YOSUA 8 - Allah Wene Fano Wene Hupla Inane

O kota Ai sebeli kwikhi logolik mondogat weaget fesukwa wene

¹ Tuhan en Yosuaba ikhi logolik he, ”Hagoromi tentara mondogat andogerinabimbik he, it inom seberogo o Ai andoma lani. Lageluk halok he hailo legengge hendawinggen sebel fakhambik lano! An nen he hun raja o Ai mene andi enggimo nen halonget hobagaigeluk welagi. Andi nen he againafuri melalinabi'lago mene inom, awi kota andoma inom, at anggweang inom he haren telogo sebeligin.

² Raja o Ai agun andi inom o Ai ebe inom he haren attak o Yerikho inom inoe raja inom inoba hilingfisasigin aremnogo hakhogo hilingfisano. Oba nen yogondak yi nek he yi mene ti mene inom inanggo inom he hit hinangge mene asuageluk helano. O kota andi re ambol fikhiren ferekhogo inoasi kugun enggere fik-foukhogo hilingfeni,” iluk yagatikhe.

³ A'nogo yagatikhemo yagaisasikhesik he, Yosua a'nogo agoromi tentara inebe abirengge inom seberogo o Ai louwogeluk fik-fouk etukwa. Aren he agoromi kabelek mene weim inaninirogo yafarek mene nek inebe 30.000 nen penogo hubanggo lakfisasikhe.

⁴ Lakfisikhi logolik he it inoba wene yi'nogo melalogo lakfisasikhe, ”O kota andi ebe abel elikwe fikhit sali logoin enggere hinebe yatma la fugo, a'nogo sali lambik he pin kuogeluk fik-fouk e'no.

⁵ An inom, it an nagoromi inom he, o kota andiba horokhogo andoma asi logoin. Nen it ap o Ai inap andi nit ninom weim yabugun iluk wulibi wagu halok he, nit ninebe attak hilingitugu hakhogo nineranen ninambotkwe lirisa wesugun.

⁶ Wesumo iren nit mu'ninarek he o kota herakfuluk yatma asi wesugun, wesimbik iren anggikhi logolik nit attak ninota higit ninoasinogo iluk anggambik inailo nen heise logoin anggogoin.

⁷ A'nogo hilingitu kwelek andem hit hinebe salek logogun engge a'nogo wulifi logolik he o kota andi sebeli kwino. Hineisena Tuhan Allah nen hit hinenggiba arat waganogo fikhemo werek enggere.

⁸ A'nogo sebeli kwimbik he, Tuhan nen melalninobagaikhe higithogo re o kota ebe andi hali nolino. Hiren he wene andi higithogo hilingisugun.” iluk melalfisasikhe.

⁹ A'nogo yagaisasikhesik he, at Yosua nen it agoromi omanogo lakfisasikhemore it a'nogo o Ai nen mo ubuk ikherek fikhit, o Ai honggolek Betel honggolek andoma sali lagaukwa. Sali lagaukwasik nenangotu welagaukwa. Meneat he at Yosua nek he it afuni Israel mene nen inawi sabu sale'ma omanogo nogosikhe.

¹⁰ Ohealek hubet-habet he Yosua siakhogo menlagaikhesik ap esa logalek mene a'nogo kabogesi wesuageluk yagaisasikhe. Andi nen at Yosua inom it kaindek afuni Israel mene inogogwi omanogo inomen he, ap esa logalek a'nogo woginarek o Ai lagaukwa.

¹¹ Ap esa a'nogo Yosua inom seberogo re, o kota Ai kwe hokho mene ambe palek oba kwi lagaikharek mene a'nogo werek fikhit lagaukwasik he, it inebe o abel utara fikhit andoma it Israel mene hilingi'luk o kota andi hilingi'luk he tonggwe ekhe were'ma andoma o sabu salogo nogosukwa.

¹² At Yosua nen he ap inebe 5.000 nen hakhogo o kota Ai nen mo ubuk ikherek fikhit, o Ai nen honggolek Betel en honggolek tulem andoma sali loageluk lakfisasikhe.

¹³ Andiba re, it ap weim yabi lagaukwa mene andi re inebe yi'nogo eratukwa: It inebe eroma a'nogo re o kota utara fikhit andoma fisasikhe, nen ap esa fena fikhit he mo ubuk ikherek fikhit andoma fisasikhe, nen at Yosua ebe nek he hup a'nogo sambul he o tonggoma andoma lagaikhe.

¹⁴ A'nogo lagaikhemo, at raja nen Yosua agoromi omanogo isasikhesik he aren weak-weakhogo nek fik-fouk etikhe. At ebe inom at agoromi inom he o Yordan tonggoma attak it ap Israel mene inoarik wagaukwa fikhit omanogo wagaukwa. At he hobuk it Israel mene nen inambot fikhiren inoarik wesugun a'nogo onggot logolik hilingitikhe.

¹⁵ Nen, at Yosua agoromi inom he ineranen inambot soma-soma lagaukwasik inebe heise o lei esi lek fikhit lirinarek lagaukwa.

¹⁶ O kota Ai oba ap mene inebe mondogat he, Yosua agoromi inom muginarek loageluk yonggo fesukwa. Oba nen he it a'nogo nen Yosua agoromi inom muginarek lagu kwelek he o kota omanogo nen eil uanhogoat lagaukwa.

¹⁷ Ap o Ai mene inebe ap mene nek he ap Israel mene muginarek louwogeluk inebe mondogat wulifi logolik he, o kota a'nogo kagalek mene ekhe fisigi'legengge kwe hurogo herakfisaluk lagaukwa.

¹⁸ Andi nen Tuhan nen Yosuaba ikhi logolik he, ”O kota andi re An nen yogondak hat hoba wokheti laginggere, haren harige kabelek ari lek hambik he, o Ai fikhit andoma henggi tum watfeino.” iluk yagatikhe. Andi yagatikhemo Yosua nen he, Tuhan nen yagatikhe mene a'nogo higithogo nek hilingitikhe.

¹⁹ At Yosua nen enggi tum watfugu kwelek aremnogo, ap esa hinagoma hou salek welagaukwa mene omanogo weak-weak siakhogo wulifi logolik he, o kota a'nogo pin kwi wagaukwasik, iren sebelasukwa. Andi nen iren pikhit o a'nogo pin talogo sebeli kwikhi logolik endu fatukwa.

^20-22 It Ai inap a'nogo inambothan ineil yetha lagaukwa re, endu hule mone'luk pogoroba lagagunem yethasukwa. Nen, Yosua inom ap esa fenakwe inom omanogo inomen ogo endu hule a'nogo yethasukwaat. Yethasukwasik he, ap esa fena omanogo nen o kota a'nogo pin arat kwagama anggasukwa. Andi anggasukwasik he Yosua inom ap esa fena omanogo inom hebekhogo laga logolik he, ap Ai mene omanogo inoarik-inoarik lagaukwa. Nen ap Israel mene o Ai oba andoma kwisukwa mene omanogo waga logolik he inabel fikhit en inoasugun iluk wagaukwama re, it ap Ai inap omanogore tulem nonghongse'ma agaukwasik inebe heise wulibu elo'lek agaikhe. Ap it mene re misik mene ogo ekhe polokhogo wulifukwa lek, inebe felelenghogo it Israel mene nen pinggi inoatukwa.

²³ We ap raja Ai mene andi nek he wati'legengge ebe eluk senetukwasik he, Yosua were'ma waluk lagaukwa.

²⁴ A'nogo it Israel inap esa a'nogo nen ap inaselei mene it muginarek o lei esi le'ma wagaukwa mene omanogo felelenghogo inoatukwasik he, it a'nogo sugulogore o Ai lagaukwasik, afuni o andoma werek mene omanogo mondogat inoasi lagaukwa.

^25-26 At Yosua nen he arige kabelek a'nogo o Ai fikhit lakfesikhesik werek kwelek enek he, afuni Ai mene omanogo mondok felelenghogo inoatukwa. Linggene andi sambul enek he afuni o Ai mene re ap inom hemi inom seberogo re 12.000 nen inoatukwa.

²⁷ Inanggo inom inangge yi mene ti mene o andoma nen helasukwa mene inom he, Tuhan en Yosuaba yagatikhe aple higithogore afuni Israel mene nen it inangge mene asuogeluk helasukwa.

²⁸ Yosua nen he o Ai a'nogo endu fagaisogo weagerogo ulun enek hilingfesikhemo yogondak huli nen a'nogoat werek.

²⁹ Raja kota andi welagaikhe agun a'nogo re, ebe e mendek meneba hele kelogo porogo fesukwama werek kwelek o hu'mo agaikhe. Mo ubuk ugu kwelek aremnogo re Yosua nen ap warek a'nogo wani lambik he, o kota kwe ki lagaikharek oba ambe pale'ma sele'ma andoma hugisa lani, iluk yagaisasikhe. A'nogo hilingitikhemo re obalik aremnogoba re helep hokho-pokhorogo kaboget fesukwa. Helep andoma re yogondak huli nen andemat werek.

Tuhan Awene melalek yi'nogo hilingi'no ti'nogo hilingi'no iluk isikhe mene a'nogo, Tom Ebal oba nen pilingitukwa wene

³⁰ Andem oba re Yosua nen he, it afuni Israel mene ineisena Tuhan Allah obaget mezbah misik ekhe Tom Ebal oba wutikhe.

³¹ Mezbah andi re wene yi'nogo hilingi'no ti'nogo hilingi'no iluk afuni Israel mene inobaget isikhe mene buku Musa Tuhan amingmingengge a'nogoba palek mene a'nogo higithogo wutikhe. Buku andiba re, ’Mezbah misik ekhe helep no posiemanggen meneba hesesengge hilingik le'meneba wu'no,’ iluk palek welagaikhe. Mezbah andi amboloba re afuni Israel mene nen he Tuhan endawimo agaiyekhogo iluk warogo nolhu mene inom, Tuhan nen fanotninobagauwageluk warogo wogetu mene inom, nolhukwa.

³² Andemen he, it afuni Israel mene a'nogo ineil werek kwelek at Yosua nen he Tuhan Awene melalek buku Musa nen palek mene a'nogo helep oba lisu palfesikhe.

³³ Afuni Israel mene mondogat inom, it inogogwi melalinafu mene inom, sikhe fisogo mene inogogwi kaindek inom, hakim wene katokhogo palhu mene inom, nen ap pok it inanggelekwe werek mene inom, peti Tuhan nen Wene Warek a'nogo fena-fena mendek logolik inelokhe re, it ap imam Lewi inap peti Wene Warek a'nogo harek logolik werek fikhit mendek welagaukwa. Afuni fena omanogo re inelokhe Tom Gerizim fikhit logolik mendek welagaukwa, nen fenakwe re inambol Tom Ebal fikhit hilingfesukwasik welagaukwa. At Musa Tuhan amingmingengge a'nogo nen afuni Israel mene yagaisikhi logolik he, ”Iren ambi Tuhan nen fanot hinobagakhi logogin iluk abok yagaisasikhe mene a'nogo faget fanot ninobagauwageluk hilingitu mene andi asi wagunem halok he, a'nogo hilingisuguno,” iluk yagaisasikhe.

³⁴ Andi nen he, at Yosua ane hokhoba buku Wene melalek andiba lisu palek mene abirengge omanogo pilingitikhe, lisu palek mene andoma re fanorinafu mene faget inom, inaiba homan fisugu mene faget inom pilingisogo yagaisasikhe.

³⁵ Musa nen wene melalogo yagaisasikhe mene omanogo re Yosua nen mondogat afuni Israel mene ap inom, hemi inom, inagainafuri magendek mene inom, nen afuni pok mene it inanggelekwe werek mene inom, andoma kabogetukwa mene omanogo inoba pilingisogo yagaisasikhe.