ZAKHARIA 9 - Allah Wene Fano Wene Hupla Inane

It inunggulenu ekhe Israel mene inera'lukwe werek mene omanogo wene inoba figik-kotik igin wene

¹ Tuhan nen wene wulafikhe a'nogo re yi. An nen he, it o Hadrakh mene andoma inom, kota Damsyik mene inom wene inoba fagain iluk wenggelogo figimo werego. It Israel mene nek he lek, oba nen he it o ibukota Siria mene inom andoma re, An hineisena Tuhan nonggwarek mene o.

² O Hamat o Hadrakh inom huli-hulimo andi ogo re, o Tirus oba kota andoma inom o Sidon oba kota andoma inom afuni o andoma werek mene nen yi wene ti wene hilingitu mene faget inungguloak kagalek mene andoma inom he, An mene nek.

³ It Tirus inaben he, inonggwarek faget o nendawi hambuk faget leget haning leget esi a'le ninghogo wanhik, emas, perak inom he we onggo sebelegengge hakhogo ilingage bene inom, fesi ebekhe kwe welagarek mene andoma bene inom andogorogo fakhaga mene were'ma higi.

⁴ Oba nen An Tuhan nen inenggi lek inelagaik mene hilingisogo fisagain. O kota andiba inangge sik-pikhogo werek mene andoma re An nen i laut agum oba hugisagain, nen o kota andi ebe re endu nen al tamukhogo nagain.

⁵ Kota Askelon inom Gaza inomen ineilenggen hambik he inailo nek asugun. O Ekron mene nen ogo ineilenggen hambik inendawinggen hambuk haluk logoure elo'lek asigin. Nen o Gaza mene re it inoe raja legasiginat, nen Askelon he afuni were'lek aiba hakhogo inareng tiring-tereng igin.

⁶ O Asdod andoma re it ekhe inunggulenu amu-amu mene inom nanggelek-hanggelek logogun. An Tuhan nen ikhi logolik, ”It Filistin inap mondok winik-wonok ili'lagwi mene andi re An nen inebe mondogat inoasigin.

⁷ Iren wam amep werek mene inom, na fuk iluk ili werek mene inom ninggi logogun lek. Afuni longgo imbik logogun menere An nagainafuri mene asumo it he Yehuda mene inom seberogo fisamo logogun. It Ekron mene re it Yebus inap o attak hilingik welagaukwa hakhogo re, An nagainafuri mene asugun.

⁸ An nen nanggweang faget kagalek logolik, it ap pok mene esa logalek kwe andi kwe nen lagu mene re inanggwe palhi logogin. An nen it ap inenggi omameba sebelinarek werek mene andoma An nagainafuri mene hobuk weaget fisanogoluk hilinginabigin lek. Andi re, it enggin-fenggin hili'lagwi mene An neilenggen mondogat isikhi lagi andi nen hilingisigin,” iluk ikhe.

Raja hobuk wesigin wene

⁹ Hit afuni Sion mene yi sani, hinagaiyege'ni o! Hit afuni Yerusalem mene re hinanggiluge'ni! Hit hinoe raja re mondok along- palonghogo weri'lago a'li yethani! At ebe re raja mondok higithogo nek hilingiti logolik inagap telinaferek mene. Oba nen he, at endawinggen sebel fakhikhesik keledai eak oan mene amboroba hurek weri'lago a'li.

¹⁰ An Hineisena Tuhan nen ikhi logolik, ”It Efraim mene inanggo kuda andoma re An nen hugisagain o, o Yerusalem oba inanggo kuda andoma re, An nen mondogat legetfisagain, nen, inasikhe andoma mondogat lilibukhogo lakfisagain. Hit hinoe raja andi nen ap inunggulenu mene inanggele'ma andoma fano liokhogo welagaikharek mene faget wene menfagain o. I laut ekheba nen ekheba andoma At omame a'ma nek ferinarek logogin, nen, i Efrat ima nen he, o kweang wurep kobokhogo andoma huli re At enggiba nek logogin.

Allah againafuri inebe hilingik mene faget halogo fisagain wene

¹¹ An hineisena Tuhan nen nagainafuri inoba yagaisikhi logolik, An nen hit ninom wene wathisasigi mene a'nogo faget, Wene wam warogo fikhi logolik amep oba omamet fesigip oba, hit hinagainafuri hele warogo fisa lagaukwama enggin-fenggin hugu logolik ap i mogo habulik mene i ebe firitokse'ma hukhogo kwelabek logolik hilingitarek hakhogo werek mene andoma An nen fikhalogo wulaginabi wesigin.

¹² Yago, hit afuni hele warek welagep mene yi sani, yogondak he hit ninendawimo eberek logogun mene werek andi nen he, sugulogo we'ni o. An nen hit fanot hinobagagu mondok logogin enggere, hit hinalong pale'ma andoma sugulogo we'ni o. Holini: Hiren yi enggin ti enggin hugu welagagip mene andem obali'mo re An nen altap pireba fanot hinobagagin o.

¹³ Yehuda re ap sikhe fisogo mene inogogwi inasikhe asuageluk inom woginabigin, nen, Israel he tok pisinget houwogeluk sikhe enggelaba lirik welagaikharek hak logouwageluk inom An nen woginabigin. Nen it afuni Sion mene re An nen karok higit woginabigin. Nen An nen he, karok andiba it afuni Yunani mene inoasi kwigin.

¹⁴ Nen At Tuhan ebere At againafuri mene inoba inugisigik, Nen At andok he eilabut hakhogo pising-pasang isigik, Tuhan Omame Mondok Hokho mene a'nogo nen weim yabi kwikhi logolik enekhogo iluk he trompet ane futhigik, nen selatan fikhiren sogoi sielu hokho mene funha wagik, igin.

¹⁵ An nen it An nagainafuri mene eberogo nenat nawe a'ma ferinarek were'ma re, It inaselei mene inomame leget fisigik, Ap i sini'nuk palharek mene naluk inane kwetarek hak, iren weim elema nen ogo inane ngai-wai liafik, wam warogo amep mezbah ebene kweisalharek hak, andi higit it inaselei mene inamep kweisalhik, ugun o.

¹⁶ Linggene andi sambul weinam asi wagunem, ap gembala nen inanggo domba telogo fagarek hak, An Tuhan nen nagainafuri inagap telinabigin. It he An Tuhan nanggweangma andoma nen mahkota permata eil amuilit mondok tibelenggeterek andi hak, hilingik logogun.

¹⁷ An Tuhan nanggweang andi re, ibi ebema elokhe mondok fanore'ma hilingik logogin, Andoma re, anggur inom, gandum inom, hokhorogo legeisogo fikherek hak, it ap sogwe inom, helime silerik inom inomamet fisikhi logogin,” Iluk ugunem holhi o.