ZAKHARIA 1 - Allah Wene Fano Wene Hupla Inane

Tuhan nen againafuri sugulogo At ambit wesuageluk wolinafikhe wene

¹ Hun Darius afuni Persia mene faget inoe raja menlagaikhesik ferinarek werek kwelek tahun pirenek mene tugi sirek meneba were'ma, Tuhan nen an Zakharia hun Berekhya amlogo, hun Ido omba a'nogo noba wene yi'nogo ino, iluk yaganete.

² Tuhan nen he at againafuri inoba wene yi'nogo ino iluk mimingnafe, ”O attagen enggere An nebe Tuhan Nomame Mondok Hokho welagirek mene a'nogo nen it hinambu-hinombalak inoba wenagisikhi lagagi.

³ Oba nen yogondak he An nen hit hinoba yi'nogo yagahisak: Hit hinebe sugulogo An nambit we'ni o, nen, An ogo sugulogo hinambit wesigin.

⁴ It hinobawi nen hilingiti lagaukwa hak hilingiti logou fuk. O attak andoma it nabi nen weak hilingitarek mene inom, kwanirogo hilingitarek mene inom hilingiti logou fuk iluk yagaisikhi lagaukwa. Oba nen iren he, a'nogo hilingitu mene a'nogo hologo hilingiti'lek herakfisaluk An noba ogo tiphogo hilingiti lagaukwa lek.

⁵ Ma re, it inambu-inombalak inom it nabi andoma inom yogondak he koma werek nogo? It he, inebe werek lek andi.

⁶ An namingmingengge nabi andoma inebene nen An nen wene melalek inom, yi'nogo hilingi'no, ti'nogo hilingi'no iluk werek mene omanogo inom hit hinombalak inoba yagaisikhi lagagi. Oba nen iren herakfisaluk hilingiti lagaukwa andiba re, ambisangma aga lagaikhe mene andoma saburikhi lagaukwa. Andi nen iren nit ninobaburen hilingito iluk inendawimo waraluk he, An Tuhan Nomame Mondok Hokho mene a'nogo nen it hilingitu mene onggo, An nen hilingisigin mene iluk wephogo fesigi mene a'nogo it inoba hilingfisugu mene faget fageti lagaukwa o,” iluk yagaisano, yaganete.

Abikanggoba kuda miren mene hakhogo hasikhe wene

⁷ Tugi Syebat andi re tugi nalonggop mene tanggall 24 oba raja Darius nen ferinarek were'ma nen enek he tahun pirenek mene werek kwelek, o hubanggo nabikanggoba Tuhan nen wene yi'nogo ino iluk yaganete.

⁸ An neilenggen hugunem en he, malaikat ekhe kuda elokhe mep mene oroa'ma sagalirogo waga laga. Wagasik he, at a'nogo e murad salma fanggongma andoma kamo i wagunem higi. Nen, at ombo'ne re kuda fenakwe eil mep mene inom, elokhe yanggorek mene inom, mola mene inom miren mene hakhogo mendek were'ma higi.

⁹ A'nogo were'ma re, an nen heinok wogikhi logolik, ”Kuda oma re ebe ninggi'nogo faget nogo?” iluk heinok wokhigimo re, Aren onggo ikhi logolik, ”Oma ebe ti'nogo faget iluk andi re, An nen inuk heagain o.

¹⁰ It andoma re, Tuhan nen o kweangma yoma ineilenggen kogoluageluk lakfisa wagama o,” iluk yaganete.

¹¹ Nen, kuda andoma mondogaren he malaikat a'nogoba elurogo yagati logolik, ”Nit he o kweangma yoma, ekhema-ekhema nineilenggen kogolik lago mene re, kweangma yoma mondogat he youk legengge mondok fanorogo nek werego,” iluk yagatunem isigi.

¹² A'nogo ugunem malaikat a'nogo nen ikhi logolik, ”Tuhan Homame Mondok Hokho mene a'nogo nen, tujuh puluh tahun andem oba re, Haren Yerusalem oba inom Yehuda ba inom inoba ha'mage fesigin. Haren he, henggi ki huli nen wene inoba mene andi leget figi'lek inoba fugu mondok logogin nogo?” iluk heinok wanhunem higi.

¹³ A'nogo ugunem he, Tuhan nen malaikat a'nogoba onggo endawimo agaiyek asu hak mene yagatunem higi,

¹⁴ nen, malaikat a'nogo nen he, Tuhan Omame Mondok Hokho mene a'nogo nen ikhe mene a'nogo an yaganeti logolik yi'nogo ikhe, ”An nen he, o kota Yerusalem An Nawi mondok horek mene andi faget nendawi hundik anggikhi logolik, obaget ebetu welagi o.

¹⁵ Oba nen andi ero re it nagainafuri inoba na'mage fugu mene hambuget haluk welagiba nen it inunggulenu inap andi nen he, An nagainafuri inoba enggin-fenggin hugu mene a'nogo ekhe inom engginet fisugu weregen he, it inunggulenu inailo legengge fanorogo welago, iluk anggili'lagwi mene andi re, An na'mage inoba fugu welagi o.

¹⁶ Yogondak he, An nebe nambotkwe o Yerusalem sugulogo lambik o kota andiba inagap telogo fisa lagain o. An nawi a'nogo nekhengge wusimbik he o kota Yerusalem andi hobuk ambotkwe fanorogo wusugun o,” iluk yaganete.

¹⁷ Malaikat a'nogo nen an mimingnafi logolik wene yi'nogo yagaisano iluk yaganeteat, ”Tuhan Omame Mondok Hokho mene a'nogo nen ikhi logolik he, At Awi kota a'nogoba andoma re nekhengge sik-pikhogo hilinglasigin o, nen aren nekhengge Yerusalem lebethambik An nonggwarek mene iluk fagesigin iluk wene wate ino,” iluk yaganete.

Andimuk hangge abikanggoba hasikhe wene

¹⁸ An nabikanggo amu mene ekheba hugunem en he, an nen sapi andimuk enggaminogo mene were'ma hasigi.

¹⁹ A'nogo hasigisik an nen malaikat ane an noba isikhe mene a'nogoba heinok wokhikhi logolik, ”Andimuk andoma re, wene ebe ninggi'nogo mene faget?” iluk yagati. A'nogo yagatimo aren onggo yaganeti logolik, ”Andimuk andoma ebere o ”kerajaan” mondok omame mene nen afuni Yehuda mene inom, Israel mene inom, Yerusalem mene inom, pugulogo nalek-falek hilingfisasukwa mene ilirenggerogo were'ma hegen o,” iluk yaganete.

²⁰ A'nogo yaganetesik Tuhan nen ap inebe enggaminogo mene posiemanggen elalharek mene wagunem inuk niikhe.

²¹ Inuk niikhemo an nen heinok wokhikhi logolik, ”It andem he ninggi'nogo mene faget weri'lagwi?” iluk igi. A'nogo igimo re, aren onggo yaganeti logolik, ”It andem he, afuni inunggulenu mene nen it Yehuda mene wolelenggen tagalogo fisigik, telfolisigik, isukwa mene omanogo sebelogo fisouwogeluk weri'lagwi o,” iluk yaganete.