YOSUA 6 - Allah Wene Fano Wene Hupla Inane

O kota Yerikho leget pa'leget meisalogo kwisukwa wene

¹ O kota Yerikho leget pa'leget wurik mene kwe ambe palekwe nen afuni Israel mene ku elo'lek asuagaluk kagalek mondok logolik, kwe mondok ti'mik-te'mekhogo yagati lagaukwa. A'nogo hilingiti logolik he, afuni ekhe o kota andi nen wulhik-kwigik ugun mondok lek, iluk wene palhukwa.

² A'nogo hilingitu kwelek, At Tuhan nen Yosua yi'nogo yagatikhe: ”Yogondak An nen afuni o kota Yerikho mene mondogat inom, inawi wurik andi inom, inoe kain enupogot inom, at agoromi kabelek tentara inailo'lek mene mondogat inom, hat henggiba figi o.

³ Andi nen he, hat hebe inom, hagoromi tentara inailo lek mene inom, hinebe higithogo erat fuluk hinenggi falfaligen logolik hinenggi misik sambul he misigam walinget hikhi logoino o.

⁴ Walinget hikhi logolik, it ap imam 7 nen mene inebe lombok inambinggong ane hokho mene anet hilik attak lagunem he, An nen Peti Wene Warogo wokhinafigi iluk hilingik a'nogo inombo'ne waluk laga logouwago. Nen, hinenggi 6 en wela'luk he ekhe 7 mene andiba re, hat hebe inom, hagoromi tentara inailo lek mene inom, it ap imam andi inambinggong anet hilik lagunem hinomat o kota andi hinenggi 7 nen walinget hano.

⁵ A'nogo walinget hikhi logolik, hobuk he, it ap imam andi nen inambinggong ane palfigi'lek hundik ugu mondok logouwak. A'nogo ugu mondok were'ma ane hinesanggo holhep halok he, it hinagoromi tentara omanogo mondogat inane ami'mit unggunggu ane hak subuago. A'nogo ugunem he, leget pa'leget wurik mene andi mondogat erabisak meisak langguk igin o. A'nogo hilinglagunem he, hit hinebe mondogat hinelokhe tukhum o kota andi kwi lano o,” iluk yagatikhe.

⁶ A'nogo yagatikhemo, at Yosua nen he, ap imam omanogo wolisasikhemo wagaukwama re, mel yagaisasikhe: ”Hiren Peti Wene Warogo Allah nen wo'ninafikhe, iluk hilingik a'nogo waluk lagu kwelek, ap hit mene ekhe hinebe 7 nen hinambinggong ane hokho mene a'nogo helaluk he, attak kwe wanino o,” iluk yagaisasikhe.

⁷ A'nogo yagaisasikhesik he, agoromi tentara omanogo higithogo erathigik, o kota Yerikho haningisogo walinget hikhi logolik, ap tentara mene esa ekhe sikhe sige waluk attak kwe wanhunem he, Peti Wene Warogo Allah nen wo'ninafe mene a'nogo, inombo'ne waluk loageluk yagaisasikhe.

^8-9 At Yosua nen, yi'nogo hilingi'no iluk yagaisasikhe higithogo, it ap tentara attak esa foli lagaukwa mene inogogwi melalinafu mene inom tak sikhe sige waluk kwe wanhukwama, inombo'ne re, it ap imam inambinggong lombok anethilik lagaukwama, it inombo'ne re, Peti Wene Warogo Allah nen wo'ninafikhe, iluk hilingik a'nogo waluk lagunem he it ineyaga re tentara inambotma lagaukwa. A'nogo laga logolik he, inambinggong anethilik mondok lagaukwa.

¹⁰ A'nogo louwogeluk ugunem, at Yosua nen he, it ap tentara omanogo mondogat inoba yi'nogo yagaisasikhe: ”Hinane ami'mit sup igik, hinane nguluk igik, ekhe ugun mondok lego. We, an nen, hinane a'mit subini, igi halok enek he, subino o,” iluk yagaisasikhe.

¹¹ A'nogo yagaisasikhesik, it ap tentara omanogo inomen peti Allah nen wene warogo wo'ninafikhe, iluk hilingik a'nogo waluk o kota andi inenggi misigam enek walinget hasukwasik inambotkwe o su mene wuri'mo nogo i wagaukwa.

^12-13 A'nogo nogo isukwasik, ohealek hubet he at Yosua siakhogo eluk agaikhesik it ap imam inom, ap tentara omanogo inom, attak eratukwa higithogo hilingfesukwasik kota walinget hasukwa hakhogo walinget ha lagaukwaat. A'nogo walinget hikhi logolik, it ap tentara omanogo kwe wanhukwama re, it inombo'ne re it ap imam inambinggong lombok anethilik lagaukwama, it inombo'ne re, it ap imam Peti Wene Warogo Allah nen wo'ninafikhe iluk hilingik a'nogo waluk lagunem, it inombo'ne fem hobuk he, ap kagalek mene tentara inambotma lagaukwa. A'nogo laga logolik he, trompet ane futhilik lagukwa.

¹⁴ Attak-attak a'nogo hilingitukwasik hobuk inenggi pirenek meneba re o kota andi misigam maset hasukwasik he, inambotkwe inawi sabu wuri'mo lagaukwa. Nen inenggi 6 hari welagaukwa andem oba inenggi misik oba re misigamat maset hikhi lagaukwa.

¹⁵ Linggene sabit meneba re, it inebe hubet mo oan liabi wagu kwelek ineluk agaukwasik inenggi 7 ba o kota a'nogo inebe logalek werek aremnogo higithogo maset hasukwa. Nen linggene sabit mene andiba nek he o kota a'nogo inenggi 7 nen maset hasukwa.

¹⁶ Inenggi 6 en maset hasukwasik, hobuk ekhe 7 ba maset houwogoluk, it ap imam en inambinggong ane hokho mene a'nogo anethugunem he, at Yosua nen he, afuni omanogo mondogat inane ami'mit sup uagaluk yagaisikhi logolik mel yagaisasikhe: ”Nineisena Tuhan nen o kota yi nit ninenggiba arat fikhe o.

¹⁷ Andi nen he, o kota Yerikho mondogat weagetfikhi logolik inebe inom, yi mene ti mene mondogat inom he, Allah faget fisa hak mondok legetfisano o. A'nogo meneat he, he Rahap yanani nikherek mene a'nogo nek he, aren ap niren ineil penesuageluk lakfisogo mene hinakfisikhe a'nogo nen he, at ebe inom, eisena agaisa inom, oe agot inom, inom enek he, ineluk herakfisano o.

¹⁸ A'nogo meneat he, it ekhe mondogat legetfisikhi logolik, yi mene ti mene mondok legetfisogoin mene andi, hugulengge ekhe wanhubo. Hiren ekhe wanugun halok, Allah nen nit afuni Israel mene ninawi su mene wuri'mo yoma homan ninobagambik ninawi elokhonggen weaget fagain o.

¹⁹ Andi nen, o mondok legetfisikhi logolik, we, yi mene ti mene perak mene inom, emas mene inom, tembaga mene inom, posie mene inom, mondogat andi nek he, nineisena Tuhan faget fisambik he, yi mene ti mene At mene welagarek oba omanogo feino o,” iluk yagaisasikhe.

²⁰ A'nogo yagaisasikhemo, it ap Allah eisewerek mene nen inambinggong anethasukwa. A'nogo anethugunem ap Israel mene pinggong ane inesanggo holhukwasik he, inane ami'mit hokhorogo sup ugunem he, o kota Yerikho leget pa'leget wurik mene a'nogo mondok meisa'lambukhogo pisikhe. A'nogo hilinglagunem he, ap tentara Israel mene inebe mondogat inelokhe tukhum o kota a'nogo arat sebeli kwisukwa.

²¹ A'nogo sebelhi logolik, afuni inebe mondogat alage mene inom, yamanugwi mene inom, ap lek, hemi lek, o kota andoma welagaukwa mene inebe karok oba mondok inoatukwa. A'nogo inoati logolik inanggo sapi, domba, keledai inom watukwaat.

²² A'nogo inoati logolik, at Yosua nen ap inebe pire attak ineil penesi wagaukwa mene aremnogo inoba yaisikhi logolikhe: ”Hiren, he yanani nilik nikherek mene a'nogo aiba kwimbik he, ebe inom, afuni oe agot at mene mondogat inom, hiren wene warisegep higithogoat woginarek wulibi we'no o,” iluk yagaisasikhe.

²³ A'nogo yagaisasikhemo, it ap inebe pire aremnogo kwisukwasik he, at he Rahab ebe inom, eisena agaisa inom, at oe agot inom welagaukwa mene ekhe inom, inamingmingengge inom, inebe mondogat woginarek wulibi wagaukwasik, afuni Israel mene o su mene wutukwaba horokhogo inebe inoasu le'ma fanoma andoma fisasukwa.

²⁴ A'nogo hilingitukwama nen, hobuk it ap tentara Israel mene nen o kota andoma inom, yi mene ti mene elonggoma welagaikhe mene inom, mondogat felelenghogo endu fesukwa. A'nogo endu fikhi logolik, yi mene ti mene emas mene inom, perak mene inom, tembaga mene inom, posie mene inom, endu nolhi'lek fesukwasik waluk wagaukwasik he, yi mene ti mene Tuhan faget fisagarek oba omanogo fei wagaukwa.

²⁵ A'nogo inoatukwa meneat he, he Rahab yanani nilik nikhi lagaikhe mene a'nogo ebe inom, afuni oe agot at mene mondogat inom, inom enek he, at Yosua nen ap inebe pire inayonggo fuluk, ineil wani wesuageluk o Yerikho lakfisa wagaikhe mene hinakfisasikhe andi nen he, ineluk telogo fisasukwa. (A'nogo fisasukwama, huli yogondagen afuni he Rahab en tagongge mene it afuni Israel were'ma welagaikharek.)

²⁶ A'nogo hilingitukwa andi sambul, at Yosua nen ane huli palhikhe: ”Sa nen o kota Yerikho yi ambotkwe obulu'mo wusigiluk walhikhe halok he, nineisena Tuhan nen homan oba fagain o. Andi nen he, sa nen o tik wasigin halok he, amlogo manggusa mene pelak fagain o. Nen, sa nen leget pa'leget ambe palekwe kwe sou andi ambotkwe obulu'mo hilingisigin halok he, amlogo elabo mene pelakfagain o,” iluk wene palogo fesikhe.

²⁷ At Yosua nineisena Tuhan nen serogo mondok were'ma, abok fano mondok o yi awi ti awi laga lagaikhe.