AMOS 5 - Alkitab Singog In Mongondow Masa In Tanaa

Tongganut tumobat

¹ Indongogaidon ei umat in Israel! Akuoi in mopodondongdon in kon inimu in tobatú dondong pinatoian:

² Noḷabúdon in Israel inta diápa siniugan, sia in diádon sinimindog bui! Kon tudu in butánea tontaní pinomayádon mako in sia, diá in notuḷung kon inia simindog.

³ Ki Tuhan Inta Totok in moḷantud in noguman, “Kotá tobatú kon Israel in nopotabádon in tontaranea toribu, táe inta noibuimai in dongkadon mogatut; kotá ibanea in nopotabá in mogatut intau, bo noibui in dongkadon mopuḷú.”

⁴ Ki Tuhan in noguman kon intau in Israel, “Pobuidon mangoi kon i-Nakó, dá mobiagbí in moiko.

⁵ Dika mayá in Bersyeba sin moibada. Dika motayak kon i-Nakó kon Betel, sin Betel in moinggamábí. Dika doman mayá in Gilgal, sin intau kon kotá tatua in akutonbí pobayá in poḷumbúan.”

⁶ Pobuidon mangoi kon i Tuhan, dá moiko in mobiagbí. Aka moiko mobui mangoi kon i-Nia, Sia in mamangoibí naonda bo tuḷú inta ḷumekep bo momagong kon bayongan intau in Israel. Kon Betel diábí tobatúmai in intau in mokopiong kon tuḷú tatua.

⁷ Moboditodon in moiko, moiko inta mopoyotuuy kon inta moadil bo mogagow kon hak in intau!

⁸ Ki Tuhanbí inta nomia kon tundi mita kon toḷungayá – tundi Belantik bo tundi Kartika. Sia in nomaḷui kon sindip nobaḻí bayag bo singgai nobaḻí doḷom; tubig nongkon dagat pinobutak-Nea kon toba. Inta nogaid kon tua mita tangoi-Nea in ki Tuhan.

⁹ Sia in noyopú kon intau inta nongawasa takin pinoḷukadan monia.

¹⁰ Moiko in doí kon intau inta monayow kon inta diá moadil bo inta mosingog kon totuu kon bonu in pongadilan.

¹¹ Moiko in mondorot kon intau bogá bo gandumnea in agowon monimu. Tuamai in moiko in diábí mogutun kon bonu in baḷoimu mita inta totok in mopia, inta ain pinosindog monimu tatua. Moiko in diábí monginum kon anggur mita nongkon gobá mita in anggur inta pinomuḷa monimu.

¹² Kinotaauan-Ku kon totuudon moḷoben in aidmu moraat bo totuu mobayong in dosamu. Moiko in mondorot kon intau mopia; moiko in motarima kon sogó inta mopomayá mako kon intau bogá inta pinopoaidan in intau diá moadil kon pongadilan.

¹³ Popisí in aidmu tatua, dá intau mita inta mobijaksana mokorasa kon mopia-piabí kon kibio-biómai kon sempo inta moraat ná tatua.

¹⁴ Poḷongasidon pogaid kon inta mopia bo dikabí in moraat, sinbá moiko in mobiag. Dá ki Tuhan Inta Totok in Mokawasa in totu-totuudon mogutun kon sigad monimu ná inta pinoguman monimu.

¹⁵ Kodoídon in inta moraat, kotabidon inta mopia, bo posindogdon in inta moadil. Dika-dika bo ki Tuhan in motabidon kon intau mita inta kiagatneapa nongkon bangusa in Israel.

¹⁶ Ki Tuhan Inta Totok in Mokawasa in noguman, “Kon daḷan mita in kotá intau in moguang bo mogamui popisí in morobonoḷ in gina. Nodapot in monononggobá mita in tokooiníon sin tumakin mongombaḷ moyotakin in intau mita inta sinokouboḻian moguang kon intau minatoi.

¹⁷ Kon bayongan gobá in anggur, intau in moguangbí popisí in Akuoi in mamangoi bo mohukum kon i monimu. Akuoi, ki Tuhan, ain nosingog.”

¹⁸ Totuu kon moboditobí in moiko inta mokotanob kon singgai i Tuhan! Onubí in mangaḻenea in singgai tatua kon inimu? Singgai tatua in tongábí nobaḻí singgai inta mosindip, deemanbí singgai inta mobayag kon inimu.

¹⁹ Kaadaannea in naonda bo intau inta noḷagui kon singa, táe noyodungkuḷ in beruang. Andeka naonda bo intau inta nobui kon baḷoi bo nopotungkud in ḻimanea kon dinding, bo sinobak in uḷag!

²⁰ Singgai i Tuhan in totuubí kon mokopoangoi kon sindip, deemanbí bayag – singgai nonggoḷom inta diá nonindar.

²¹ Ki Tuhan in noguman, “Akuoi in doíbí bo mototuka in mokoontong kon bobutungan mita in agamamu!

²² Aka moiko modia kon kuruban payongon bo kuruban gandum, diábí tarimaan-Ku. Akuoi in doíbí motarima kon bobiagonmu mita inta nongoḷomumu tua inta pinosumbamu kon i-Nakó saḷaku kuruban dodamean.

²³ Gogaiaidon in dondongmu mita inta mokobinim-biní tua; Akuoi in doíbí mokidongog kon pogogitoganmu kon kecapi.

²⁴ Mopia-piabí kon poḷongasi sinbá kooadil in moiḻig naonda bo tubig, bo kojojujur naonda bo ongkag inta diá moingka-ingkag.

²⁵ Ei umat in Israel, kon tungkuḷ in Akuoi nodia kon i monimu nongin padang gurun opat nopuḷú notaong in koonggotnea, Akuoi in diábí noigum kon sosumba bo kuruban nongkon i monimu.

²⁶ Táe tanaa moiko in nosumba kon Sakut inta inanggap monimu datumu tatua, bo Kewan, tundi inta sinumba monimu tua. Tuamai in patong mita inta ain pinomia monimu tua in musti akuton monimu tontaní.

²⁷ Kon tungkuḷ in ḷumbúon-Ku in moiko kon butá tobatú inta noyayú nongkon Damsyik. Akuoi ki Tuhan inta tangoi-Ku ki Allah Inta Totok in mokawasa ain nosingog.”