AMOS 9 - Alkitab Singog In Mongondow Masa In Tanaa

Oontongon soaḷ hukuman nongkon i Tuhan

¹ Akuoi in nokoontong kon ki Tuhan in sinimindog kon diug in mezbah. Sia in nomarenta nanaa, “Bongkugdon koropot totok in ubung mita in oigi in Baḷoi-Ku sinbá bayongan in dangkuḷonnea modandú. Popoumpagdon in oigi mita tatua kon intau mita. Mosia inta diá matoi in ḻimodon-Ku kon poparangan. Diábí tobatúmai in intau in mokoḷagui, diábí tobatúmai in moipaḷuput.

² Umpakabí mosia tumuot kon dunia in intau minatoi, singkapon-Kubí in mosia. Umpakabí moponik kon ḷangit, poponagon-Kubí in mosia nongkon tua.

³ Aka mogadop in mosia kon tudu in Buḷud Karmel, tayakon-Kubí bo domokon in mosia. Aka mogadop in mosia kon apad in dagat, yo potabá-Kubí in naga in dagat sin monumbaḷ kon i monia.

⁴ Aka mosia dakopon in musung, yo pokiḻimod-Kubí in mosia. Niaton-Kubí yompaton in mosia, bo diábí in motuḷung kon i monia.”

⁵ Butá modandú bo intaunea in monogumatoi, popisí in iḻiai i Tuhan Inta Totok in moḷantud bo Inta Totok in mokawasa. Naonda bo Ongkag in Nil moponik bo moponag natua doman in mosia moponik bodongka moḷabú.

⁶ Ki Tuhan in moposindog in baḷoi-Nea moyayú kon toḷungayá, kon tudu in butá pinosindog-Nea in ḷangit nobaḻí kubah, bo tubig nongkon dagat pinopobutak-Nea kon toba, inta nogaid kon tua mita tangoi-Nea in ki Tuhan!

⁷ Ki Tuhan in noguman, “Ei umat in Israel, Akuoi in nonaridimai kon intau in Sudan ná pinononaridi-Kumai kon i monimu. Akuoi in nodiadon kon intau in Pilistin nongkon Kreta bo intau in Siria nongkon Kir ná pinododia-Ku kon i monimu nongkon Mesir.

⁸ Akuoi, ki Tuhan Inta Totok in moḷantud, monaridimai kon dodatuan in Israel inta binaradosa tanaa, bo inggamáan-Kubí nongkon tudu in butá naa. Táe buí i Yakub in diábí modait-Ku yopúon. Akuoi, ki Tuhan, ain nosingog.

⁹ Akuoi in momarentabí bo moguab kon bangusa in Israel naonda bo intau moguab kon gandum kon bonu in digu. Sin moḷumbú kon bayongan inta diá in mangaḻenea kon sigad monia, Poyotombaukon-Kubí in mosia kon yua-yuak in bangusa mita.

¹⁰ Intau mita binaradosa kon sigad in umat-Ku in mogumanbí, ‘Ki Allah in diábí mopomayá mako kon i naton koantugan in bodito.’ Táe, totuubí kon mosia tua in ḻimodonbí kon poparangan.”

Israel in bui tompiaan

¹¹ Ki Tuhan in noguman, “Moiangoibí in wakutunea Akuoi monompia bui kon dodatuan i Daud. Tanaa dodatuan tatua in nobaḻídon naonda bo baḷoi inta noumpag. Táe dindingnea mita in tompiaan-Kubí bui bo posindogon-Ku bui dá mobaḻídon bui ná dungkuḷmai.

¹² Intau in Israel in mongawasabí kon butá in Edom inta oyúonpa takin bayongan in bangusa inta dungkuḷmai kapunyaan-Ku. Akuoi ki Tuhan, ain nosingog bo Akuoi in mopobayábí intua.”

¹³ Ki Tuhan in noguman, “Moiangoibí in wakutunea gandum in mobiag totuu moḻikat dá singgai ponoḻisían kon bungai in boyó diádon mobonto-bontow. Pangkoi in anggur in mobiagbí ḷagi totok in moḷoben dá intau in tantúdon momia kon tubig in anggur. Tubig in anggur in mototuyú nongkon buḷud mita bo moiḻig nongkon tombuḷud mita.

¹⁴ Baḻíon-Kubí in umat-Ku Israel mobiag motomoman bui. Mosia in buibí moposindog in kotá mita monia inta ain noumpag, bo mogutundon in mosia kon tua. Mosia in buibí momuḷa kon gobá mita in anggur, bo monginum kon anggurnea. Mosia in monompinomuḷa, bo mokaan kon bungai in boyónea.

¹⁵ Popoutun-Kubí in umat-Ku kon butá inta ain inogoi-Ku kon i monia. Mosia in diá bidon rabuton nongkon tua. Akuoi ki Tuhan Allah monia ain nosingog.”