YOSUA 7 - Allah Wene Fano Wene Hupla Inane

At ap Akhan weak hilingitikhe wene

¹ Tuhan nen afuni Israel mene inoba komorinafi logolik yi mene ti mene o Yerikhoba nen mondogat hugul kugun mene andoma re, we misik iluk ogo ekhe wanugun lek iluk yagaisasikhe. Yagaisasikheba nen he wene melalek a'nogo tiphogo hilingitukwa lek. Ap misik ekhe enu re Akhan andi nen wene melalek andi sagalogo hilingitikheba Tuhan anini afuni Israel mene inoba fesikhe. (Hun Akhan andi eisena enure Karmi nen omba re hun Zabdi inunggulenu Yehuda meneba nen he unggulenu agaukhogo re Zerah mene welagaikhe.)

² Andem huli re, Yosua nen ap inebe fenakwe o kota misik ekhe o Betel en mo lagai wagarek fikhit o Bet-Awen horokhogo, o Ai andoma ineil penesi loageluk lakfisasikhe. Lakfisasikhemo lagaukwasik he, iren hilingisuageluk yagaisasikhe mane a'nogo mondogat hilingfuluk he,

³ inambotkwe wagaukwasik Yosua yagasi wagaukwa. Iren ikhi logolik he, ”O Ai andi re nit ninebe abirengge nen pin ku lek hak, we ap inebe dua, tiga ribu hakhogo nek lakfisogoin fano. O kota andi re we endebat hilingi'mo ap tentara mondogat lakfisa fuk.” iluk yagatukwa.

⁴ Andi isukwama re o andoma pin talogo inoasugun iluk lagaukwa mene re ap inebe tiga ribu nen lagaukwa, oba nen he it Ai inaben he it Israel mene a'nogo yei warogo inambotkwe lakfisa wagaukwa.

⁵ Ap andi inaben he it Israel mene lagaukwa mene a'nogo o kota Ai kwi lagaikharek oba kwe ambe pale'ma andoma nen muginarek he posie mene kweangma nen habuliluk hilingitarek oba andoma huli fisa lagaukwasik he, it omanogo inanggele'ma nen he ap inebe tiga puluh enam en engge tom alema andoma nen pinggi inoasi lagaukwa. Andiba re afuni Israel mene inendawinggen sebe isukwasik inailo nek agaukwa.

⁶ Yosua inom it afuni a'nogo melalinafu mene inogogwi omanogo inom inendawimo mondok weak agaukwasik he, inasu mondok tilip-talap isasukwasik, fong warogo pelagi logolik wul yalelogo inunggul oba fesukwasik, lingge hundik hup hundik he Tuhan nen Peti Wene Warek a'nogo era'lu inelokhe sagaum logolik inendawi warikhi lagaukwa.

⁷ Yosua nen Tuhan oba ikhi logolik he, ”Tuhan Allah neisena! Nenahalok nit Haren wo'ninarek i Yordan fena fikhit yoma wagagin? Afuni Amori meneba wogisagain iluk wo'ninarek wagagin a? Nit wa'lasuageluk hilingiten a, nit he i Yordan fena fikhit a'lima logoiloma nen he fano!

⁸ Tuhan neisena! ap ninaselei mene nen he Israel mene yei warogo lakfisa wagaikha. Yogondak he an nen ninggi'nogo igin?

⁹ Afuni Kanaan mene inom, afuni amu mene o kwe yoma werek mene inomen he wene hilinglaga mene andi faget inesanggo holugun. Nen iren he nit hukhogo kwelakninobagambik nit ninebe abirengge ninoasugun logou hak! A'nogo hilingirik lagunem Hat Halong Welagen mane a'nogo ninggi'nogo halong palogo fakhegen aplerek?” iluk yagatikhe.

¹⁰ A'nogo yagatikhemo Tuhan nen onggo Yosua oba ikhi logolik, ”Menlame o! Haren a'nogo kweangma helokhe sagaum logolik hilingiti lagen andi nenahalok!

¹¹ Afuni Israel mene weak hilingitama o. An nen wene melalfisikhi logolik, wene warek An inom it inom wat-wat agagu mene andi tiphogo hilingiti logouwageluk yagaisasigi, oba nen he, wene andi sagal faga! Nen yi mene ti mene wolelenggen tagalogo feino iluk igi mene omanogo iren he helaga. Helagasik weinam asinogo iluk he, it inasungge anggele'ma andoma hinagaisogo fakhaga o.

¹² Andiba re, iren inaselei mene inom weim yafu aplere hambuget haga lek andi. It andi ap inaselei mene nen warogo wulakfisa wagaikha andi re, it inebe ogore mondok leget fisoageluk wene inoba agama re, yi mene ti mene wanu fuk iluk igi mene andoma oan herakfisegep lek halok he, An hit hinom laga logogin lego.

¹³ Yosua, hat yogondak he menlame! Menlasimbik afuni Israel mene andi inebe horogo fakhambik An were'ma wesuagen he fik-fouk esuageluk yagaisano. An nebe Afuni Israel mene ineisena Tuhan Allah a'nogo nen igi mene yi it yagaisano: ’Yago, hit afuni Israel mene yi! Yi mene ti mene hiren lilibukhogo legerasubagaigeluk An nen melalhinobagagi mene omanogo hit hinelu logoligenat he, fisogo welagep andi. Hit hinangge yi mene ti mene helegep mene andoma hugisigi'lek halok he, it hinaselei mene inelokhoma re, hambukhogo fangesu elo'lek logogun,’ iluk yagaisagain enggere, hobit iren fik-foukhogo hilingisuageluk komotfisano.

¹⁴ Andi faget he, Yosua ao, o hobit hubet he it inebe inunggulenu lombok kwelagisogoin. Nen, An nen it inunggulenu lombok misik mene ekhe wagu halok inoba hilingfugunem enek agu halok he, it inunggulenu andi mene akhogo salek mene aremnogo higithogo waga logogun. Nen An nen it inunggulenu werek aremnogo misik ekhe wagu halok inoba hilingfugunem enek agu halok he, it inunggulenu aremnogoba nen ineisok erokwe hilingik aple higithogo waga logogun. Andi nen An nen it misik mene ineisok erokwe wagunem inoba hilingfugunem enek agu halok he, it ineisok erokwe misik mene andiba inebe werek mane aremnogo ap misik-misik waga logogun.

¹⁵ A'nogo hilingitunem ap inoba enek agu mene omanogo nen ogo, yi mene ti mene wanu fuk iluk igimo nen helaga mene omanogo hinago werek halok he, at ebe inom, at eisok erokwe mene mondogat inom, angge yi mene ti mene andoma mondogat inom felelenghogo endu nolinabugun, andi re aren wene warek mene a'nogo taganhogo hilingitik, nen it afuni Israel mene inanggele'ma nen kwanirek mene hilingitik ikhe andiba weak mene oba asigin,” ikhe iluk yagaisano, iluk yagatikhe.

¹⁶ A'nogo yagatikhemo, ohealek hubet-habet he, Yosua nen afuni Israel mene a'nogo inunggulenu lombok inera'lukwe asi wesuageluk yagaisasukwama nen he, it inunggulenu Yehuda mene inoba agaikhe.

¹⁷ A'nogo agaikhemo re Yosua nen it inunggulenu Yehuda mene a'nogo inunggulenu akhogo hilingik mene aremnogo higithogo menlasi wesuageluk yagaisasikhemo re, it inunggulenu agaukhogo hilingik mene Zerah a'nogo oba asi wagaikhe. Andi nen it inunggulenu akhogo Zerahba hilingik mene a'nogo ineisok erokwe lombok menlasi wesuageluk yagaisasukwama wagunemen he hun Zabdi eisok erokwe meneba asi wagaikhe.

¹⁸ A'nogo hilingi'luk he Yosua nen he it Zabdi eisok erokwe mene a'nogo ap inebe lombok inelokhoma menlasi wesuageluk yagaisasikhemo re menlasi wagunemen he, Akhan hun Karmi amlogo Zabdi omba a'nogoba agaikhe.

¹⁹ A'nogo oba agaikhemo Yosua nen hun Akhan oba ikhi logolik he, ”Namlogo, haren hilingiten mene andoma afuni Israel mene ineisena Tuhan Allah eilhanem fage'luk selekhogo nek ya nen in. Ekhe sebelhi'lek fakhogoat an yaganom o.” iluk yagatikhe.

²⁰ Andi isikhemo Akhan nen he, ”Eberogo, an nen it afuni Israel mene ineisena Tuhan Allah a'nogoba weak hilingiti o. An nen hilingiti mene ebe re yi:

²¹ Yi mene ti mene niren teli kogo mene omanogo anggele'ma nen he su jubah misik mondok fano mene o Babylonia mene nen itukwa mene ekhe higi, andi nen perak he dua kilogram hak inom, nen emas eil misik setengah kilogram hak inom higi. A'nogo higirik he, nendawinggen ninggemo re, an nen wanhirik he, nawi sabumo kweang a'ma andoma hinakfigi. Nen no perak he mondok fem a'ma hakhogo figimo werego.” iluk isikhe.

²² Andi isikhemo re, Yosua nen weak-weak ap o hun Akhan awi sabumo lakfisasikhemo lagaukwasik hilingitunemen he, yi mene ti mene wanu fuk iluk isikhe mene omanogo re abirengge andoma welagaikhe, ebe kweangma hinagoma re perak enek he mondok fem a'ma sebelogo fesikhemo welagaikhe.

²³ Were'ma re iren yi mene ti mene omanogo Yosua inom afuni Israel mene mondogat inom inambit waluk wagaukwa. Waluk wagaukwama re, yi mene ti mene omanogo Tuhan elokhoma fesukwa.

²⁴ Andi nen Yosua inom afuni Israel mene mondogat inomen he hun Akhan a'nogo inom amlogomi mondogat inom, anggo sapi, keledai, domba inom awi sabu inom, yi mene ti mene aren fisogo welagaikhe mene perak, jubah, emas hinatikhe mene omanogo inom, abirengge seberogo woginarek he, o Enggin-fenggin Tonggoma u hak, o enu Akhor andoma fisa lagaukwa.

²⁵ Fisa lagaukwasik he, Yosua nen hun Akhan oba ikhi logolik he, ”Nenahalok haren nit mondogat ninoba enggin-fenggin andi hilingiten? Yogondak Tuhan en hat weaget habigin!” iluk yagatikhe. A'nogo yagatikhemo re afuni Israel mene mondogaren he hun Akhan ebe inom at eisok erokwe mene inom omanogo helep huk pinggi inoatukwa. Nen angge yi mene ti mene mondogat inom, nen ekhe mene-ekhe mene hinatikhe mene omanogo inom endumo mondogat nolhukwa.

²⁶ A'nogo hilingitukwasik obuluk oba aremnogo iren helep hokho-pokhorogo kabokhogo wurogo fesukwama re yogondak huli nen andoma werek. Andiba re obalik andem faget enu re, Enggin-fenggin Tonggoma iluk salhukwa. A'nogo hilingitukwama re Tuhan anini a'nogo lombuk isikhe.