YUNUS 3 - Allah Wene Fano Wene Hupla Inane

Yunus hobuk Tuhan ane hologo o Niniwe lagaikhe wene

¹ At Yunus a'nogo wulakfei wagaikhemo, Tuhan nen attagat Yunus yagatikhe higithogo, hobuk mel yagatikhe:

² ”Yunus. Weak-weak o Niniwe kota hokho sili a'nogoba lambik he, wene hoba figi mene a'nogo yagaisa lan o,” iluk yagatikhe.

³ A'nogo yagatikhemo re, at Yunus Tuhan ane hologo, o kota Niniwe hokho silimo a'nogo lagaikhe. O kota andi mondok hokho mene hilingi'mo re, o silikwe lagu kwelek enek he, inenggi henagan hilinglasu awi andi welagaikhe.

⁴ A'nogo were'ma, Yunus o kota andoma arat kwi lagaikhesik, ohealek huberen pikhit hu'mokhokwe o silikwe omanogo laga lagaikhesigen wene mel yagaisasikhe: ”Eiga! Nineisena Allah nen enggi 40 hari logombigen, hit afuni o kota Niniwe welagep mene yoma wulil tagalogo hinoasigin o!” iluk yagaisasikhe.

⁵ A'nogo yagaisugunem he, it afuni o Niniwe mene omanogo nen futfesukwasik he, inendawinggen Allah oba eberogoat himbiret fesukwasik, wene ero mel isukwa: ”Afuni ninebe mondogat he sumburu ninggi'lek logouwok,” iluk isukwasik he, it inebe inaweak faget inendawi warikhi logolik iluk enegenggerogo re afuni nen pelagi fuluk welagaikharek hak, inogogwi kaindek inom, inagoromi inom, inebe mondogat su karung mene labetukwa.

⁶ ”A'nogo hilingiri'lagwi,” iluk isukwama, afuni Niniwe mene inoe raja a'nogo esanggo holhikhesik he, at ebe kain logolik hurek welagarek oba aremnogo nen weak-weak pi wagaikhesik he, ebe raja logolik asu laberek welagaikhe mene nonggologo fesikhesik, karung meneba laberogo re wul oba hu'lagaikhe.

⁷ A'nogo logolik, at agoromi kaindek inomen wene tekhogo isukwasik, afuni o kota Niniwe welagaikharek mene mondogat wene ero inoba wulafi logolik, mel isukwa: ”Hit afuni mondogat inom, wam sapi, domba ekhe mondogat inom, i sumburu nogoin mondok lego!

⁸ Ninggi'lek logolik he, afuni inom, wam inom, su karung mene labesugun o. Labesimbik he, afuni inebe lombok inobabut weak hilingitik, it ekhe inendawirinafi'lek weagarinafik, agarek mene andi herakfisaluk, ninane ninelagaik ninaneba Allah ayonggo fouwogo.

⁹ A'nogo hilingitunem he, nineisena Allah a'mage ninoba fikhesik ninoasigiluk ninabok palhesik werek andi, herakfisambik endawit ninabigin a? Lega, sa elu,” iluk wene ero wulafukwa.

¹⁰ A'nogo hilingitukwama, Tuhan eilenggen isasikhesik he, ”It andi inobabut weak hilingiti lagaikha mene herakfisaga higi,” iluk isikhesik he, attak wene inoba fembik inoasigin iluk isikhe mene a'nogo sugirogo herakfisasikhe.