YOSUA 23 - Allah Wene Fano Wene Hupla Inane

Yosua nen it inale'ma fisageluk logolik komorinafikhe wene

¹ Lingge aninurogo omanogo Tuhan afuni Israel mene ineisena a'nogo nen fano liokhogo ferinarek were'ma re, inaselei mene nen ekhe weagerinafi'legengge werek kwelek enek welagaukwa. Andem sambul he Yosua ebe arat yaman agaikhe.

² A'nogo hilinglagaikhesik he at Yosua nen afuni Israel mene mondogat inom, it inogogwi kaindek inom, it melalinaferek mene inom, inawene katukhogo pilingitarek mene inom, ap sikhe fisogo mene inogogwi perwira inom, wolinafikhesik ikhi logolik mel isikhe, ”An yogondak he mondogat yaman agi o.

³ Hit hinalisikhogo hineisena Tuhan Allah nen yi ekhe mene ti ekhe mene afuni inunggulenu mondogat yomaba hilingfisasikhe mene hiren mondogat hikhi lagep. Hit hinobaget hilingite mene re At hineisena Tuhan Allah amu nenat hilingite o.

⁴ Kweang it ap yi inunggulenu ti inunggulenu werekwe andoma ogo, nen kweang it ap inunggulenu an nen inomame leget fisasigi kwe andoma ogore, kweang ebe mo lagai wagarek fikhit he i Yordan ima nen hiling-hiling mo ubuk ikherek fikhit he i Laut Tengah a'nogoba tiagan sek andi. Mondogat andoma re hit hinanggweang asimbik eiserogo logobagaigeluk an nen sumburogo wokhisasigi a'nogo.

⁵ Hiren ambi afuni inunggulenu andi mene hinom weim yabi logoin halok he, At Tuhan Allah hit hineisena a'nogo nen wene warek hit hinoba yagahisikhe hakhogo re, afuni andoma wirigi warogo liak inabugun, nen hiren it inoarik logoin halok he it inebe hit faget inailo nen heise logoin o.

⁶ Andi halok he, hiren Buku Wene melalek Musa nen a'nogoba palek werek higithogo nek futfuluk hilingiti logobagaigen he kagal fakhambik logoino. Wene melalek werek mene andi misik iluk ogo ekhe taganhogo hilingisu fuk.

⁷ A'nogo hilingiti logogun oba re, hiren ap inunggulenu hit hinanggelek kwe werek mene oma hinom, nanggelek hanggelek hilinglasugun lek. Hiren he it afuni andoma inanggembu dewa enu ikhi logogun legat, athe andi enu ba hombuk palhi logogun legat. Ekhe kembu ekhe alek mene andomaba hiren hinelokhe sagaum fogeratik, obaget hilingitik, ikhi logogun mondok legaro.

⁸ Hiren o attagaren At obaget hilingiti lagep mene a'nogo re, yogondak huli nen ogo hinaberali agi'lek hineisena Tuhan oba tiphogo nek hilingitu mondok logogun.

⁹ Afuni inunggulenu inomame hokhoat mene omanogo re, At Tuhan nen hit faget mugusogo wulak fisasikhe, it mene andoma nen ap misigen ogo hit hinom weim yabugun mene ekhe werek lego.

¹⁰ Hit hineisena Tuhan Allah a'nogo nen wene yagahisikhe mene higithogo re, Aren hit hinobaget weim yafunem he ap hit hinanggele'ma nen he ap mondok hokho-pokhorogo mabenet fisikhi logogun o.

¹¹ Arigini'more, hit hineisena Tuhan Allahba henendawi hundik hilingitu mene faget eberek mondok lagoino.

¹² Nen, hiren At oba tiphogo hilingiti'legengge ap inunggulenu hit hinanggelek kwe welagaikharek mene hinom agaum fagaumhogo hilingitik, nen hiren it hinom wok-wok agik, hilingiti logogun halok he,

¹³ hit hineisena Tuhan Allah nen he afuni inunggulenu andi mene hit hinobaget mugusogo wulaginabigin lek enggere fanorogo wenggel hano. Andiba nen agaumhogo re it andi re hit hinom weak asu hak logogun, iren he hit hinoba re sapna lego mene inom, hele websek mene inom, hangge hilingik logogun. Nen hit hinoba enggin-fenggin weakhogo logouwageluk hilinghinobagakhi logogun. It andi re hit hinambotkwe lambisogengge hinoatu mene hak welagik, nen hineilenggenma kuluk fenggek malok ugu mene hak welagik ikhi logogun. Hit hinebe enggin-fenggin hikhi logolik he, hiren misik iluk ogo ekhe o kweang obalik mondok fanoma hit hineisena Tuhan Allah nen wokhisasikheba yi ekhe logogun lego.

¹⁴ Yogondak he, an nebe wa'lasigin oba arat horok agi yi o. Nen hit hineisena Tuhan Allah nen he mondok fano mene wokhisagain iluk wene wathisikhe mene a'nogo mondogat wokhisikhe mene andi re, hit hinebe lombogen hinelurek. Aren wene wathisikhe mene andoma mondogat he tibet fikhe, we misik iluk ogo ekhe taganet fikhe mondok lek.

¹⁵ Oba nen he Aren wene wathisikhe mene omanogo mondogat hit hinoba tiphogo nek hilingite hakhogore, Aren he hit hinebe ogo hinoasigin iluk ikhe mene andi re ibi-eberogo nenat hinoasigin o.

¹⁶ Hineisena Tuhan Allah nen wene melalek hiren hologo hilingiti logouwageluk yagahisikhe mene a'nogo sagalogo fuluk, hiren ambi tugwi kembu amu meneba obaget hilingisi lagik, kembu andoma apne wanhik, hilingisugun halok he, Tuhan anini hinoba fembik wene hinoba fagain o. Linggene misik oba nek hit hinebe mondogat o kweang fanoma hineisena Tuhan nen hit wokhisikheba oma nen legethinobagagin o,” iluk yagaisasikhe.