ZAKHARIA 4 - Allah Wene Fano Wene Hupla Inane

Lampu eisok faget abikanggoba hasikhe wene

¹ Malaikat an noba ane yaganete mene a'nogo nekhengge nambit wagasik he, afuni nogogunem elelinafarek hak elelnabi wagasik heinok wo'niikhi logolik,

² ”Haren yogondak ya nenamene hikhi lagen?” iluk heinok wo'niikhemo re, an nen onggo ikhi logolik, ”Lampu eisok emas mene misik enek hilingik engge were'ma higi o. Nen, lampu andi aiyogouk ambol ebene andoma re minyak fuguba obalik hilingik were'ma re ebe maserogo lampu tujuh nen werek oba omanogo amu-amu re asu endu amulok wialhu mene faget obalik ebe sabiren mene hilingik welaga.

³ Lampu andi eisok abel harekwe inom pikhitkwe inom he e zaitun pire mene were'ma igi,” iluk yagati.

⁴ Andi nen an nen malaikat a'nogoba heinok wokhikhi logolik he, ”Noe, Andem ebe re nenangge faget enegenggerogo werek nogo?” igimo re,

⁵ aren an heinok wo'niikhi logolik, ”Hat he honggora?” iluk yaganetemo, an nen he, ”Noe, an he nonggoro,” yagati.

^10b Malaikat a'nogo nen an noba yaganeti logolik he, ”Lampu ebe sabiren andem he, Tuhan eilenggen ebe sabirenat o kweangma yoma mondogat eilenggen welagarek mene aremnogo re, andem o.”

¹¹ Andi nen an nen nekhengge at oba heinok wokhikhi logolik, ”E zaitun lampu andi abel harekwe inom pikhitkwe inom werek mene andem he ebe ninggi'nogo faget nogo?

¹² Nen, ekhe e zaitun enggi agolerek mene ebe pire mene pipa emas mene minyak weri'lagokwe halek meneba werek andem he ebe ninggi'nogo faget werek nogo?” iluk heinok wokhigi.

¹³ Heinok a'nogo wokhigimo, aren onggo yaganeti logolik, ”Hat he, honggot nogo a?” iluk yaganetemo re, an nen he, ”Noe, an he nonggoro,” iluk yagati.

¹⁴ A'nogo yagatimo aren ikhi logolik, ”Andem he, ap pire mene Tuhan o pogot kweang elalhikhe agun a'nogo nen At obaget hilingiti logouwageluk enogo menfisasikhe mene aremnogo re andem o,” iluk yaganetunem higi.

Tuhan nen Zerubabel wene waretikhe wene

⁶ Malaikat a'nogo nen an miming nafi logolik, Tuhan nen yi'nogo ikhe iluk hun Zerubabel yagasi lano, iluk yaganete, ”Ap tentara inomameba inom, nen hat honggwarek homameba inom fanorogo hilingisu lek hak, we An Nareagun oba nek he elok hilingisigin o.

⁷ Nen, hat helokhoma andoma tom hokho mene kwe palek logogin oba nen ogore, higilogo laga logogin o. An Nawi a'nogo re haren wusigin, harenat helep attak-attak mene ubule fagain sambul andi re afuni nen ikhi logolik, ’Mondok fani-fanorek agi!’ ikhi logogun.” iluk yaganetunem higi.

⁸ Andi nen Tuhan nen wene ekhe yagaisoageluk an noba lakfei waga logolik,

⁹ yi'nogo ikhe, ”At Zerubabel en he, an nawi a'nogo ubule fikhe, nen, aren he, o andi mondogat wusigin. Nen, andi eberogo agu halok he, An Nagainafuri nen he hat Zakharia re An nen lakfei wagama iluk inelu asugun.

^10a It fena nen he, wene hilingisigin mene yi faget seramet fogoin. Oba nen he at Zerubabel en An Nawi a'nogo wusigin mene ineilenggen hambik he iren inagaiyek asugun o,” iluk yaganetunem higi.