ZAKHARIA 3 - Allah Wene Fano Wene Hupla Inane

Abikanggoba Imam Agung yethasikhe wene

¹ Nabikanggoba ekhe amu mene higi re yi'nogo: Tuhan nen at Yosua Imam Agung a'nogo malaikat Tuhan elokhoma aremnogo mendek were'ma yethoageluk inuk niikhemo yethigi. Nen at Yosua fikhit he Iblis mendek logolik oba hikhibet hikhi laga.

² A'nogo were'ma malaikat Tuhan a'nogo nen Iblis oba ikhi logolik he, ”Hat Iblis yi re, Tuhan nen unggum wokhesuago! Tuhan o Yerusalem endawi hundik hilingiterek mene andi nenat unggum wokhesuago. Ap yire endu amulok lagagunem endu ambisang lisogo wanharek andi hak werego.” iluk ugunem higi.

³ Nen at Yosua ebere asu mondok sinduk weak mene a'nogo laberogo andem mendek welaga.

⁴ A'nogo were'ma at malaikat a'nogo nen he pogoroba at lebethagarek mene omanogo inoba yagaisikhi logolik, ”Ap yi nen asu sinduk weak laberek werek ari nonggologo hugisani o,” ikhesik he aren Yosua ba ikhi logolik, ”Hat haweak he an nen mondogat hugisigi o, nen hat he hasu ket mene laberanogen wokhesigin o,” iluk yagati laga.

⁵ A'nogo yagatesik malaikat Tuhan a'nogo eilenggen werek kwelek, aren he agoromi lebethugu mene omanogo inoba re Yosua ungguloba unggulasu mondok fano pugunsek meneba puget fouwageluk yagaisugunem he, iren yagaisugu mene a'nogo higithogo hilingiti logolik he, asu ket mene mondok fano mene at Yosua oba labet fugunem higi.

⁶ A'nogo hilingitunem higimo nen he hobuk malaikat a'nogo nen he Tuhan ane ikhe mene Yosuaba yagati logolik he, yi'nogo ikhi laga,

⁷ ”Haren ambi An nawene melalek a'nogo higithogo hilingitik, nen haren yabu hilingisuageluk An nen menhobagagi mene andi hilingitik, ikhi logogin halok he, hobuk mondok-mondok andoma ogo hat he An nawi elonggoma andoma faget melalhu mene logolik elokhoma andomaat halhi logogin o. Nen haren samban ugu mene re it malaikat An nebe horokhogo welagaikharek mene nen samban ugunem holhirek higithogoat haren ugu mene ogore hane holhi logogin aro.

⁸ Imam Agung Yosua ao, hesanggo holin o. Nen hit at agaila'lak imam welagep mene andoma ogo, hit he o hobuk andoma fanorogo logogun mene faget enegengge re hit welagep. Hobuk andem oba re An namingmingengge enu, ”Asimit,” andi lakfei wesigin.

⁹ An nen he Yosua elokhoma andem helep misik unggut 7 nen hilingik mene fembik An nen hesesengge waganogo lisu palfagain o. Nenggi misik oba re, An nen o kweang yiba inaweak werek mene andoma mondogat hugisagain o.

¹⁰ Nen, inenggi andi sambul asi wagu halok he, afuni inebe lombogen inagaila'lak inom horok-horokwe welagaikharek mene omanogo inayonggo fuluk it ineabu anggur yabukwe inom inagayo ara erokwe inom yagokwe tulem andoma inendawinggen siserogo yi enggin ti enggin higi'lek logolik welagaikharek mene andoma hikhi logouwageluk inayonggo fikhi logogun o.” iluk yaganetunem higi.