YOSUA 18 - Allah Wene Fano Wene Hupla Inane

Kweang Tuhan nen wene warisasikheba a'nogo tindel agaikhe mene sumburisasikhe wene

¹ O kweang Tuhan nen abok wogisasikheba a'nogo mondogat sebeli lagaukwasik he, it afuni Israel mene a'nogo inebe mondogat o Silo kabogetukwasik, O Sabu Tuhan ebe waga logogin oba wutukwa.

² Ap Israel mene a'nogo inunggulenu sabiren mene re kweang oan heligi'lek were'ma,

³ At Yosua nen it afuni Israel mene yagaisikhi logolik, ”Yago, hit o kweang hineisugwi ineisena Tuhan Allah nen hit wokhisikheba omanogo laluk eiserogo welagi'legengge welagep oma re ki huli nen hela kugun?

⁴ Hit hinunggulenu lombogen ap inebe henagan mene wenaginabini o. Wenaginabumo re, an nen kweang it helogoin kwe andoma huli-huli lisu pali loagen iluk miminginabumo, iren pali lambik he an nambit inambotkwe wesuguno.

⁵ Kweang andi re kuthigik huli sabiren hilingfeino. Nen at Yehuda re arogo tukhogo wilayah abel a'ma selatan fikhit logogin, nen Yusuf he wilayah at ebikhit mene abel ambolkwe utara fikhit logogin.

⁶ Kweang huli sabiren warek andem ilirenggerogo fuluk an wo'nesu mo re, At Allah nen hit hinobaget ninggi'nogo enegenggerogo fikhe andi an nen ninelu asuageluk he helep enggen oba walhogo kwelakhagain o.

⁷ We it inunggulenu Lewi mene nek he kweang hit hinom andoma it mene faget helogoin lek, andi re it hela hak he it inebe imam logolik Tuhan obaget hilingiti logogun andi. Nen it inunggulenu Gad mene, Ruben mene inom nen Manasye mene fena minggilogo inom faget he, it mene re kweang i Yordan fena mo liabi wagarek fikhit andoma helasukwa. At Musa Tuhan amingmingengge a'nogo nen it mondogat inoba sumburogo wogisasikhe,” iluk yagaisasikhe.

⁸ A'nogo isukwama re, at Yosua nen wene yi'nogo hilingi'no, ti'nogo hilingi'no iluk yi'nogo melalogo yagaisasikhe, ”Hit hinebe kweang ari walinget fei lambik huli-hulikwe a'nogo ilirengge walet higik fuluk he, lagokhogo an were'ma nambit wesugun. A'nogo hilingisumo re, o Silo yoma nen he Tuhan en hit hinobaget ninggi'nogo enekhogo fikhe iluk an nelu asigin o,” iluk yagaisasikhe. A'nogo Yosua nen yagaisasikhemo holhukwasik he, iren kweang a'nogo ineil halik lagaukwa.

⁹ Lagaukwasik. kweang a'nogo mondogat it a'nogo nen kweang siok sabiren aremnogo inom, nen o kota-kota elonggoma werek mene omanogo inom lisu palogo fesukwa. A'nogo hilingitukwasik he, it a'nogo hobuk inambotkwe Yosua were'ma o Silo sabu sale'ma omanogo wagaukwa.

¹⁰ A'nogo hilingitukwama re, at Yosua nen he Tuhan nen it faget ninggi'nogo enekhogo fikhe iluk helebenggen walhasikhesik kweang it afuni inunggulenu Israel mene helasukwa lek mene omanogo kuthigik sumburisasikhe.

Kweang inunggulenu Benyamin mene faget wogisasikhe mene re yi

¹¹ Attak-attak he it inunggulenu Benyamin mene ineisok erokwe omanogo faget sumburisasikhe. Kweang it agaukwa mene andoma re inunggulenu Yehuda mene nen hilingi'luk Yusuf ambisangma nen hilingi'luk tulem andoma wogisasikhe.

¹² Abel ambolkwe utara fikhit huli-huli re i Yordan ima nen erora'luk he, liabek o Yerikho ambolkwe utara fikhit alokwe andoma, nen mo ubuk ikherek fikhit he tom unggulkwe nen he o Bet-Awen ilingage lei soganogo andoma huli.

¹³ Huli-huli fesukwa mene andi re laga lagasik o Lus (o Betel iluk agarek oba) andoma nen abel a'ma selatan fikhit pelabek he o Atarot-Adar tom oba nen a'ma selatan fikhit o Bet-Horon-Hilir huli andomaba.

¹⁴ Tom andi abel barat fikhit andoma re, kweang andi huli warek mene haningisogo selatan fikhit he o Kiryat-Baal (Kiryat-Yearim) iluk agarek oba. O Kiryat-Yearim andi re it inunggulenu Yehuda mene inanggweangma. Mo ubuk ikherek fikhiren kweang hulirek mene huli-huli re andiba.

¹⁵ Huli-huli abel a'ma selatan fikhit he, o Kiryat-Yearim oba erora'luk, hiling-hiling he i Me-Noftoah elesi wuliferek oba andoma huli,

¹⁶ andem en pelabek he tom eroma andoma nen o Hinom tonggoma inom elokhe wutse'ma andoma nen o Refaim Tonggwe ambisangma nen utara fikhit andoma. Andi nen hiling-hiling huli warek andi pelabek andi abel a'ma selatan fikhit he o Hinom Tonggo kwe nen he o Yebus kweang oba tom-tom alokwe nen eil a'ma selatan fikhiren hiling-hiling he o En-Rogel oba andoma,

¹⁷ eil ambol kwe utara fikhit he haningisogo o En-Semes nen he o Gelilot oba o Adumim lagaikharek oba nen fena fikhit andoma huli. Andi nen he huli warek mene a'nogo pelabek he Helep Bohan oba andoma (Bohan andi re hun Ruben amlogo a'nogo enu),

¹⁸ andi nen he, tom o Yordan Tonggoma inom wutsek oba aremnogo nen eil ambolkwe utara fikhiren pelabek he, Tonggwe andiba hilingik,

¹⁹ o Bet-Hogla horokhogo tomkwe abel utara fikhiren he wurep kobokhogo re i Laut Mati ambolkwe utara fikhit i Yordan ambut kwelabi lagarek oba andoma huliba hilingik. Abel a'ma selatan fikhit huli-huli hilingik mene re andi.

²⁰ Abel mo lagai wagarek fikhit huli-huli re i Yordan andi huli hilingik. Huli-huli a'nogo it inunggulenu Benyamin meneba ineisok erokwe hilingik mene omanogo it mene asuageluk sumburisasikhe.

^21-24 It inunggulenu Benyamin meneba nen ineisok erokwe omanogo nen inawi kota-kota inom o sili endep-endebengge era'lukwe maserogo werek mene omanogo inom seberogo re nesanggo nen welagaukwa. It inaiba andem he: Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni, Geba inom.

^25-28 Andi nen ekhe ombo'ne o kota-kota inom, o sili 14 nen era'lukwe maserogo welagaukwa mene inom. seberogo inenu re: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (andi re Yerusalem agarek mene a'nogo) Gibea, Kiryat-Yearim inom. Andi re kweang it inunggulenu Benyamin meneba nen ineisok erokwe mene asuageluk sumburisasukwa mene re andem.