ZAKHARIA 2 - Allah Wene Fano Wene Hupla Inane

Hele ilirenggetu mene abikanggoba hasikhe wene

¹ Nabikanggo ekhe hobuk meneba hasigi re ap misik ekhe hele ilirengge enggim fisogo were'ma higi.

² A'nogo higirik he, an nen heinok wokhikhi logolik, ”Koma lageluk?” iluk igimo re, Aren onggo yaganeti logolik, ”O Yerusalem andi uanhogo hilingik mene inom, nen elonggo wogologo hilingik mene inom he ki huliba hilingik iluk ilirengge walesigilugo,” iluk yaganete.

³ A'nogo yaganetesik malaikat an noba ane ikhe mene a'nogo wagunem he, malaikat amu mene ekhe inom ambi agunem isigi.

⁴ Ambi agaikhasik malaikat attak mene a'nogo nen ekhe pirenek mene a'nogoba ikhi logolik, ”Ap alage mene andi ambit weak-weak lambik yagati logolik he, o Yerusalem he afuni nen inom inanggo takhagarek mene nen inom mondok hopo igin enggere leget pa'leget haning leget wanu re elo'lek agunem hogoin o.

⁵ Tuhan nen wene wati logolik, At onggwarek ebe o kota andi faget pa'leget higit endu meneba haningisogo logolik along palogo fisogo logogin, nen, At ebe re along-palonghogo logolik omame hokho mene logogin, ikhe iluk yagasi lan o,” ugunem higi.

Afuni hele warogo lakfisasukwa mene inambotkwe wesuageluk wolinafikhe wene

^6-7 Tuhan nen At againafuri inoba ikhi logolik he, ”An nen hit hinebe o onggut-onggut, esanggo-esanggo telfol hisasigi. Oba nen, yogondak he, yago! Hit afuni hele warogo fisagarek oba welagep mene andoma re, o Babel en heise wilibimbik weak-weak hinambotkwe o Yerusalem we'ni o.

⁸ Ap sa nen hit hinoasugun iluk hilinghinafu halok he, An nendawinggenma kagaukhogo noasu hagat hilingisugun o,” iluk ikhe. Andiba re, Tuhan Omame Mondok Hokho mene a'nogo nen an mimingnafi logolik wene a'nogo iluk andi it inunggulenu inap Tuhan againafuri telogo helasukwa mene andoma yagaisoageluk mimingnafi logolik,

⁹ ”Tuhan amu negen hit hinom weim yabigin o! Nen, Hit he, it hinamingmingengge higit ferinarek welagagip mene andoma nen weaget hinabugun. Andi ebe hilinglagu halok he, Tuhan Omame Mondok Hokho mene a'nogo nen an laknobai wagama iluk hirogo hinelu asugun aro,” ugunem higi.

¹⁰ Tuhan nen ikhi logolik, ”An he hit hinanggele'ma logogin enggere, afuni Yerusalem mene oma hinagaiyek oba wuni wa'ni o!”

¹¹ Hinenggi andem oba re, afuni inunggulenu hokhorogo Tuhan ambit At againafuri mene asugun iluk waga logogun. Nen, At ebe hit hinanggele'ma were'ma, an he At Tuhan nen hit hinoba laknobagai wagama iluk hinelu asugun o.

¹² Ekhe inom it Yehuda mene re kweang mondok horek meneba andoma Tuhan onggwaregen mene asigin. Nen, Yerusalem he, kota aren endawi hundik mene hilinglasigin.

¹³ Nineisena Tuhan o pogoroba ebe welagarek oba omanogo nen arat weri'lago andi nen he hit hinebe mondogat he At Elokhoma hinabolok lek logoni o.