AMOS 3 - Alkitab Singog In Mongondow Masa In Tanaa

¹ Indongogaidon in koyow i Tuhan tanaa, ei bangusa in Israel inta ain dinia i Tuhan iḻumuai nongkon Mesir! Ki Tuhan in noguman,

² “Nongkon bayongan in bangusa kon dunia, tongábí moiko totobatú nion inta bangusa inta kinotaauan-Ku bo inta inindoian-Kumai. Tuamai in moḷoben in dosamu, bo notantúbí kon hukumon-Ku in moiko.”

Oaidan in nabi

³ Degá oyúon in intau doyowa in mayá moyotakin táe diá moyosingog muna?

⁴ Degá moganggor in singa kon kayuon, aka diápa in sia mokouḻí kon kaanonnea? Degá moganggor in singa kon bonu in bubúnea aka diápa in sia mokoaḷap kon onu bo onu?

⁵ Degá moibaaḷ in ḷagapan, aka giman bo diápa taanon? Moitaḷob degá in poyogaḷap aka diá in moibaaḷ?

⁶ Degá diá mourot in intau kon kotá aka mokodongog kon singog in torompet tomponuot in parang? Degá kotá tobatú kotugatan in bodito, aka diá potabá mangoi i Tuhan intua?

⁷ Ki Tuhan Inta Totok in moḷantud in diábí kon dodai in onda in mogaid kon oaidan-Nea aka diápa muna moponiata in tomayá-Nea kon nabi mita, mogogundoi-Nea.

⁸ Aka singa bo moganggor, yo ki inebí in diá moondok? Aka ki Tuhan Inta totok in moḷantud bo mosingog, yo ki inebí in tongá kibio-biómai bo diá mopotaau-taau mako in koyow-Nea?

Korimumudan in Samaria

⁹ Potaaudon in naa kon intau mita inta nogutun kon komaḻig in Mesir bo Asdod, “Poyosipundon kon buḷud mita kon diugmai in Samaria, bo indoiaidon in kotombaukan moḷoben bo pogagowan inta nobaḻí kon tua.”

¹⁰ Ki Tuhan in noguman, “Intau mita tatua nomonu kon komaḻig monia in pakakat mita inta inagow takin aid moḻingá. Nodapot in mosia totokbí in diá mojujur.

¹¹ Tuamai in butá monia in kopungonbí in musung, poḷoḷukadan monia irimumud, bo komaḻig mita monia inagow.

¹² Naonda bo gombala tobatú inta tongádon nokouḻí bui kon doyowa nosimpaḷ in sioḷ andeka bongoḷan tobatú in dombanea inta ain dinomok in singa, natua doman tongábí topiḻik in kotaḷáan in intau in Samaria inta tanaa pia-pia mako in mosiug kon tosiugannea inta mopia.”

¹³ Ki Tuhan Inta Totok in mokawasa bo Inta Totok in moḷantud in noguman, “Taridiaidon in tanaa, bo ogoiaidon in tompoingat in buí i Yakub.

¹⁴ Kon singgai hukumon-Ku in intau in Israel popisí in dosanea, yopúon-Kubí in mezbahnea mita kon Betel. Batúan in mezbah putoḷanbí in ubungnea mita dá moḷabú kon butá.

¹⁵ Baḷoi mita inta pakéon kon sempo in tumping bo baḷoi mita pogogogaian kon sempo in pononinggai in rimumudon-Kubí. Baḷoi mita inta iḷambáan in uwaḷa in gajah in moumpag; bayongan in baḷoi moḷoben in morimumud.