YUNUS 2 - Allah Wene Fano Wene Hupla Inane

Yunus ikan alabutmo logolik Tuhan ayonggo fesikhe wene

¹ At Yunus ikan alabutmo logolik eisena Tuhan Allah ayonggo yi'nogo fesikhe:

² ”Tuhan neisena! An weak logolik nane hokhorogo hayonggo fikhi lagi mene yi hesanggo holin o. Afuni wa'la'luk wagaikharek oba yoma nen telnabinogen iluk hayonggo fikhi lagi mene yi, hesanggo holimbik futnobagaino, neisena

³ An nebe i laut elema ma'lima Haren pelakfanhenma, ma'lima nen i omamerogo nera'lukwe nabung-habung niigik, i ha'labu nen esinggen foinalogo sebelnabi wagik, ili'lago yi.

⁴ A'nogo hilingnafunem logolik, nendawimo nen he, An nebe neisena Tuhan helokhoma nen mugusogo nobagai wagen andi nen he, o Hat hawi wuri'mo hebe welagen oba mondok hore'ma omanogo neilenggen hobuk hagain lek hea iluk anggigi lagi o.

⁵ Nen i huli nambeba asi lagai wagik, i laut yenggelek mene nen maserogo kwelaknobagagik, nen i elema engga wulibik welagarek mene nen nunggulkwe hambelogo hilingnobagagik, ikhe andi.

⁶ Tom i elema ma'lima werek mene eroma ma'lima pigirik, kwe kelok ninghogo yagare'ma re, wulibi wesu elo'lek hilingi'mo pigi, mondok-mondok logogin iluk anggigirik were'ma nen, hat neisena Tuhan Allah nen neluk logouwageluk fem a'ma ma'lima nen liaknobagai wagen o.

⁷ Nendawimo nen, an arat wa'lasigin higi iluk anggigirigen, hat hoba ebethiigirik he hayonggo figimo, hat hebe honggwarek hawi wuri'mo hore'ma logolik, nane hesanggo holhen.

⁸ It afuni ekhe tugwi kembu ebe lek meneat fogerati logouwogeluk, hoba lomborogo welagi'lek herakhobagaluk wulifukwa andi.

⁹ A'nogo meneat he, an enek he, Hat faget wuniba fogethafik, hanggo ekhe warogo nolhetik, igin o. An nen, yi'nogo hilingisigin, iluk wene watheti mene andoma re, mondogat hilingisigin. Hat Tuhan he telinafendek mene o, neisena,” iluk ayonggo fesikhe.

¹⁰ Ayonggo a'nogo fesikhemo re, Allah nen ikan a'nogo yagati logolik, ”Yunus ebe hemelogo i esanggoma wulakfei lan o,” iluk yagatikhemo, wulakfei wagaikhe.