YOSUA 24 - Allah Wene Fano Wene Hupla Inane

Yosua o Sikhem en afuni Israel mene wene yagaisasikhe wene

¹ At Yosua nen afuni Israel mene mondogat o Sikhem andogorogo fisasikhesik, inogogwi inaluendek inom, kaindek inom, ap wene inoba figik, kotik, agarek mene inom, ap tentara mene inogogwi kaindek inom, wesuagaluk yagaisasikhemo, Allah oba wagaukwa.

² Wagaukwama, at Yosua nen it mondogat mel yagaisasikhe: ”Nit afuni Israel mene nineisena Tuhan nen ikhe mene andi, hit hinesanggo fanorogo holino o. At nineisena Allah nen he mel yagahisikhe: Attagat hit hinombalak welagaukwa andem oba re, it inebe o i Efrat aik eliba andoma logolik, hunogoat mene faget, Nineisena ebe yiaro, iluk oba himbirik logolik fogerati lagaukwa. It ap andoma mene ekhe re, Abraham agot Nahor emberek ineisena enu Terah andi.

³ A'nogo were'ma, an nen hit hinomba Abraham a'nogo, o i Efrat aik elikwe andoma nen wanhigi andi. Wanhigisik he, o Kanaan yi awi ti awi mondogat eil kogolik wesuagaluk yagatigi andi. Nen, aren tagongge mondok hokhorogo wogisilik lagagi andi, attak Ishak he, Abraham wogotigi.

⁴ Nen, hobuk Ishak againafuri inebe pire, ekhe re, Yakub, nen, ekhe re, Esau, Ishak wogotigi andi. A'nogo wogotigisik, at Esau o Edom andoma eise logouwagaluk wogotigi. A'nogo meneat he, at Yakub hinomba andi nek he, againafuri inom o Mesir andoma lagaukwa andi.

⁵ A'nogo lagaukwasik oba nen, hobuk An nen afuni Mesir mene wene hokho mene inoba fuluk, hit o Mesir en wokhinarek wulibi wesigiluk Musa Harun emberek inayonggo figirik hinoba lakfisa wagagi andi.

⁶ Hit hinombalak o Mesir en a'nogo woginarek wulibi wagunem, afuni Mesir mene nen weim yafarek mene inangge kereta wam kuda nen lisogo waluk lagarek mene inom, ap tentara inanggo kuda oba lagaluk yafarek mene inom, inomen muginarek wagaukwa andi. A'nogo muginarek wagaukwama, hinombalak andi, i laut enu Yobin yenggelek oba andoma asi wagaukwasigen,

⁷ Telninabin o, neisena, iluk inane hokhorogo yaganetukwa. A'nogo yaganetukwama, An nen he, it honggolek, it ap Mesir mene honggolek, tulem andoma o mum hilingisogo fesigisik, ap Mesir mene inebe i laut yenggele'ma sebelinafigimo inebe mondogat i lagaukwa andi. An nen ap Mesir mene hilinginafigi andi, mondogat hit hineilenggen hasigibo. Nen, hit o leimo afuni le'ma andoma ekhe inom hogoat welagagip andi.

⁸ A'nogo were'ma, An nen wokhinarek afuni inunggulenu Amori mene inaiba i Yordan aik eliba, o mo liabi wagarek higit wagagi. A'nogo wokhinarek wagunem it ap Amori mene nen hit hinoasuogoluk isukwa mene re, An nen he, hiren it mabenet fisobagaigen iluk hinenggiba fisasigi andi. A'nogo fisasigimo, hiren it inaiba sebeli wagu kwelek, An nen inebe mondok legetfisasigi.

⁹ A'nogo legetfisasigimo, ap kain Zipor amlogo afuni Moab mene inoe enupogot enu Balak en hit hinoasigiluk isikheat. A'nogo isikhesik, agoromi inayonggo fesikhesik he, ap Beor amlogo Bileam en hit homan hinobagauwagaluk ayonggo lakfisasikhe andi.

¹⁰ A'nogo meneat he, An nen Bileam endawimo anggasikhe mene hilingitigi le'ma re, aren hit fano hilinghinabuagaluk An kino yaganetikhe andi. A'nogo yaganetikhemo, Balak en hit hinoasinogo iluk An nen telhinafigi andi.

¹¹ Andi nen he, hobuk hit i Yordan palogo wulibi wagagipsik, o Yerikho arat wagagip. A'nogo wagagipsik oba nen, it ap Yerikho mene nen hinoasuogoluk isukwaat. Nen, ap Amori, Feris, Kanaan mene nen inom, Het, Girgasi, Hewi, Yebus mene nen inom, hinoasuogoluk isukwaat andi. A'nogo isukwa meneat he, An nen he, hiren it mondogat mabenet fisobagaigen iluk, inebe hinenggiba fisasigi.

¹² A'nogo fisasigimo, hiren it inoasuogoluk lagunem he, An nen it inobabut nonghonget fisigik, inailo asuagaluk hilinginafik isigimo, afuni Amori mene inogogwi raja inebe pire andi hinoba nen heise lagaukwa andi. Hit hinenggarok inom, hinasikhe inom, werek andi nen hinomame agagip fuk. Lego.

¹³ O An nen wokhisasigimo yoma hiren set kwil-kwalhogo nen helasigip lego. Nen, o kota-kota An nen wokhisasigiba andoma hit hinenggi nen ekhe wutigip legaro. A'nogo meneat he, o andoma hit logolik, anggur inom, e zaitun inom, awi hiren yati'lek meneat he, enggen palogo fano ninggi lagep andi, iluk ikhe,” iluk yagaissikhe.

¹⁴ A'nogo yagaisasikhesik, at Yosua nen wene ekhe mel yagaisasikhe: ”Nineisena Tuhan nen a'nogo yaganisasikhe andi. Halok he, yogondak hiren he, at agaukhogo hilingiti logoino o. At amingmingengge a'luk, hinendawinggen misigat logolik, oba lombokhogo mondok logoino o. Ninombalak o Mesopotamia inom, Mesir inom, logolik hunogo mene faget, Nineisena ebe andiat, iluk oba himpirik logolik fogerati lagaukwa andi hangge, andi mene ekhe fogerati'lek, we, nineisena Tuhan amunek amingmingengge a'luk logoino o.

¹⁵ Hiren nineisena Tuhan amunek amingmingengge logogun hinabit halok, o yogondagat, Nit ti mene amingmingengge hilinglasugun, iluk tekhogo ugun o. Hiren he, o attagat ninombalak o Mesopotamia logolik, hunogo mene faget, Nineisena ebe andiat, iluk oba himbirik logolik amingmingengge welagaukwa andi mene amingmingengge logogun ugun a? At he, hit yogondak afuni inunggulenu Amori mene inaiba logolik, iren, Nineisena ebe andiat, iluk oba himbirik logolik amingmingengge welagaikharek andi mene amingmingengge logogun ugun a. Hirenat senggerogo ini o. An enek he, nebe inom, nagainafuri inom, nineisena Tuhan amuat amingmingengge logogun o,” iluk yagaisasikhe.

¹⁶ A'nogo yagaisasikhemo, it afuni Israel mene nen he, mel yagatukwa: ”Niren he, hunogo mene faget, Nineisena andiat, iluk oba himbirik logolik amingmingengge hilinglasuogeluk, nineisena Tuhan kofologo herakfisaluk wulibugun mondok lego.

¹⁷ Nit ninebe inom, ninombalak inom, afuni Mesir mene nen inamingmingengge higit fetninarek were'ma, nineisena Tuhan Allah nen telninafikhe andi. Telninafikhesik he, ebe nen wo'ninarek afuni inungulenu hunogoat mene inailokwe nen waga logolik, nit futfouwagaluk elalin mene hilingitunem nineilenggen arat hikhi lagaguat.

¹⁸ Nen, hobuk nit o yoma kwi wagunem, Tuhan nen it afuni inunggulenu Amori mene yoma welagaukwa mene mondogat mugusogo wulakfisasikhe andi. Halok he, nit nineisena Tuhan Allah Ebe At amuat andi nen he, nit At amingmingengge logogun o,” iluk yagatukwa.

^19-20 A'nogo isukwama, at Yosua nen he mel yagaisasikhe: ”A'nogo meneat he, Nineisena Tuhan Allah ebe horek logolik, Ami-amuat welagarek andi nen he, hiren At obaget enek hilingitu aple hilingisu elo'lek hak anggegeba? At Allah re, afuni at amingmingengge logolik, hunogoat mene amingmingengge hilinglasugun abit mondok welagarek. Hiren At kofologo herakfisaluk allah hunogoat mene ekhe amingmingengge hilinglasugun halok, Aren hit weak hilingisugun mene andi sagalogo legetfisagain mondok lego. At Allah attagat he, hit fano hilinghinafi lagaikhe meneat he, hit a'nogo hilingiti logogun halok, At ebe hit hinaselei mene hangge asimbik he, wene hinoba fuluk, hinebe mondok leget hinabigin o,” iluk yagaisasikhe.

²¹ A'nogo yagaisasikhemo, it afuni Israel mene nen he, mel isukwa: ”A'nogo hilingisugun lego. Nit hunogo mene ekhe amingmingengge hilinglagi'lek, we, At nineisena Tuhan Allah amuat amingmingengge logogun o,” iluk yagatukwa.

²² A'nogo isukwama, at Yosua nen he, mel yagaisasikhe: ”Hiren he, nit hunogo mene ekhe amingmingengge hilinglagi'lek, we, nineisena Tuhan amunek amingmingengge logogun, iluk egep halok, hinoggwarek hinelurogo logogun andi,” iluk yagaisasikhe. A'nogo yagaisasikhemo, iren he, mel yagatukwa: ”Nen. Eberogoat. Nit ninonggwaregat ninelu logogun o,” iluk yagatukwa.

²³ A'nogo yagatukwama, at Yosua nen he, mel yagaisasikhe: ”Halok he, hiren hunogoat mene afuni inunggulenu amu mene nen, Nineisena ebe andiat, iluk oba himbirik logolik fogeratarek mene hit fisogo welagep andi wulakfisano o. A'nogo wulakfisambik, hiren he, hinen-dawinggen nit afuni Israel mene nineisena Tuhan Allah oba himbiret fuluk oba lombokhogo logoino o,” iluk yagaisasikhe.

²⁴ A'nogo yagaisasikhemo, iren he, Yosua mel yagatukwa: ”Nit he, afuni Israel mene nineisena Tuhan Allah amuat amingmingengge logolik, Aren, yi'nogo hilingiti logoino, ti'nogo hilingiti logoino, iluk yaganisasikhe mene andiat hologo higithogo hilingiti logogun o,” iluk yagatukwa.

²⁵ A'nogo isukwasik, o andi sambul at Yosua ebe inom, afuni Israel mene inom, o Sikhem andoma logolik, ”Yi'nogo hilingiti logouwok,” iluk wene amusu palogo isukwasik, at Yosua nen, wene Allah nen, ”Yi'nogo hilingiti logoino, ti'nogo hilingiti logoino,” iluk komotninafikhe wene inom, nen it afuni Israel mene wene palek oba louksek were'ma hilingiti logogun mene inom, wene ebe palek mene wogisasikhe.

²⁶ A'nogo isikhesik, wene Allah nen, Yi'nogo hilingiti logoino, iluk komotninafikhe wene andi inom, wene palek oba louksek hilingiti logogun mene andi inom, mondogat wene Allah nen komotninafikhe wene a'nogoba lisu palogo fasikhe. A'nogo fesikhesik, helep hokho mene ekhe wanhikhesik, kweang ya nineisena Tuhan onggwarek anggweang logouwak, iluk fisasukwaba andoma e ekhe hokho mene were'ma eroma andoma menegeisogo fesikhe.

²⁷ A'nogo fesikhesik, afuni omanogo mondogat mel yagaisasikhe: ”Nineisena Tuhan Allah nen, Yi'nogo hilingiti logoino, ti'nogo hilingiti logoino, iluk yaganisasikhe mene andi mondogat it afuni nen inesanggo holiluk inelu logou hak, helep yi were'ma yagahisigimo elu andi nen he, afuni nen inelu logolik yagahisa hak, at helep yi nen, Hiren hineisena Tuhan Allah hinom weim palek logogun lek, iluk hinendawimo ebet hisikhi logouwago,” iluk yagaisasikhe.

²⁸ A'nogo yagaisasikhesik, afuni omanogo mondogat inailokwe lombok puguluagaluk yagaisasikhemo, it omanogo inambotkwe inailokwe lombok lagaukwa.

Yosua inom, Eleazar inom, inebe wa'lagaukwa wene

²⁹ Hobuk, at Nun amlogo Yosua nineisena Tuhan amingmingengge a'nogo ebe umur 110 tahun welagaikhesigen wa'lagaikhe.

³⁰ A'nogo wa'lagaikhemo, at ebe warek he, onggwarek anggweangma o enu Timnat-Serah o afuni inunggulenu Efrayim mene inaiba tom oba, punu ebe enu Gaas nen abel i elesikwe higit andoma salhukwa.

³¹ At Yosua ebe eluk oba, it afuni Israel mene nineisena Tuhan amingmingengge welagaukwa. A'nogo welagaukwasik, at ebe wa'lagaikhesik oba nen ogo re, ap Israel mene inogogwi ekhe nineisena Tuhan nen it Israel mene inebe mondogat faget futfouwagaluk elalin mene hilingiti lagaikhe mene andi inelu mene inom werek kwelek, inebe nineisena Tuhan Allah amingmingenggeat mondok welagaukwa.

³² Nen, at Yusuf ebe warek it afuni Israel mene nen o Mesir en waluk wagaukwa a'nogo re, o enu Sikhem, kweang andi at Yusuf en ap enu Sikhem eisena enu Hemor andi, againafuri inoba uang perak 100 meneba onggo palhikheba andoma salhukwa. Kweang andi it afuni Yusuf en tagongge mene wogisasukwama eise agaukwa.

³³ Nen, hobuk at Harun amlogo enu Eleazar ebe wa'lagaikheat. Wa'lagaikhemo o kota enu Gibea, o afuni inunggulenu Efraim mene inaiba tom oba andoma salhukwa. o kota andi, ap Eleazar amlogo Pinehas wogetukwa meneba andoma salhukwa andi.