ZEFANYA 1 - Allah Wene Fano Wene Hupla Inane

¹ At Zefanya andi ebere hun Kusyi amlogo welagaikhe. Nen at ta'lagaikhe mene andi ambu omba eroba nen ambisang fikhit ta'larik wagaukwa mene re yi'nogo: Kusyi, Gedalya, Amazia, nen at Amazia eisena re raja Hizkia andi. Nen, at Zefanya re raja Yosia hun Amon amlogo a'nogo afuni Yehuda mene ferinarek were'ma Tuhan nen wene yi'nogo yagaisano, iluk yagatikhe mene re yi.

Tuhan awi wene inoba fagain oba arat asi waga o iluk isikhe wene

² Tuhan nen ikhi logolik he, ”An nen yi mene ti mene o kweangma werek menere mondogat legetfagain,

³ a'nogo legetfisikhi logolik he afuni inebe inom yi mene ti mene eluk logolik leberi'lago mene andoma inom, sue inom, ikan inom, andoma mondogat legetfisagain. An nebe Tuhan nen ikhi laginggere, ap misik iluk ogo ekhe eluk herakfigi'lek afuni mondogat An nen legetfisagain o.

⁴ An nen he afuni Yehuda mene inom Yerusalem mene inom mondogat wene inoba fagain. It inanggembu Baal faget fogeratarekwe andoma werek mene re o andomaba nen An nen mondogat legetfisagain. Nen it ap hilingiri'lagwi mene andoma re a'nogo welagaukwa iluk ekhe eberisikhi logogun mondok lek.

⁵ Afuni ekhe nen o tum oba lagaluk mo inom hesagalenggen inom apne wanugun iluk lagagarek mene andoma re An nen mondogat nenggi sabul horogo herakfisagain. Nen, ekhe it afuni nen An napne wanhik, tiphogo hilingiti logogin iluk inane hombuk palhik, ikhi logolik oba nen iren kembu dewa Milkom enu igisogo hombuk palharek mene andoma re An nen mondogat legetfisagain aro.

⁶ It afuni an nambit wagi'legengge nen, An noba, ’Yi'nogo yaganisoageluk’ kino yaganeti legengge hilingitik, An nombo'ne lagi'legengge hera'nobagaluk lagik, agarek mene andoma re An nen mondogat legetfisagain o,” iluk yagaisasikhe.

⁷ Tuhan nen he At againafuri omanogo afuni nen wam warogo foukhogo hilingitarek hak it hele warogo inoasigin iluk fik-fougeti logolik he, it Yehuda mene inaselei mene ogore inayonggo fikheat. Nen linggene Tuhan awi andi sambul hilingisigin oba andi re mondogat horogasi waga. Linggene andi sambul he At Allah ebe nenat hilingisigin enggere, At awe a'ma andoma hinabolok legat logoni.

⁸ Tuhan nen ikhi logolik, ”Linggene inoasigin oba andi re, An nen afuni inogogwi kaindek-kaindek omanogo inom, nen it ap raja inagainafuri inom, nen it ap pok mene andoma nen it inawene holfuluk hilingitarek mene andoma inom, unggum inoba fagain o.

⁹ Nen afuni An inonggot mene nen hilingitarek hakhogo An nobaget a'nogo hilingitarek mene inom, nen it inogogwi inailoba andoma yi mene ti mene hugul wanharek mene omanogoba hoporasugun iluk inangge hinatik, inebe inoatik, hilingitarek mene andoma re An nen unggum inoba fagain enego,” iluk ikhe.

¹⁰ Tuhan nen ikhi logolik, ”Linggene andi sambul he, o enu Gerbang Ikan iluk enu salogo werek oba andoma nen le asugun mene inesanggo holugun. Nen, afuni le arik kugu mene re o sili ket halogo kugun oba andoma nen holugun, nen o wurik meisalhigik pugu mene abolok he mondok hokhorogo hilingitunem o tom-tomkwe andoma tung-tung ilaga logogin.

¹¹ Yago, hit afuni o sili a'ma fikhit welagep mene oma. A'nogo hilingitunem hinesanggo holhaluk he ap yi mene ti mene onggo palhik, hunitik agarek mene inom, nen ap uang we elama faget wogisagarek mene inom, mondogat inoasumo wa'lasugun enggere le aga logolik heinet wati logoni o!

¹² Linggene andi sambul An nen esage ibilogo re o Yerusalem fasimbik it afuni Yerusalem mene inendawimo nen anggikhi logolik, ”At Tuhan nen he yi'nogo ti'nogo hilingisu lek hak iluk anggigik, inendawimo seramet figik, it inebeba hilingik mene faget higit hilingik welago iluk anggigik, anggagarek mene andoma re wene inoba fisagain o.

¹³ It mene inangge yi mene ti mene re mondogat telogoin, nen it inawi wurik he mondogat wolelenggen isogoin. Ma re iren inawi wurikhi logogun oba nen inebe logogun lek, nen it ineabu anggur yabu helikhi logogun oba nen enggen iti logogin mene andoma re it ekhe ninggi logogun legaro,” iluk yagaisasikhe.

¹⁴ Tuhan nen ayo wurogo unggum inoba fagain sambul a'nogore mondogat horogasi waga, eberogo nenat mondok horogasi waganggere weak-weagat wesigin. Linggene andi sambul he inendawimo alepale agarek mene andi mondogat hogoin enek, nen a'nogo hikhi logolik he it sikhe fisogo inap inobabut hibilik-hebelek inap oba nen ogore inendawimo mondogat weak asumo le hokhorogo asugun aro!

¹⁵ Linggene weinam asi wesigin oba andi re mondok anini weak mene, anggolo hogoin mene inom, enggin-fenggin hogoin mene inom, nen mondogat weagasugun mene inom, wolelenggen higik logoin mene inom, weinam asi wesigin. Linggene andi re o mondok mum hikhakhogo ohena salek andi hak hilingi'mo, o selek ekhe logogin lek mene wei igin.

¹⁶ Lingge andi re trompet fut hugunem ane hangge it ap weim yafarek mene nen o kota leget pa'leget oba himbirogo wurikwe inom, helep esia'le uanhogo wurogo liabekwe inom, omanogo bene pin kwi lagunem he weim eindep ane mileti logogin.

¹⁷ Tuhan nen ikhi logolik, ”An nen afuni enggin inoba hokhorogo fisa wesumo re it he ap ineilenggen humunik mene nen hilingitarek hak yatip tatibengge hilingiti logogun. Iren he An noba weak hilingitama it inamep he i hakhogo wulibigin, nen it inebe warek he kweang kwe fili arik logoin o,” iluk ikhe.

¹⁸ Linggene mondok elalin mene andi sambul Tuhan anini fikherek mene a'nogo inukhamo re, it inangge emas inom perak inom omanogo nen inagap telinabigin lego. O kweangma yoma mondogat he At anini nen endu foumo re mondok wolelenggenhogo legasigin. Nen ferekhogoat o kweangma yoma ineluk welagaikharek mene oma mondogat he Aren wokhilik lagain.