AMOS 2 - Alkitab Singog In Mongondow Masa In Tanaa

Moab

¹ Ki Tuhan in noguman, “Intau mita in Moab ain nopobui-buimaidon in binaradosa, tuamai in notantú bidon kon hukumon-Ku in mosia. Mosia in noningkuḻe kon i datu in Edom inta ain minatoi tatua, pinongin nongokai kon pinoḷobongan kon inia poḷat nogamá kon tuḷannea mita bo sinubá nobaḻí ḷobud.

² Tuamai, potabá-Kubí mangoi in tuḷú kon butá in Moab, bo momokak kon bayongan in benteng in Keriot. Intau in Moab in matoibí kon yua-yuak in dowawá in parang, kon tungkuḷ in torompet inirup, bo kokow in parang pinokokowdon.

³ Pongawasa in Moab bo bayongan in pojabat in pomarentanea in ḻimodon-Kubí.”

Yohuda

⁴ Ki Tuhan in noguman, “Intau in Yohuda ain nopobui-buimai binaradosa, tuamai in notantú bidon kon hukumon-Ku in mosia. Mosia in iḻimimpatdon kon parenta-Ku mita bo doí nopandungmai kon totundú-Ku mita. Mosia in pinoḷangkam in ilah mita ibanea inta sinumba in mogoguyang monia.

⁵ Tuamai, potabá-Kubí mangoi in tuḷú kon Yohuda bo momokak kon bayongan in benteng in Yerusalem.”

Hukuman i Allah kon Israel

⁶ Ki Tuhan in noguman, “Intau in Israel ain nopobui-buimai binaradosa, tuamai in notantú bidon kon hukumon-Ku in mosia. Intau mojujur inta diá mokopobui kon iḷuanannea, ain pinotaḷui monia nobaḻí ata. Natua doman in aid monia kon intau nobiag nobogá inta diá nokouboḻi kon boḻinea, umpaka boḻinea tatua tongá ná boḻi in aip in sioḷ togapang.

⁷ Mosia in nondorot kon intau moyangkó inta diá mokopongonu bo moposí in intau nobogá. Ki ata monia bobay tobatú in siniugandon i amánea bo i adínea ḷoḷaki, dá nokokotordon kon tangoi-Ku inta motusi.

⁸ Kon batúan in pooibadaan, intau mita in mosiug takin mopogiḷambung in ḷambung inta ginamá monia saḷaku tontagú in boboḻian in intau bogá. Kon Baḷoi i Allah monia, mosia in nonginum kon anggur inta ginamá monia nongkon intau inta koboḻi kon i monia.

⁹ Umpaka natua, ei umat-Ku, kon i monimubí Akuoi in noyompat kon intau in Amori inta moḷantud ná pangkoi in ḷokuyú bo moropot naonda bo pangkoi in terpentin.

¹⁰ Moiko in dinia-Kudon iḻumuai nongkon Mesir, bo dinia-Ku nongin rawang in bungaion opat nopuḷú notaong in koonggotnea. Butá in intau in Amori ain inogoi-Ku kon inimu nobaḻí butámu tontaní.

¹¹ Akuoi in nomiḻídon kon tongonumai in adímu mita sin mobaḻí nabi, bo tongonumai in tayowmobiagmu sin mobaḻí intau Nazir. Totuubí intua, ei intau mita in Israel? Akuoi, ki Tuhan ain nosingog.

¹² Táe pinoinum monimu in anggur in intau Nazir, dá nonoḻikud in mosia kon dandi monia. Bo diá inogoi monimu in nabi mita mopotaau in koyow-Ku.

¹³ Tanaa doroton-Ku in moiko modapot in butá, dá kumarak in moiko naonda bo kereta inta nopuḻing in gandum.

¹⁴ Umpaka intau inta totok in moḻikat yo diábí doman mokoḷagui; intau moropot in kobuḻianbí in ropotnea, bo intau motorindog in diábí mokoposaḷamat kon awaknea tontaní.

¹⁵ Momomiot in diábí mokotongod, mororibatuk moḻikat diábí mokoḷagui, bo inta sinumakoi kon kabaḷo in diábí mosaḷamat.

¹⁶ Kon singgai tatua umpaka tontara inta totok in mobarani yo monaḷábímai kon ḷoḷutamnea, bo moḷagui. Akuoi ki Tuhan ain nosingog.”