YOSUA 12 - Allah Wene Fano Wene Hupla Inane

Yosua nen raja-raja mabenet fisasikhe wene

¹ O i Yordan fena mo wulibi wagarek fikhit, o Arnon Tonggoma andoma nen liabek he i Yordan Tonggoma nen he, eil ambolkwe utara fikhit Tom Hermon nen mondogat uanhogo a'limaba it Israel mene inaben sebela kwisukwasik, ap raja inebe pirenerat inomame leget fisasukwa.

² Ap misik ekhe enu re Sihon, raja Amori mene inoe kain logolik, o Hesybon andoma welagaikhe. O aren ferinarek welagaikhe kwe re, o Gilead andoma fena minggilogo: o Aroer (Arnon Tonggo esanggo) andoma huli nen he, tonggo andi tulemkwe o kota-kota welagaikhe kwe andoma nen hiling-hiling, i Yabok werek huli o it inunggulenu Amon mene inom huli-hulimo andomaba hilingik welagaikhe.

³ Andi nen o Yordan Tonggo mo lagai wagarek fikhit andoma inomat, nen i Galilea yenggele'ma andoma nen eila'ma selatan fikhit he o Bet-Yesimot i Laut Mati a'nogoba nen pikhit mo liabi wagarek huli andoma nen, hiling-hiling Tom Pisga a'ma andoma huliba.

⁴ Raja amu mene ekhe it Israel mene nen inomame leget fisasukwa mene re raja Og awi Basyan mene at ebe re o Asytarot inom Edrei inom andoma welagaikhe agun. At andi re ap inunggulenu Refaim mene inebe hokhondek inoagese uandek andi mene welagaikhe.

⁵ O at a'ma welagaikhe mene Tom Hermon oba nen he, Salkha inom, o Basan mondogat inom, o Gesur inom Maakha inom andoma huli welagaikhe. Andi nen o Gilead minggilogo re at raja Sihon o kota Hesybon a'ma welagaukwa mene andoma huli hilingik welagaikhe.

⁶ At Musa inom afuni Israel mene inomen, ap raja inebe pire inomame leget fisasukwa mene re andem. It raja-raja andem inanggweang he at Musa Tuhan amingmingengge a'nogo nen, it inunggulenu Ruben, Gad inomen it inunggulenu Manasye mene minggilogo fenakwe inom inoba it inanggweang mene asuageluk wogisasikhe.

Ap raja-raja Yosua nen inomame leget fisasikhe mene omanogo

⁷ Raja-raja at Yosua inom it inunggulenu Israel mene inom seberogo nen inomame leget fisasukwa mene re, it raja-raja o i Yordan fena mo ubuk ikherek fikhit welagaukwa mene mondogat. O andoma re o Baal-Gad o Libanon Tonggoma nen hiling-hiling he Tom Gundul were'ma nen eil a'ma selatan fikhit o Edom horokhogo andoma huli. Kweang andi re at Yosua nen he it inunggulenu afuni Israel mene inoba it mene asuageluk sumburisasikhe.

⁸ O wilayah andoma re tomkwe inom, o mo ubuk ikherek fikhit punu a'makwe andoma inom, Yordan Tonggoma nen punu abel fena-fena andoma inom, mo lagai wagarek fikhiren alo esi mondok lekwe andoma inom, eil a'ma selatan fikhiren leikwe andoma inom wogisasikhe. O andoma re attak ap inunggulenu Het, Amori, Kanaan, Feris, Hewi, Yebus inom welagaukwa mene inawilunkwe.

^9-24 Raja-raja inomame leget fisasikhe mene, inebe abirengge lambulogo re 31 nen. Inebe andem he raja-raja o kota-kota yiba welagaukwa mene enu re yi: O Yerikho inom, o Ai (Betel horokhogo) andi mene inom, Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hazor, Simron-Meron, Akhsaf, Taanakh, Megido, Kedes, Yokneam (o Karmel oba andoma) inom, Dor (i aik oba welagaukwa mene) inom, Goyim (o Galileaba) andoma inom o Tirza inom oba welagaukwa inap inomame leget fisasikhe.