AMSAL 1 - Alkitab Singog In Mongondow Masa In Tanaa

Makusud in tonggina mita i Salomo

¹ Naa in tonggina mita i Salomo ki adí ḷoḷaki i Daud, datu in Israel.

² Makusudnea in motuḷungbí kon intau sinbá monotaau kon naonda in mobaḻí mobijaksana, bo monotaau in atorang kon naonda in kobobiag bo monotaau kon tosingogon mita inta modaḷom in mangaḻenea.

³ Tonggina mita tanaa in motundú kon naonda sinbá intau mobiag mobijaksana, mojujur, moadil bo mobanar.

⁴ Intau inta diá kopongalaman in tundúonnea dá mopandoidon morai, bo intau inta moguodpa in mobaḻídon intau mopandoi bo pororainea in nádon onda bo intau inta ain nogurang.

⁵ Pongin tonggina mita tanaa intau mobijaksana in modugang doman in totaaunea, bo intau inta ain notaau in kapiton doman.

⁶ Pongin natua dá mosia in monotaaudon kon onu inta noibunipa kon bonu in tonggina bo monotaaudon kon tosingogon mita in intau mobijaksana bo onu mita inta pinoyaput monia.

Tonggina kon intau mita inta mobagupa

⁷ Sinbá mokouḻí kon pongotahuan inta mopia, yo muna-munamai intau in musti mohoromat bo motoguondok kon i Tuhan. Intau bodok in diábí mohoromat kon hikmat bo doí tundúon.

⁸ Tondudutka in onu inta pinoguman i amá bo i inámu kon inimu, adíku,

⁹ sin totundú mita monia in mokodugang kon kopopia in dodiamu naonda bo ḷambá in uḷu bo boboḷ inta mokodugang kon koḷoḷunatmu.

¹⁰ Aka intau binaradosa monongganut kon inimu, adíku, dikabí duduianmu in tongganut monia.

¹¹ Aka mosia in moguman, “Koḻigai, kita motayak kon intau bo ḻibutan naton bongkugon. Tongábí yambá, dá koḻigai in kita momongkug kon intau inta diá kotaḷá.

¹² Tanaa in mosia mobiag mosanang bo mosehat, táe kon singgai moiduduimai mosia in mobaḻíbí naonda bo intau inta mororiga totok.

¹³ Gamáan naton in pakakat mita monia inta koboḻi, sinbá baḷoi naton mopuḻing in pakakat mita inagow.

¹⁴ Igai tumakin! Bain silaion naton kotongkaion onu inta sinakow!”

¹⁵ Dikabí dumudui kon intau mita natua, adíku! Pokoyayúdon kon i monia.

¹⁶ Diábí mosanang in gina monia, aka diápa mogaid kon inta moraat. Ibogon monia in ḷagibí moḻimod.

¹⁷ Sin umpakabí ḷagapan yo doíbí in dumangat kon bonu in pukot inta ain sinongká kon tayowonnea,

¹⁸ táe intau mita inta moraat tatua in motaan kon potait kon i monia tontaní – potait inta mokobodito kon i monia.

¹⁹ Totuu, intau inta motayak kon pakéon pongin aid inta moraat, yo nyawaneabí tontaní in toḻiunea.

Singog in hikmat

²⁰ Indongogaidon! Hikmat in mogoiní kon daḷan-daḷannea bo momaḷú kon rawang mita!

²¹ Sia in momaḷú kon bonawang mita bo kon tampat mita inta morame:

²² “Ei intau dondunguḷ! Modapot in toonu in moiko umuran natua? Toonu in mogogai in moiko in mopoompámai kon pongotahuan bo doí motarima kon topotundú?

²³ Indongogai in akuoi aka monoboḷow kon inimu, sinbá poniataku kon inimu onu inta kon bonu in ginaku bo tundúonku onu inta sinotaauku.

²⁴ Moiko in inoiníkudon, táe doí mokidongog in moiko bo diá mopandungmai.

²⁵ Bayongan in tongginaku in diábí inindongogan monimu bo toboḷowku in diábí inabatan monimu.

²⁶ Tuamai, aka moiko mobodito, yo kosingankubí. Aka moiko moondok, yo singkuḻeonkubí.

²⁷ Singkuḻeonku in moiko aka moḻia-ḻiaw in gina monimu bo mororiga popisí in kinoantugan in bodito inta namangoi naonda bo deḷang.

²⁸ Kon dodai intua moiko in mokuani kon inakó, táe doí in akuoi tumubag. Tayakon magí-mako monimu in akuoi táe diábí mouḻí monimu.

²⁹ Moiko in naonda bo intau inta diápa nokoimontanmai in moibog motayak kon sinotaau, bo doí dumudui kon i Tuhan.

³⁰ Moiko in diábí kon dodai in onda in moibog motarima kon tongginaku mita andeka moindoimai kon toboḷowku mita.

³¹ Tuamai, korasaanbí monimu in bungai in aidmu mita bo tomayámu mita inta moraat.

³² Intau inta diá kopongalaman in matoibí popisí in doí motarima kon inakó, bo intau inta bodok in morimumudbí popisí in doí mopandungmai kon inakó.

³³ Táe intau inta mokidongog kon inakó in koḷukadanbí. Sia in mobiagbí moaman bo diá bidon moondok.”