YOSUA 15 - Allah Wene Fano Wene Hupla Inane

It inunggulenu Yehuda mene faget o kweang enggi tum watfesikhe kwe a'nogo

¹ It inunggulenu Yehuda meneba nen ineisok erokwe lombok kweang it mene helasukwa kwe huli-huli re yi'nogo: O kweang andi mene malikwe selatan fikhit he o Edom en pelabek o Zin wurepma lei obalik mondok langse'ma andoma huli,

² i Laut Mati a'nogo wurepma selatan fikhiren he,

³ hiling-hiling malikwe selatan fikhit o Akrabim eilkwe nen he o Zin huli andoma. Andi nen he, o Kades-Barnea nen malikwe selatan fikhiren he hiling-hiling o Hezron kwe nen he, liabek o Adar oba nen he haningisogo re o Karka fikhit andoma wogisasikhe.

⁴ Andemen hiling-hiling o Azmon oba nen he i aganhan mene o Mesir huli hulimo andi som en he, wurep kopokhogo re i Laut Tengah huli andoma. O it inunggulenu Yehuda mene inobaget abel malikwe selatan fikhit huli-huli re a'nogo hilingik welagaikhe andi. Nen a'nogo hilingik welagaikhe mene andi re, it afuni Israel mene inanggweang oba nen abel malikwe selatan fikhit andoma huli-huli re andiba fesukwa.

⁵ Mo lagai wagarek fikhit huli-huli re, Laut Mati ba nen hiling-hiling liabek he abel ambolkwe utara fikhit i Yordan ambut kwelabi wagarek oba andoma. Abel ambolkwe utara fikhit huli-huli re, i Yordan ambut kwelabi wagarek mene a'nogoba nen erora'luk

⁶ liabek he o Bet-Holga nen he hiling-hiling o Yordan Tonggoma huli-hulimo andoma. Andoma nen he ambolkwe utara fikhit huli-huli re liabek he Helep Bohan were'ma andomaba, (Bohan andi re hun Ruben amlogo),

⁷ andi nen o Fenggin-Fenggin Tonggoma omanogo nen he o Debir huliba. Andoma nen haningisogo utara fikhit he o Gilgal higithogo tom eil o Adumim alilu nen elokhe pelak-pelak fanggong andiba nen eil a'ma selatan fikhit andomaba. Andemen hiling-hiling i En-Semes elesi wulifunemen he, o En-Rogel huliba fesikhe,

⁸ andi nen o Hinom Tonggo kwe nen liabek he punu were'ma nen abel malikwe selatan fikhit andem o Yerusalem afuni Yebus mene inawi kota andomaba. Andemen he, huli-huli hilingik mene re lisogo tom ebe ungguloba nen o Hinom Tonggoma nen mo ubuk ikherek fikhit huli nen he Refaim tonggoma ambolkwe fem wurepma utara fikhit andoma huli,

⁹ andi nen hiling-hiling i Me-Neftoah elesi wilibi'lagoba nen he Tom Efron o kota-kota werek mene horokhogo andoma huli. Andemen haningisogo o Baala, (o andi enu ekhe re Kiryat-Yearim) ikhi lagaukwa mene andi huliba andoma

¹⁰ nen o Baala nen mo ubuk ikherek fikhit andoma maserogo re o Edom kwe nen tom-tom fikhit andoma, andi nen Tom Yearim oba abel ambolkwe utara fikhit andoma, tom andi re Tom Kelason a'nogo, nen pelabek he o Bet-Semes oba nen he hiling-hiling he o Timna oba.

¹¹ O Timna nen he, huli-huli hilingik mene andi re Tom Ekron oba abel ambolkwe utara fikhit andomaba hilingik, andoma nen haningisogo o Sikron fikhit he, Tom Baala soganogo andoma nen he o Yabneel nen wurep kobokhogo re i Laut Tengah ba hilingik,

¹² nen it inunggulenu Yehuda mene andi inaiba wilayah mo ubuk ikherek fikhit huli warek welagaikhe. O wilayah andoma re it inunggulenu Yehuda mene ineisok erokwe mene omanogo nek welagaukwa.

Hun Kaleb en o Hebron inom Debir inom telogo helasikhe wene

¹³ Tuhan nen wene melalogo Yosua yagatikhe mene higithogo re, it Yehuda mene inaiba o sili omanogo fena re at Kaleb hun Yefune amlogo unggulenu Yehuda mene a'nogoba wogetikhe. Nen ekhe re o Hebron kota hun Arba ap Enak eisena nen mene a'nogo wogetikhe.

¹⁴ At Enak andi ambisangma mene re ap Sesai inap inom, Ahiman inap inom, Talmai inap inom welagaukwa mene, at Kaleb en he it ap andoma mondogat o Hebron nen mugusogo wulak fisasikhe.

¹⁵ Andemen aren he ap o Debir werek mene inoasi lagaikhe, o kota andi attak he o Kiryat-Sefer iluk inelu welagaukwa.

¹⁶ At Kaleb en ikhi logolik he, ”Ap sa nen o Kiryat-Sefer andi telogo wanigin halok he ap andi nen an na'logo hele Akhsa ari wogosigin o,” iluk isikhe.

¹⁷ At Kaleb andi agailak he Kenas, amlogo Otniel en kota a'nogo telogo helasikhemo re, Kaleb a'logo Akhsa a'nogo re Otniel wogetikhe.

¹⁸ Linggene it lambulinafukwa sambul andi re, at Otniel en hele Akhsa oba re, hat heisena nen kweang huli misik ekhe wo'nisoagen he, kino yagaomo, iluk mimingitikhemo re, hele Akhsa a'nogo no keledai oba nen pisikhemo re, Kaleb en he, nenamene hamolo nen wagen, iluk heinok wokhasikhe.

¹⁹ Andi isikhemo at Akhsa nen onggo ikhi logolik he, ”Neisena, haren kweang wo'neten mene aremnogo re mondok iringik weak hilingi'mo re, haren i elesi wilibi'lago kwe andoma we huli miren hakhogo ekhe wo'ne'nogen iluk wagi o,” isikhe. Andi isikhemo re, at Kaleb en he, i elesi fikhit inom nen i ambut fikhit inomat wogetikhe.

It Yehuda mene inawi kota a'nogo

²⁰ Ombo'ne yi re kweang it inunggulenu Yehuda meneba nen ineisok erokwe mene omanogo inanggweang asuageluk wogisasikhe kwe re yi.

^21-32 O Kota-kota abel a'ma selatan fikhit ma'lima nen Yehuda mene eise agaukwa mene re, o Edom en huli-hulimo werek mene andoma mondogat o sili 29 nen, andi re era'lukwe desa-desa esanggokwe welagaukwa mene inom. kota-kota andem ebe re: Kabzeel, Eder, Yagur, Kiana, Dimona, Adada, Kedes, Hazor, Yitnan, Zif, Telem, Bealot, Hazor-Hadata, Keriot-Hezron (andi re Hazor iluk), Amam, Sema, Moloda, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Kesil, Horma, Ziklag, Madmana, Sansana, Lebaot, Silhim, Ain, Rimon inom andem wogisasikhe.

^33-36 O sili Kota-kota inom, desa-desa tom a'makwe welagaukwa mene andoma mondogat lambulogo re 14 nen welagaukwa. O andem enu re: Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera, Gederotaim inom andem.

^37-41 Kota ekhe 16 nen ambolkwe yi re o sili desa-desa esanggokwe welagaukwa mene ebere: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Kabon, Lahmas, Kitlis, Gederot, Bet-Dagon, Naama, Makeda inom andem.

^42-44 Andi nen kota 9 nen ombo'ne yi re o sili desa-desa welagaikhe mene inom enu re: Libna, Eter, Asan, Yiftah, Asna, Nezib, Kehila, Akhzib, Maresa inom andem.

⁴⁵ Andi nen o Ekron ebe inom kota-kota endepkwe mene inom, o sili endep-endepkwe inom,

⁴⁶ o Asdod horok-korokwe kota-kota andoma inom, desa-desa werek mene mondogat inom, o Asdod nen i Laut Tengah a'nogo huli andoma werek mene mondogat inom wogisasikhe.

⁴⁷ Andi higithogo re Asdod inom, Gaza inom o kota-kota inom, o sili endep-endepkwe sagarogo werek mene inom, o Mesir kweang oba nen i lagarekwe andoma inom andoma nen pikhit i Laut Tengah hokho mene esanggokwe andoma mondogat inom wogisasikhe.

^48-51 O tomkwe andoma re o kota 11 nen inom, o sili endep-endepkwe mene inom lambulogo welagaikhe mene enu re: O Samir, Yatir, Sokho, Dana, Kiryat-Sana (andi re Debir iluk), Anab, Estemoa, Anim, Gosyen, Holon, Gilo inom andem.

^52-54 Andi nen ekhe kota 9 nen ombo'ne yi inom he o sili-sili omanogo inom seberogo re: O Arab, Duma, Esan, Yanum, Bet-Tapuah, Afeka, Humta, Kiryat-Arba (andi re Hebron faget), Zior inom.

^55-57 Andi nen kota 10 nen yi re, o sili era'lukwe maserogo werek mene inom andem enu re: O Maon, Karmel, Zif, Yuta, Yizreel, Yokdeam, Zanoah, Kain, Gibea, Timna inom.

^58-59 Andi nen ekhe kota 6 nen yi re, o sili era'lukwe maserogo werek mene omanogo inom seberogo re: Halhul, Bet-Zur, Gedor, Maarat, Bet-Anot, Eltekon inom.

⁶⁰ Andi nen ekhe kota pire ombo'ne arem ogore, o sili endep mene era'lukwe walingisogo werek mene inom enu re: O kota Kiryat-Baal (andi re o Kiryat-Yearim iluk) inom he o kota Raba inom.

^61-62 O leikwe andoma re o kota 6 en welagaikhe mene o sili endep mene era'lukwe werek mene inom seberogo re: O Bet-Araba, Midin, Sekhakha, Nibsan, o kota Mayu inom he En-Gedi inom.

⁶³ Kota Yerusalem andi ogo re it Yehuda nen meneba nen he. it Yehuda inap en he ap Yebus inap o andoma welagaukwa mene mugusogo wulak fisasukwa lek. Yogondak huli nen he it Yebus inap andoma re it Yehuda mene inom seberogo o kota andiba werek.