ZEFANYA 3 - Allah Wene Fano Wene Hupla Inane

Yerusalem unggum oba fesikhesigen telhikhe wene

¹ O kota Yerusalem hebak inafe asu hak mene Tuhan ane sagalogo fuluk weak hilingitik, nen afuni o andoma werek mene inoba enggin-fenggin fisugu welagik agarek awi andi re, homan ugu mondok logouwak!

² O kota Tuhan oba eberek logouwageluk yagaisugunem ane wanhi'lek hilingiri'lagwi mene inom, At awene lenggalek oba yagaisugunem futfigi'lek hilingitarek mene inom, nen inebe faget At enggiba figi'lek hilingiri'lagwi mene inom, nen Aren lebetninabuageluk kino yagari'lagwi lek mene inom andoma re mondogat alomat lakhoago.

³ It ap o andiba yi kain ti kain werek mene re mene singa ngin eterek hak hilingitarek inap werek. Nen, it ap Hakim wene higithogo tegetarek inap andoma re no serigala nen nunggu mene nele welerogo logolik hilingiterek hak, iren oak misik iluk ogo hobit nunggu mene iluk ekhe fagarek lek.

⁴ It nabi re yabu iren hilingitarek hakhogo hilingiri'lagwi lek, nen, it inane eberogo mene ili'lagwi iluk angga lek hak, nen it imam mene re Tuhan obaget enogo fugu mene omanogo emetfuluk he, it inonggwarek sumburogo helugu mene faget Allah wene melalek omanogo agaum-fagaum isagarek inap werek.

⁵ Oba nen he At Tuhan ebe o kota andiba werek. Aren he mondok fano mene nek hilingiri'lago, nen, weak mene ekhe hilingiri'lago lek. O hubet hundik-handik he Aren againafuri inoba higithogo nek hilingfisili'lago. Oba nen he, it afuni o kota andiba higithogo hilingitu aple inonggot mene re inenggali higi'lek weak mene nek hilingitu welagaikharek andi.

⁶ Tuhan nen ikhi logolik, ”An nen afuni inunggulenu hokhorogo mondogat legetfisigi. Nen, it inawi kota omanogo re An nen mondogat wolelenggenhogo lakfisigi, it inaiba inaleget pa'leget himbirengge waganek mene inom nen helep wurogo liabek mene inom he, An nen inawi meisalek enek hilingfisigi. It inawi kota re afuni inebe le'ma re, inareng tiring-terenghogo hilingik, nen ebekhe kwe ogo afuni inelokhe mondok lek.

⁷ A'nogo hilingi'mo re An nen ebethikhi logolik, ”Yogondak he, An nagainafuri nen An nebe esinet nobagaluk legeisogo nobagakhi logolik An nen wenagisikhi lagi mene omanogo eberogo nen fut fili'lagwi,” iluk anggikhi lagi. Enggere, An nen it inelu asuageluk yagaisikhi lagi mene omanogo eberek werek logou hak. Oba nen he, iren attak weak hilingiti lagaukwa mene re endep hak meneba nen, weak ekhe inom inomamerogo hilingirik lagunem isikhi lagi.

⁸ Oba nen he hinelurogo! An nebe menlasimbik hinabusakwe sagal-fagal hinabigin sambul andi yerogo logoni. An nen anggikhi logolik yi afuni ti afuni inuggulenu lombok inom o kerajaan andoma inom andoget fisambik, An anini a'nogo it inoba kweisaligiluk hilingiti lagi. Ma re, o kweangma yoma mondogat he An nanini nen endu fasigin mene a'nogoba endu nagain.

⁹ Iluk a'nogo anggasigiba nen he, An nen it afuni inunggulenu lombok andoma inendawinggen hebel fisamo re, iren An noba nek samban ikhi logogun. Nen, kembu ilah amu mene oba ekhe ikhi logogun lek. It afuni inunggulenu andoma mondogaren he, An nobaget enek hilingiti logogun.

¹⁰ Nen, o Sudan yatma andoma oba nen ogore, An nagainafuri re nalek-falek welagaikharek.

¹¹ Yago nagainafuri e, andem sambul he hiren An nane sagalogo fuluk hilingiti logogun andiba An noba hinenggalirogo hilingiti logogun lego. Afuni winik-wonok agarek mene inom, inendawimo legeisogo fakhagarek mene inom he, An nen mugisogo wulakfisagain o. Hiren he, An nandom mondok hore'ma andoma nen An nane sagalogo fuluk ekhe hilingiti logogun lego.

¹² O andoma re, afuni inunggulenu ekhe inedawimo sebelfakhaluk An nen lebetninabuageluk hilingitarek mene nek he o andoma femhogo logouwageluk herakfisagain. It enek he o andoma higit logogun.

¹³ Nen, it afuni Israel mene o andoma inebe endebengge logogun mene re, iren afuni ekhe inoba iluk ogo weak inoba figik, ineranhogo wene yagaisigik, inane nen lalinafik ikhi logogun mondok lek. It he inangge yi mene ti mene sik-pikhogo were'ma inoba fanorogo nek logogun, nen iren afuni inoba ekhe inailoti logogun lek,” iluk, ikhe isikhe.

Wuni inagaiyekhogo watarek awuni

¹⁴ Yago, hit afuni Israel mene re hinagaiyegeti logolik wuni wati logoni o! Hit Yesusalem hinap he, hinendawimo nen mondogat hinagaiyegeti logoni!

¹⁵ Tuhan nen he, hit hinaselei mene felelenghogo mugisogo wulakfisikhi logolik, hit hinoba unggum wokhisagain iluk mene a'nogo herakfisikhe o. Hit inebe re afuni Israel mene hineisena Raja a'nogo awe a'ma fethinarek werek, At Tuhan onggwaregen hilinghinobagaikhemo re, Yogondak hiren hinailoti lagep mene a'nogo hinailoti logou fugo.

¹⁶ Inenggi ekhe asi wesigin sambul he hobuk it afuni nen ikhi logolik, ”Yago, hit Yerusalem mene yi, hinendawimo youk uluk hinailosu fugo.

¹⁷ Hit he, hineisena Tuhan Allah Omame Mondok Hokho mene a'nogo nen awe a'ma hinobagaluk fethinarek werek. Hit he At omameba hinomame aga lagep. Hit hinobaget he Tuhan endawimo agaiyege'luk hai hili'lago, At endawi hundik oba re, hit hineluk ket mene logouwageluk hiling-hinobagali'logo.

¹⁸ Hit hinobaget Aren he, afuni seni isati logolik hilingitarek hak, wuni agaiyegoba wari'lago. Tuhan nen ikhi logolik, ”Enggin fenggin hit hinoba asi weri'lago mene andoma An nen waganogo herakfisagain o. Nen, it ekhe nen at andi re yiginik-tiginik iluk weaget hinobagali'lagwi mene andoma re An nen horogo herakfisagain.

¹⁹ O andi asi wesigin sambul andiba re, afuni nen sebelhinarek logolik werek mene andi re An nen weagarogo fisagain, nen, ap ineisok wut warek mene re An nen inagap telogo fisagain, afuni hele warogo lakfisasukwa mene re An nen lologo woginarek hobuk fisa wesigin. It inomame leget fisugunem werek mene andoma An nen agamhogo re inelokhe heanerogo hilingfisagain, o yi kwe ti kwe nen inom, o kweangma yoma mondogaren inomen ogore, it andi re legeisogo fisigik, fogetfisigik, ugun.

²⁰ O ekhe asi wesigin meneba re, afuni hit mene o ekhema-ekhema sagarek welagaikharek mene andoma An nen hondoginarek fisa wesigin. Hit he, o kweangma yoma fano logobagaigen he An nen hinenu werek hilingisogo hinobagagin, Nen hit hinangge yi mene ti mene oba heilarogo welagagip mene omanogo re, An nen hobuk ambotkwe sik-pikhogo logobagaigiluk hilingisogo hinobagagin aro,” iluk Tuhan nen ikhe o, iluk isikhe.