimbangan inta moitutui.

² Intau inta moḷoḷatú in singkuḻeonbí; intau inta moompá in dodia in mobijaksana.

³ Intau mopia in kapiton in aidnea tontaní inta motuḻid; intau inta moibog monguboḷ in rimumudon in uboḷnea tontaní.

⁴ Aka tumayowdon kon popatoi, yo kapunyaan in diá bidon in mangaḻenea; mosaḷamatbí in iko aka motuḻid in ginamu.

⁵ Daḷan kobiagan in intau mopia in tondodaionbí in ginanea inta motuḻid, táe intau moraat in modiabí kon awaknea mayá in korimumudan.

⁶ Intau mojujur in mosaḷamat popisí in kototuḻid in ginanea; intau inta diá motaau pirisayaan, in moiḷosok kon kototuránea.

⁷ Aka intau moraat matoi, kamangnea in matoibí domandon; mopongata in ropot tontaní in diá in mangaḻenea.

⁸ Intau mobanar in moisimparutbí kon roriga; intau moraat in moyodungkuḷbí in tongkuḷabot.

⁹ Pongongumanan in intau moraat in mokoyopú; hikmat in intau mopia in mokosaḷamat.

¹⁰ Morame in kotá aka intau mobanar in mokouḻí kon rijiki; intau mita in monggoḷokapbí aka intau moraat in matoi.

¹¹ Barakat in intau motuḻid in gina mokogaga kon kotá; tosingogon in intau moraat mokogoguyaat kon inia.

¹² Moningkuḻe kon intau ibanea in oaidbí inta dondunguḷ; intau inta mopandoi, diábí mosingog kon onuka.

¹³ Intau inta moibo-ibog mopotaau in habar diá totuu diábí mokotagú kon rahasia, táe intau inta motaau pirisayaan motaaubí mobuni kon pelekara.

¹⁴ Bangusa in morimumudbí aka diá in duduianmai; aka mobarong in monononggina, dá modugangdon koḷukadan in kasaḷamatan.

¹⁵ Modandi moguboḻi kon boḻi in intau ibanea mangaḻenea mopoangoi in bodito; mopia-piabí kon diá moitakin kon natua mita sinbá moaman.

¹⁶ Bobay inta mopia in gina mokouḻíbí kon kahoromatan, intau moromú in mosipun kon kaoyúonan.

¹⁷ Intau inta mopia in gina in modiabí kon kauntungan kon inia tontaní; intau inta moromú in mokoporugimaibí kon inia tontaní.

¹⁸ Kauntungan in intau moraat in kauntunganbí inta diá in mangaḻenea, kauntungan in intau inta nogaid kon inta mopia in kauntungan inta moḷoben in mangaḻenea.

¹⁹ Ki ine in umuran mosatia mogaid kon inta mopia, in mokouḻíbí kon kobiagan mosanang; ki ine in diá umukat kon aid moraat yo mopobayá in popatoi.

²⁰ Ki Tuhan in doíbí kon intau inta gina moraat, táe Sia in motabibí kon intau inta nobiag diá in bogit.

²¹ Intau moraat in notantú bidon kon hukumon; intau mopia in mosaḷamatbí.

²² Koḷunat in bobay inta diá mopia notongkai in sising buḷawan kon tunggi in boké.

²³ Onu in koibog in intau mopia umuranbí mokopoangoi kon inta mopia, táe inta motaau harapon mako in intau moraat in tongábí tumorú.

²⁴ Oyúon in intau moibog mobogoi, táe modugangbí mooyúon, oyúon in morinut, táe modugang mobiag mobogá.

²⁵ Intau inta mokakit mobogoi in umuranbí mobarong in kaoyúonannea, intau inta moibog motuḷung in tuḷunganbí doman.

²⁶ Ki ine in momontuyung in odi-odianmai in intau, táe intau inta mopotaḷui intua yo sia tua in dayowonbí.

²⁷ Ki ine in morajing mogaid kon inta mopia kinosanang in intau; ki ine in motayak kon inta moraat, in koantuganbí in roriga.

²⁸ Ki ine in mopongata in kaoyúonan in mototakbí naonda bo dáun noingkag; intau inta mobanar in modugangbí mobayong naonda bo tokat moguod

²⁹ Intau inta moposusamai in tonibuḷoinea, in kobuḻianbí in bayongan yagi-yagi. Intau bodok in mobantungbí kon intau inta mobijaksana.

³⁰ Intau inta mobiag motoindudui in kinoḷukadan bidon in kobiagannea; intau inta mobijaksana modugang in dumoduduinea.

³¹ Aka kon dunia naa bo intau mopia in mokouḻí kon tontuḻínea, yo notantú bidon kon intau moraat bo binaradosa in mokouḻíbí kon hukuman.