YOSUA 5 - Allah Wene Fano Wene Hupla Inane

¹ A'nogo hilinglagaikhemo, afuni nen he, ”Tuhan Allah againafuri Israel mene i palogo wulibi wesuageluk, i Yordan firitokhogo hilingfesikhemo, wulibi wagaikha o,” iluk ugunem afuni Amori mene inogogwi kaindek i Yordan aik yiba mo ubukhogo kwikherek higit welagaukwa mene inom, ap kaindek afuni Kanaan mene inogogwi i Laut Tengah era'lukwe welagaukwa mene mondogat inom, inesanggo holhukwasik he, afuni Israel mene inaleigen inailo agaukwasik, inoagelekwe lei'leik isikhe.

O Gilgal logolik inagap inenggalimo mene palinafukwa wene

² Andi sambul he Tuhan nen Yosua mel yagatikhe: ”Ap Israel mene inagap inenggalimo mene palinabubagaigen he, weim helebenggen pilibuk meneba enggat magaisogo hilingi'no o,” iluk yagatikhe.

³ A'nogo yagatikhemo, at Yosua nen Tuhan nen yagatikhe higithogoat weim helebenggen pilibuk mene enggat magaisogo fesukwa mene omanogoba ap Israel mene inagap inenggalimo mene palinafikhesik he, o andoma enu, ’Punu ninagap ninenggalimo mene palninafukwaba,’ u hak Bukit Sunat, iluk salhukwa.

^4-6 Afuni Israel mene o Mesir en wulibi waga logolik he, ap mondogat he, inagap inenggalimo mene palek logolik wulibi wagaukwa. A'nogo meneat he, it o leimo afuni le'ma andoma o su mene ya wutik ta wutik 40 tahun waga logolik, inagainafuri taginafukwa mene andoma nek he abengge halok inagap inenggalimo mene ekhe palinafi'lek. Nen, it tentara kwagarek umur higit mene o Mesir en wulibi wagaukwa mene, Tuhan ane hologo hilingitukwa lek andi nen he, inebe wa'larik waga lagaukwasik 40 tahun arat hilinglagaikhemo inebe arat felelenghogo wa'lagaukwa. At nineisena Tuhan nen ane hombuk yi'nogo fesikhe higithogoat he, o kweang muli fanoma yi mene ti mene hokhorogo were'ma andoma hit wokhisagain, iluk hit hinombalak wene warisasigiba andoma hit hineilenggen hogoin mondok lek, iluk hombuk palogo yagaisasikhe higithogo inebe wa'lagaukwa andi.

⁷ It inagainafuri ap mene hobuk ta'larik wagaukwa mene mondogat inagap inenggalimo mene a'nogo palinafi'lek andi nen he, it hobuk ta'lagaukwa mene andi, at Yosua nen inagap inenggalimo mene palinafikhe andi.

⁸ A'nogo arat palinafikhemo, inebe kwe wulifi'lek o su mene wuri'mo andoma mondok welagaukwasigen, inoumo arat agambut agaikhemo nen kwe wulifukwa.

⁹ Andem sambul he, Tuhan nen at Yosua wene ekhe mel yagatikhe: ”Hit afuni o Mesir mene nen inamingmingengge higit fethinarek were'ma re, hinenggali aga lagagip mene a'nogo yogondak arat legetfigi o,” iluk yagatikhe andi nen, o andoma enu Gilgal salhukwama huli yogondagen ugu mondok werek.

¹⁰ O Gilgal kweang tonggwe liok layokse'ma o Yerikho horokhogo andoma it afuni Israel mene o su mene wutfilik, elama faget logolik tugi andiba tanggal 14 oba hu'mokwe Allah nen telninafikhe iluk andi faget ebetikhi logolik seni Paskah nasukwa.

¹¹ Nasukwasik ohealekwe re, afuni Israel mene yi mene ti mene o Kanaan yago mene enggen enduk inonggot mene, gandum enggen endu enggen oba werago mene inom, roti fisuageluk enggen pelafi'lek mene werago mene inom, o Kanaan yago mene attak-attagat nasukwa andi.

¹² Andi sambul he, sumburu manna pogoroba nen pi waga lagaikhe huli andi huli nen ninggi'lek kamo isukwasik yi mene ti mene o Kanaan kweang oba awi yago mene ninggi lagaukwa andi.

Yosua inom, ap ekhe karok waluk mene inomen hilingitukwa wene

¹³ Inenggi ekhe sambul at Yosua o Yerikho horokhogo andoma logolik, ap ekhe karok lisogo waluk ka nen heat elokhoma menlagaikhesik mendek were'ma eilenggen hasikhe. A'nogo hasikhesik, oba horokhogo lagaikhesik he yi'nogo yagatikhe: ”Hat he, hebe nit werekwe mene a? At he, selei mene a,” iluk heinok wokhasikhemo, aren he,

¹⁴ ”An hit werekwe mene legat, nen, hinaselei mene legaro. An he, we, Tuhan agot panglima, tentara inoeat wagi o,” iluk yagatikhe. A'nogo yagatikhemo, esanggo holhikhesik he, weak-weagat eindep awi yagaisogo fogoratikhesik, mel yagatikhe: ”An nebe re noe hat hamingmingengge mene o. Halok he, an nen hat faget ninggi'nogo hilingisik?” iluk yagatikhe.

¹⁵ A'nogo yagatikhemo, Tuhan agot panglima, tentara mene inoe a'nogo nen he, ”Kweang hat hebe mendek welagen oba arem he, Allah onggwarek anggweang andi nen he, hat heisok sepatu yelik mene ari nonggologo fein o,” iluk yagatikhemo, at Yosua eisok sepatu yelik welagaikhe mene a'nogo nonggologo fesikhe.