YOSUA 11 - Allah Wene Fano Wene Hupla Inane

Yosua nen ap Yabin inom it ekhe at inom lambul lagaukwasik hilingiti lagaukwa mene inom inomame leget fisasikhe wene.

¹ At raja Yabin o Hazor mene a'nogo nen he it Israel mene inomame arik wagaukwa mene omanogo esanggo holhikhesik he, aren ap yonggo re hun Yobab raja o kota Madon mene inom, it raja-raja o kota Simron mene inom, Akhsaf mene inom,

² it raja-raja tomkwe werek mene inom, o Yordan tonggo abel a'ma selatan fikhit werek mene inom, o Galilea abel selatan fikhit werek mene inom, o tom a'makwe werek mene inom, o Dor horokhogo i aikwe werek mene inom, inoba wene warogo filik lagaikhe.

³ At raja Yabin andi ogo re it afuni Kanaan mene i Yordan fenakwe mo ero fikhit werek mene inom, mo ubuk ikherek fikhit werek mene inom inoba wene warogo lakfikhi logolik, it ekhe Amori mene, Het mene, Feris mene, Yebus mene, o tomkwe werek mene inom, nen Hewi inap tom Hermon erokwe nen o Mizpa andoma werek mene inomat inoba yonggo wulafikheat.

⁴ Yonggo a'nogo wulafikhemo re, it raja-raja omanogo inom inagoromi tentara esa hokho-pokhorogo inebe ial higit inom wagaukwa. Nen inanggo kereta lisogo waluk weim yabi lagaikharek mene ogo hokhorogo wagaukwaat.

⁵ Raja-raja andoma inebe mondogat misik sebe isukwasik it Israel mene inom weim yabuogeluk wagaukwasik he, i Merom akhogo lagarek oba omanogo logali wagaukwa.

⁶ A'nogo wagaukwama Tuhan nen Yosuaba ikhi logolik he, ”Haren it inoba hailorinabu fugo. It Israel mene inili waganogo ohealek o ya higiroba An nen inebe mondogat inoasigin. It mene inangge kuda andoma re haren eisok ombambi a'makwe tegerisilik lano, nen iren inangge kereta weim yabik lagaikharek mene omanogo re haren endu nolino,” iluk yagatikhe.

⁷ A'nogo yagatikhemo re Yosua inom agoromi tentara mondogat inom he i Merom akhogo lagarek mene horokhogo andoma ferekhogo youk la'lak inoasi kwisukwa.

⁸ Nen, Tuhan nen it Israel mene a'nogo it ap andomaba nen inomamet fisasikhe. Ap Israel inaben pin kwikhi logolik it inebe muginarek he, o Misrefot-Maim en uanhogo andoma huli nen he. o Sidon abel utara fikhit andoma nen he, o Mizpa tonggoma mo liabi wagarek fikhit yatmaat andoma huli fisa lagaukwa. Weim andi yafu werek kwelek enek he it Israel mene inaselei omanogo ineluk ekhe wulifukwa lek mondogat inoatukwa.

⁹ Yosua nen he Tuhan nen hilingi'no iluk melalfesikhe higithogo hilingitikhe. Aren he it inangge kuda omanogo eisok ombambi palfisigik, it mene kereta omanogo endu oba nolfisilik lagaikhe.

^10-11 At Yosua inom inambotkwe sugulogo laga logolik he, o Hazor andi re o it raja-raja ekhe mene nen ferinarek welagaukwa kwe andoma maben hak werek kwelek o andi nek he omame hokho welagaikhe awi a'nogo teli kwisukwa. Teli kwisukwasik o kota a'nogoba endu fatik, nen raja inom it afuni holharek mene inom inebe pinggi inoatik isukwa, misikhogo ekhe ineluk fisasukwa lek.

¹² O kota andoma mondogat at Yosua nen sebelasikhesik he, inogogwi raja-raja omanogo senfisasukwasik wene melalek Allah amingmingengge Musa a'nogoba yagatikhe mene a'nogo higithogo re pinggi inoatikhe.

¹³ Oba nen he, o kota punukwe andoma olunkwe wurik welagaikhe mene omanogo re it Israel mene nen misikhogo iluk ekhe nolhukwa lek, we at Yosua nen o Hazor andi nek nolhikhe.

¹⁴ Afuni o andoma werek mene re ineluk ekhe fisigi'lek inebe mondok pinggi inoatukwa. Oba nen he it inangge yi mene ti mene onggo hokho mene omanogo inom nen inanggo inom enek he it afuni Israel mene inangge asuogeluk helasukwa.

¹⁵ Yi wene ti wene Tuhan nen At amingmingengge Musaba yagatikhe mene omanogo mondogat he Musa nen Yosuaba fesikhemo, Yosua nen hilingirik lagaikhe. We misik iluk ogo ekhe herakfisasikhe lek.

O kweang at Yosua nen sebelik lagaikhe kwe omanogo

¹⁶ Yosua nen o telogo sebelik lagaikhe kwe re, o tomkwe inom, abel polikwe utara fikhit inom, abel malikwe selatan fikhit inom, o wilayah Gosyen abel malikwe selatan fikhit inom, lei pirimsekwe andoma inom, o Yordan tonggo inomat sebelasikhe.

^17-18 O andi unggut mondok langsek welagaikhe mene re huli o Edom horokhogo nen Pengunungan Gundul ikhi lagaukwa mene andi huliba nen abel a'makwe re selatan fikhit hilingik welagaikhe, nen abel polikwe utara fikhit he mondok uanhogo o Baal-Gad Libanon tonggoma andoma nen tom Hermon a'makwe selatan fikhit hilingik welagaikhe. At Yosua nen it ap raja-raja o andoma mene inom weim aninurogo yafi lagaukwa oba nen he, ambisangma nen he it mondogat mabenet fisasukwasik inebe pinggi inoatukwa.

¹⁹ O kota andoma mene we misik mene ogo it Israel mene inom wene ekhe watukwa lek, we it Gibeon mene o kota ap Hewi inap welagaukwaba andi inom enek wene watukwa. Nen kota mondogat andoma re weim yabi kwikhi logolik mabenet fisasukwa.

²⁰ Tuhan nen he afuni andoma it Israel mene inom weim yabuageluk inendawinggen omamet fisasikhe. Andi re wene melalogo Musa yagatikhe mene higithogo it inebe inendawirinafi'legengge mondok leget fisoageluk hilingfisasikhe.

²¹ O andem oba re at Yosua nen afuni inunggulenu Enak mene inom, Ai mene inom, inoagese yatek-patek o Hebron inom, Debir inom, Anab inom, it Israel mene inaiba inom, it Yehuda mene inaiba inom tomkwe andoma mondogat welagaukwa inap. It inebe re at Yosua nen mondogat inoatikhesik he it inawi kota inom mondok wolelenggenhogo fesikhe.

²² It inunggulenu Enak inap andi menere ap misik ekhe ogo it Israel mene were'ma andoma welagaukwa mondok lek, we inebe miren hakhogo o Gazaba inom, Gat oba inom, Asdod oba inom welagaukwa.

²³ Andi nen kweang andi mondogat at Yosua nen he Tuhan nen wene melalogo Musaba yagatikhe higithogo sebelhikhesik he aren it afuni Israel mene inanggweang asuageluk wogisasikhe. O kweang andi sumbutukwasik he, it inunggulenu lombok he misiktek higik helasukwa, it Israel inap a'nogo weim yafu aple mondogat yafukwasik he inanggweang oba omanogo inailo legengge fano liokhogo mondok welagaukwa.