YOSUA 20 - Allah Wene Fano Wene Hupla Inane

O kota wesa awi inagap telagarek oba fesukwa mene a'nogo

¹ A'nogo hilingitukwasik Tuhan nen Yosua mimingiti logolik he,

² Wene yi'nogo afuni Israel mene inoba yagaisan, ”An nen Musa yagati logolik he, o kota inagap telhuba logogin mene faget hit yagahisoageluk yagatigi. Kota andem ebe re afuni nen inagap telek logouwageluk heise o andoma hina'lasi laga logogun. Yogondak he kota andem heragaisogo feni.

³ Ap ekhe wenggelek le'ma nen ap amu mene ekhe ebe pinggi watfuluk halok he, aben unggulmo wasugun iluk ina'mage lagaikherek mene andiba wasuogeluk ugunem at a'nogo heise o andoma kwi laga logogin halok, ap a'nogo agap telogo fakhikhi logogin.

⁴ Aren he o kota andem misik ekheba heise kwi laga logogin halok he fano, nen aren o kota ebekhalem kwi lagaikharek oba nen wene heirogo tegetharek oba andoma laluk he, aren ap inogogwi melalinafarek mene andoma inoba wene hilinglagu mene a'nogo faget tindelogo yagaisikhi logogin. Yagaisugunem it ap melalinafu mene omanogo nen he at ebe o kota a'nogoba kwi loageluk yagasimbik he ebe werek oba faget obalik yagasugun.

⁵ Nen ap unggulmo wasigin iluk murok lagain mene a'nogo ambi, murok laga logombik andem huli asi logoin halok he, afuni o kota andi werek mene nen he ap andi it inenggimo fogoin lek. Ap andi nen ap amu mene andi re a'makwe heren wasigin lek, we wenggelek le'ma nen wasumo re iren ap andi agap telugun.

⁶ At a'nogo re o kota andiba nek werek kwelek enek he, at awene a'nogo ap hokhorogo inelokhoma nen katokhogo palhi logogun, nen ap Imam Agung andem oba yabu hilingiti logogin mene a'nogo ebe arat wa'lasigin. A'nogo hilinglagunem enek he, ap a'nogo aiba eroma omanogo ambotkwe loageluk yagaisikhi logoino,” iluk yagatikhe.

⁷ Andi isikhemo re o kweang i Yordan ima barat fikhit andoma re o kota inagap telagarek oba logogin mene iluk, it afuni Israel mene nen fouget fesukwa mene re yi: o Kades, o Galilea Naftali mene inandom oba omanogo inom, Sikhem it Efraim mene inandom oba omanogo inom, Hebron Yehuda mene inandom oba omanogo fesukwa.

⁸ O i Yordan fena mo liabi wagarek fikhit kweang amik legoma ilingage leimo o Yerikho fena fikhit omanogo nen iren o kota inagap telagarek oba iluk he ya fesukwa: O kota Bezer wilayah Ruben mene omanogo inom, kota Ramot Gilead en wilayah Gad mene nen omanogo inom, o kota Golan o Basan nen wilayah Manasye meneba omanogoba inom enogo fesikhe.

⁹ O andoma re, inagap telagarek oba it afuni Israel mene faget inom, nen it ap pok mene inaggele'ma werek mene faget inom enogo fesukwa. Ap inebe lombogen wenggele'le'ma nen ap amu mene ebe pinggi watfisaluk halok he, ap iren ogo ap unggulmo wasugun iluk murok wagaikharek mene omanogo re o andomaba nen agap telikhi logogin. Nen at ebe afuni hokhorogo ineilhanem en awene palhi'lek werek kwelek he ebe pinggi wati logogun mondok lek.