YOSUA 9 - Allah Wene Fano Wene Hupla Inane

Ap Gibeon mene nen Yosua lali wagaukwa wene

¹ Wene Yosua inom afuni Israel mene inom inomame aga logolik raja-raja mabenet fisilik laga lagaukwa mene omanogo faget he inabok wialarik laga logolik, raja i Yordan fena o mo ubuk ikherek fikhit werek mene inom, tomkwe welagaikharek mene inom, tonggokwe o abel fena-fena welagaikharek mene inom andoma i Laut Tengah huli andoma nen he tom Libanon soganogo eil ambolkwe andoma huli, o andoma it raja Het mene, Amori mene, Kanaan mene, Feris mene, Hewi mene, Yebus mene andoma nen holhukwa.

² It Raja-raja andoma inane misik seberogo makfesukwasik he inom seberogo Yosua inom, afuni Israel mene inom, weim yabugun iluk isukwa.

³ Oba nen he afuni it inunggulenu Hewi mene o Gibeon werek mene nen he, Yosua nen o Yerikhoba inom o Ai ba inom hilingfesikhe mene faget inesanggo holhukwa.

⁴ A'nogo holhukwasik. iren he Yosua eil label hambik logoin iluk he inangge keledai ba re karung mining mene inom, iwak agap meneba hilingik mene anggur agai hinatu mene iluk he mondok weak mene inom wanhukwa. Nen inebe nunggu mene iluk kwemangge re, roti iringik weak mene mondok ebene kulumage fesikhe mene fougetukwa.

⁵ Nen, inasu re mondok tilipsek mene labetukwa, ina sepatu re mondok endam mene selebenet higik itukwa.

⁶ A'nogo hilingitukwasik he. at Yosua ambit o Gilgal awi sabu wuri'mo lagaukwasik iren at inom afuni Israel mene inom inoba ikhi logolik, ”Nit he ninawi ero mondogat yatma mene o, ma re nineisugwi hit ninom wene wasugun iluk wago o,” iluk isukwa.

⁷ A'nogo isukwama nen he, it Israel mene nen ikhi logolik he, ”Nenahalok hit ninom wene wasugun nogo? Hit hinaiba re we horok yoma welagep mene logou hak!” iluk isukwa.

⁸ Andi isukwama iren ikhi logolik he, ”Nit he nineisena haren yi mene hilingi'ni iluk yaganisagain mene andoma re ninendawimo fanoba hilingisugun enego,” iluk isukwama, Yosua nen heinok wogisikhi logolik he, ”Hit he hinebe sani nogo? Nen hinawi ero koma nen wagep?” iluk heinok wogisasikhe.

⁹ Heinok a'nogo wogisasikhemo re, iren onggo yi'nogo yagatukwa, ”Nineisena, nit wago re o mondogat yatma nen wago. Andi re niren holhunemen he, Tuhan Allah nineisugwi hiren apne wanhi lagep mene andi nen o Mesir oba elalinhogo hilingiri'lago aple andoma inom,

¹⁰ nen, ekhe Tuhan nen raja Amori mene inebe pire o i Yordan ima nen mo ero fikhit andoma werek mene, hun Sihon raja Hesybon agun andi inom, hun Og raja Basan agun o Asytarot werek mene andi inom inoba hilingfisasikhe mene andoma holhosik wago o.

¹¹ Nit ninogogwi melalninafu mene inom, nen afuni nit ninaiba andoma werek mene inomen he, nit he nineisugwi hit hina'ma sebe ugun iluk sumburu kwemangge wo'nisagasik o andoma lani iluk la'ninobagai wagaikhama wago o. A'nogo wagonggere nineisugwi hinendawinggen mondok fanoba nit ninom hit inom wene wasuogo, isukwa.

¹² Nen, nineisugwi hiren ogo ninamburu roti kwemangge helaluk wago mene ya hineilenggen kwela'nisani. Nit ninaiba nen wulifosik wago sambul he roti yoma re aganhan sek welaga. Oba nen he yogondak ya re kwela'nisani! Mondogat kelok ikhesik kulumage fikhemo yoma.

¹³ Nen iwak agap meneba hilingik anggur agai hinatu mene oma re, niren i hinagaisogo kwaliluk wago andem sambul he agap ketsek welaga, oba nen he yogondak he kwela'nisani! Mondogat tethigik lagangge yoma. Nit ninasu laberek mene inom nina sepatu inom he yatma nen wagunemen mondogat tilibet lagama yoma.” iluk yagaisasukwa.

¹⁴ Andi isukwama afuni Israel mene nen he wene a'nogo faget Tuhan heinok wokhigi'legengge re, it ninom sebeti lago iluk it ap Gibeon mene inamburu endebengge ekhe nasukwa.

¹⁵ At Yosua nen he ap Gibeon inap andi ninom sebeti lago iluk wene watikhe, Wene a'nogo warisasikhe andiba re it inebe ekhe inoatukwa lek. Nen it afuni Israel mene melalinafu mene omanogo nen ogore wene watukwa mene andi tiphogo hilingisugun iluk he inane hombuk palhukwaat.

^16-17 Palhukwaba nen he mondogat wene ap Israel mene inom, Gibeon mene inom watfuluk aremnogo re, linggene henagan welagaukwasigen he, afuni Israel mene a'nogo nen o kota Gibeon inom, Kefira inom, Beerot inom, Kiryat-Yearim inom andoma ineil halik lagaukwa. Andiba nen enek he afuni andi inaiba re yatma lek we horokhogo logolik hilingita iluk inelu agaikhe.

¹⁸ Oba nen he afuni Israel mene inogogwi melalinafu mene omanogo nen it Israel mene ineisena Tuhan Allah enuba hombuk palhukwama re, iren ap omanogo inoasu inoasure elo'lek agaikhe. Elo'lek agaikhemo afuni Israel mene inebe mondogaren he wene a'nogo faget it inogogwi melalinafi lagaukwa mene aremnogo inoba inane mul-mul fesukwa.

¹⁹ Fesukwaba nen he, it inogogwi melalinafi lagaukwa mene andoma nen onggo ikhi logolik he, ”Niren Tuhan Allah afuni Israel mene hineisena enu hombuk palogo wene watoma ninggi'nogo hilingisu hak?” Yogondak he niren it inoba weak mene ekhe hilingfisouwok lek.

²⁰ Niren wene mondogat watoma re inebe pinggi inoasuok lek, andi nen wene wato mene andi taganet foumo Allah nen nit wene ninoba feinogo.

²¹ Wene andi ariginik enggere, niren it inebe ineluk fisogoin, oba nen he it inebe mondogaren he nit ninobaget e wu'nisigik, i ina'nisigik hilingitu mene logouwak,” iluk isukwa. Wene a'nogo hilingisugun iluk, it inogogwi melalinafi lagaukwa inap a'nogo nen wene andi palhukwa.

²² A'nogo hilingitukwasik, ap Gibeon mene andi Yosua ambit wesuageluk wolinafukwasik at Yosua nen yagaisikhi logolik, ”Hit hinaiba re horok yoma logolik athe, nit yatma nen wago iluk hineran nen lalninafep andi, nenahalok?

²³ Hiren a'nogo lalninafep andiba re, Allah nen hit wene hinoba fagain o. Hit hinunggulenu mene andoma re nit ninamingmingengge nek asimbik, o an neisena Allah awiba faget e wutik, i hinatik ikhi logogun.” iluk yagaisasikhe.

²⁴ A'nogo yagaisasikhemo iren onggo ikhi logolik he, ”Nineisena, niren a'nogo hilingito andi re, nit ninesanggo holho re, Tuhan Allah hat nineisena nen apne wanhi lagen mene andi nen Musa at amingmingengge andi mimingiti logolik he, nineisena hat hebe nen o kweang yi sebeli kwi waga logolik afuni yoma werek mene mondogat inoatik, nen kweang yi abirengge nineisena hat wokhetik, hilingisuageluk mimingite mene andi faget ninesanggo holhosik he, nit ogo ninomat ninoasugun hea iluk ninailo nen a'nogo hilingito andi.

²⁵ Nen yogondak nit he nineisena hat ha'ma welagonggere haren yi'nogo hilingfisagain iluk, hendawimo nen fano anggegen mene andi hilingninobagagin fano,” iluk yagatukwa.

²⁶ Andi isukwama re at Yosua nen hilinginafikhe mene re yi: Aren he afuni omanogo inili waganogo fisasikhesik he hit Israel mene nen inoasugun lek iluk ane poget fesikhe.

²⁷ Oba nen he, it inebe inamingmingengge hilinginafikhesik, afuni Israel mene faget inom nen wene warogo nolhuba mezbah faget inom, e wutik, i hinatik, ikhi logouwageluk fisasikhe. A'nogo hilinginafikhe andiba re, yogondak huli nen iren yabu andi mene nek At Tuhan obaget hilingiti logouwageluk enogo fisasikhemo andoma hilingitu mondok welagaikharek.