YOSUA 13 - Allah Wene Fano Wene Hupla Inane

O fena telhukwa lekwe a'nogo

¹ A'nogo hilingitukwasigen he, at Yosua ebe arat yaman agaikhe. Tuhan nen Yosua oba ikhi logolik he, ”Yosua! Hat hebere mondogat yaman agen, oba nen he o kota fena telugun kwe mene re hokho-pokhorogo werek andi:

² Wilayah it Filistin inaben mene inom, it Gesur inaben mene inom mondogat andoma,

³ nen o wilayah it Awi inaben eil a'ma selatan fikhit werek mene andoma inom. (O i Sikhor ima nen o Mesir inom huli-hulimo andoma nen he, o Ekron huli-hulimo eil ambolkwe utara fikhit andoma huli, o mondogat andoma re it ap inunggulenu Kanaan mene inom, en it raja-raja Filistin mene andoma re o Gaza, Asdod, Askelon, Gat, Ekron inom oba andoma werek.)

⁴ Andi nen o ekhe teli kugun oba re: O Kanaan andoma abirengge inom, o Meara (it inunggulenu Sidon mene) andoma inomen he huli-huli re o Afek it inunggulenu Amori mene inaiba inom huli-hulimo andoma inom,

⁵ andi nen he o it inunggulenu Gebal mene were'ma inom, o Libanon kwe nen mo lagai wagarek fikhit andoma mondogat inom, o Baal-Gad Tom Hermon nen eil a'ma selatan fikhit andoma nen he, hiling-hiling ebekwe o Hamat lagaikharek huliba andoma.

⁶ Ekhe it ap Sidon mene inaiba andoma inom, nen it o tomkwe werek mene tom-tom o Libanon nen hilingi'luk, tom Misrefot-Maim en hilingi'luk tulemkwe andoma inom he mondogat oan telhi'lek” iluk yagatikhe. Tuhan nen ane ekhe inom yagati logolik he, ”It inunggulenu mondogat andoma re An nen it namlogomi Israel mene weim yabi kugun sambul hobuk mugusogo wulak fisagain,” iluk yagatikhesik ekhe yagati logolik he, ”Kweang andi re An nen hat yagahetigi higithogo, haren it afuni Israel mene inanggweang asuageluk sumburisagaino.

⁷ Ma re, kweang andi re yogondak haren it ap inunggulenu Israel mene elonggoma inunggulenu 9 nen werek aremnogoba sumburisigik. nen it ap inunggulenu Manasye mene fena minggilogo aremnogo inoba sumburisigik ino o. A'nogo hilingisumo kweang andoma it mene asugun o,” iluk yagatikhe.

Kweang i Yordan fena mo lagai wagarek fikhit andoma sumburisasikhe wene

⁸ It inunggulenu Ruben mene inom, Gad mene inom, nen it inunggulenu Manasye mene fena aremnogo inom he kweang a'nogo nen it mene at Musa Tuhan amingmingengge a'nogo nen i Yordan fena mo lagai wagarek fikhit omanogo wogisasikhemo helasukwa.

⁹ Nen wilayah it mene agaikhe kwere o Aroer (i Arnon Tonggoma nen esanggo fikhit), o kota tonggo andi tulem andoma werek mene inom. Andi nen tonggo legoma andoma mondogat o Medeba nen he o Dibon huli,

¹⁰ nen o afuni Amon mene inawi huliba andoma. Andi nen he kota hun Sihon raja Amori awi Hesybon mene a'nogo a'ma welagaikhe mene andoma inom.

¹¹ Nen o Gilead, Gesur, Maakha maserogo andoma inom, Tom Hermon oba andoma mondogat inom, o Basan kwe nen he Salkha huliba andoma wogisasikhe.

¹² Nen it inawi ogore. at raja Og ap Refaim mene wurep kobokhogo re aren o Asyterot inom, Edrei inom, ferinarek logolik wene melalinafi lagaikhe agun andi a'ma welagaukwa mene andoma inom welagaikhe. Ma re, at Musa nen afuni inunggulenu andoma mene re mondok inomame leget fisasikhesik, it inaiba andoma nen mugusogo wulakfisasikhe.

¹³ Oba nen he, it afuni o Gesur mene inom, Maakha inom he, it Israel mene nen mugusogo wulakfisasukwa lek, it inebe afuni Israel mene werek oba andoma inomat welagaikharek.

¹⁴ It inunggulenu Lewi mene re kweang at Musa nen sumburogo it mene iluk wogisasikhe le'ma re, it ekhe helasukwa lek. Andi re Tuhan nen Musaba yagati logolik, ’It ap Lewi mene re yi mene ti mene warogo Allah it Israel mene ineisena a'nogo faget mezbah oba nolhi logogun inap he it andi logogun,’ iluk isikhe andi nen.

Kweang it inunggulenu Ruben mene wogisasikhe mene a'nogo.

¹⁵ Kweang Tuhan nen abok it afuni Israel mene inoba yagaisasikhe mene omanogo re at Musa nen he it inunggulenu Ruben meneba nen ineisok erokwe mene lombok omanogo it inanggweang mene asuageluk wogisasikhe.

¹⁶ Wilayah iren mene re o Aroer (i Arnon Tonggoma nen esanggokwe andoma inom) nen kota tonggo andi tulem andoma welagaukwa mene inom, nen o Medeba horokhogo kweang lego welagaikhekwe andoma huliba,

¹⁷ andi nen o Hesybon inom nen o kota tonggo legokwe welagaikhe mene mondogat andoma re: O Dibon, Bamot-Baal, Bet-Baal-Meon,

¹⁸ Yahas, Kedemot, Mefaat,

¹⁹ Kiryataim, Sibma, Zeret-Hasahar tonggo andiba nen punu ambolkwe welagaukwa mene andi inom,

²⁰ o Bet-Peor inom, Tom Pisga amik andoma inom, o Bet-Yesimot inom.

²¹ Andi nen he o kota tonggo legoma andoma inom at raja Sihon afuni inunggulenu Basyan mene omame werek logolik sebelek welagaikhe kwe andoma attak he o Hesybon welagaikhe. At inom it ap o Midian inap inomame welagaukwa mene inebe re: Ewi, Rekem, Zur, Hur, Reba inom ogore at Musa nen inomame leget fisasikhe. Ap inomame welagaukwa mene inebe mondogat andem he at raja Sihon obaget o kweang andiba ferinarek logolik welagaukwa inap.

²² Ap it inunggulenu Israel mene nen inoatukwa andoma inanggele'ma ogore at Bileam hun Beor amlogo hobuk hilinglasigin mene faget yi'nogo hilinglasigin iluk ikhi lagaikhe mene a'nogo inomat watukwa.

²³ I Yordan andi re it inunggulenu Ruben mene inaiba wilayah huli-hulimo welagaikhe. It inunggulenu Ruben mene a'nogo nen ineisok erokwe meneba it mene asuageluk wogisasukwa kwe o sili kota-kota inom, desa-desa inom he andoma.

Kweang i Yordan abel mo lagai wagarek fikhit a'nogo sumburisasikhe wene

²⁴ Kweang Tuhan nen it afuni Israel mene abok wogisasikheba a'nogo mene fenakwe re, at Musa nen it inunggulenu Gad mene ineisok erokwe omanogo inanggweang mene asuageluk wogisasikhe.

²⁵ Wilayah iren mene re o Yaezer inom o Gilead oba andoma kota mondogat inom o it inunggulenu Amon mene inaiba andoma fena minggilogo re o Aroer en eil uanhogo o Raba nen mo liabi wagarek fikhit andoma,

²⁶ o Hesybon nen he o Ramat-Mizpa nen, pikhit o Betonim huli, nen o Mahanaim en he o Lodebar huli-hulimo andoma huli, mondogat andoma re wilayah it inunggulenu Gad mene faget fesukwa,

²⁷ o Yordan Tonggoma andoma nen wilayah it inunggulenu Gad mene andi inobaget he o Bet-Haram inom, Bet-Nimra inom, Sukot inom Zafon inom. O andoma re at raja Sihon o Hesybon enu werek logolik sebelek welagaikheba andoma inom wogisasikhe. Wilayah it inunggulenu Gad mene andi inobaget o mo ubuk ikherek fikhit en i Yordan ima nen he liabek i yenggelek Danau Galilea eil ambolkwe utara fikhit andoma huli fesikhe.

²⁸ It inunggulenu Gad mene andi ineisok erokwe lombok it mene asuageluk o sili kota-kota inom, desa-desa inom wogisasikhe kwe re andem.

Kweang i Yordan fena mo wulibi wagarek fikhit omanogo it inunggulenu Manasye mene minggilogo faget enggi tum warogo wogisasikhe wene.

²⁹ Kweang Tuhan nen afuni Israel mene inoba wogisasikhe kwe omanogo nen fenakwe re at Musa nen it inunggulenu Manasye mene minggilogo aremnogo inoba it inanggweang mene asuageluk mondogat wogisasikhe.

³⁰ Wilayah it mene re o Mahanaim huli nen o Basan mondogat andoma inom, at hun Og raja Basan agun andi nen enu werek logoglik sebelek welagaikhe kwe mondogat inom, andi nen hun Yair awi sili kota endep-endep kwe 60 nen welagaikhe mene aremnogo inomat wogisasikhe.

³¹ Andi nen o Gilead ogore minggilogo wogisasikheat, o Asytarot inom, Edrei inom o kota pire andem he at raja Og logolik oba o kota hokho mene welagaikheba aremnogo. Nen kweang andem mondogat he hun Manasye amlogo Makhir a'nogo ambisangma mene ineisok erokwe aremnogo inoba minggilogo wogisasikhe.

³² A'nogo at Musa ebe o Moab tonggoma andoma logolik he, kweang i Yordan ima nen o Yerikho nen mo lagai weri'lago fikhit omanogo huli wathigik wogisasikhe.

³³ Oba nen he, it inunggulenu Lewi mene re kweang andoma mene endebat iluk ogo Musa nen ekhe wogisasikhe lek. Musa nen it inobaget ikhi logolik he, it inangge aga logogin mene re yi mene ti mene Tuhan Allah afuni Israel mene ineisena andi faget fuluk wogeti logogun mene andoma aga logogun o,” iluk isikhe.