YOSUA 10 - Allah Wene Fano Wene Hupla Inane

Afuni Israel mene nen afuni Amori mene inawe a'ma fisasukwa wene

¹ Afuni nen he, ”Ap Yosua nen, afuni o kota Yerikho mene inoe kain enupogot inomat mondok wulil tagalogo inoatesik, o kota Yerikho sebelhe andi hak, afuni o kota Ai mene inoe enupogot inomat mondok wulil tagalogo inoatesik inawi kota sebelhe aro,” iluk isukwama, afuni Yerusalem mene inoe kain enupogot enu Adoni-Zedek andi esanggo holhikhe. Nen ekhe re, it afuni ekhe nen he, ”Afuni o kota Gibeon mene nen he, afuni Israel mene yagaisikhi logolik, nit hit ninom fano logolik, hinanggelekwe yugunat logogun o, iluk arat wene wat-wat agama,” iluk isukwama esanggo holhikheat.

² A'nogo holhikhesik, o kota Ai endep mageat meneat he, o kota Gibeon enek he, mondok hokho, o kota yi awi ti awi ekhe inogogwi kaindek inenupogot were'ma welagaikharek hangge. Nen, ap tentara Gibeon mene inailo mondok lek logolik, weim inoba aniniweak andi nen, at ap kain Adoni-Zedek ebe inom, afuni Jerusalem welagaikharek mene inom, inailo mondok agaukwa.

³ A'nogo inailo agaukwa andi nen, at kain enupogot Adoni-Zedek en ap ekhe inayonggo fesikhesik ap kaindek inenupogot ekhe enu re Hoham awi kota Hebron mene inom, nen ekhe enu re Piream awi kota Yarmut mene inom, nen ekhe enu re Yafia awi kota Lakhis mene inom, nen ekhe enu re Debir awi kota Eglon mene inom, inoba lakfisikhi logolik yi'nogo yagaisa lano, isikhe:

⁴ ”Afuni Gibeon mene nen he, nit hit ninom fano logouwok iluk Yosua inom, afuni Israel mene inom, wene arat lambulogo sebe aga andi nen he, an ninomen inoasuogen he we'no o, ikhe iluk yagaisano,” iluk isikhe.

⁵ A'nogo yagaisasikhemo lagaukwasik yagaisasukwama re, it ap inogogwi raja inunggulenu Amori mene o Yerusalem mene inom, Hebron mene inom, Yarmut mene inom, Lakhis mene inom, Eglon mene inom misi'mo sebe isukwasigen inagoromi tentara mene mondogaren afuni o Gibeon mene o fisagaisogo inoasuogeluk wagaukwa.

⁶ A'nogo wagaukwama, afuni Gibeon mene nen at Yosua o Gilgal su mene wuri'mo were'ma yagasi loagaluk wene warogo lakfisasukwama lagaukwasik he, mel yagatukwa: ”Noe, nit ninamunek obokhogo herakninobagagun o. It ap kaindek inunggulenu Amori mene tomkwe werek mene inogogwi inenupogot mondogat inagoromi tentara inom sebe agasik he, nit ninoasuogoluk wagaikhasik werek andi nen he, weak-weagat telninabi we'no o,” iluk yagasi lagaukwa.

⁷ A'nogo yagasi lagaukwama at Yosua ebe inom, agoromi ekhe tentara inafe hebelek mene mondogat inom, weim inanini weak mene esa logalhi lagaukwa mene inom, inomat weim yabuogoluk o Gilgal en wagaukwa.

⁸ Wesuogeluk ugunem Tuhan nen Yosua mel yagatikhe: ”Hat homame a'nogen iluk, An nen arat wokhetimo andi nen he hailo agun o. It mene misigen iluk ekhe fangesigin mondok lego,” iluk yagatikhe.

⁹ A'nogo yagatikhemo, at Yosua inom, agoromi tentara esa logalek inom, o hubanggo mondok o Gilgal en o Gibeon wagaukwa. Wagaukwasik afuni Amori mene inonggothogo inobakhe palek were'ma inoba wulifukwa.

¹⁰ A'nogo wulifunem he, nineisena Tuhan nen afuni Amori mene inobabut mondok nonghonghogo hilinginafikhemo re, ineilenggen tentara Israel mene yerisasukwasik he inobakhe eintok palagaikhe. A'nogo hilinglagaikhemo, it Israel mene nen afuni inebe mondok hokhorogo o Gibeon nen inoatukwa. A'nogo inoatukwasik, fena ineluk mene re muginarek o tom Bet-Horon alema andoma pelakfisasukwasik, huli yatmaat o Azeka inom, Makeda inom, i ambutmo higit andoma mugisogo pelakfisasukwa.

¹¹ A'nogo mugisugunem, afuni Amori mene weim heise hina'lasuogeluk tom oba nen alema pugu kwelek, Tuhan nen meiso sogenggen hokho mene pogoroba nen pelakfei wagaikhemo, inoarik-inoarik huli o Azeka huli andoma fisa lagaikhe. It inebe ap Israel mene nen inoatukwa mene re we endebat hangge meneat he, meiso sogenggen nen inoatikhe mene nek he mondok hokhorogo inoatikhe.

¹² At nineisena Tuhan nen afuni Israel mene inomame asuageluk inomamerinafikhemo, afuni Amori mene inoatukwa andi sambul, at Yosua nen nineisena Tuhan oba ane isikhe, it ap Israel mene ineilhanem Yosua nen ikhi logolik he: ”Hat mo yi. Hebe afuni Gibeon mene inunggulmo higit kamo ino o. Nen, hat tugi re, o Ayalon tonggoma yoma nen lagun o,” iluk isikhe.

¹³ A'nogo isikhemo, mo a'nogo lagi'lek kamo igik, tugi lagi'lek welagik, isikhesigen, ap Israel mene nen inaselei mene mabenet fisasukwasik arat inoatukwama nen lagaikhe. Wene a'nogo hilinglagaikhe mene andi buku enu Yasar andiba lisu palogo fesukwa. O andi sambul he, o mo pogot tulem kamo isikhesik aninurogo welagaikhesigen korok isikhe.

¹⁴ At nineisena Tuhan nen afuni inendawimo inamolo mene inane hologo re, ebe afuni Israel werekwe agaikhesik weim yafunem, o inenggi misik sambul a'nogo hilingitikhe andi hangge re, o attak he a'nogo ekhe hilingitikhe lek, nen hobuk a'nogo ekhe hilinglasigin legat mene, we andi sambul hilinglagaikhe andiat.

¹⁵ Weim a'nogo arat yakfuluk at Yosua inom, agoromi tentara mene inom, inambotkwe inawi su mene wuri'mo o Gilgal lagaukwa.

Yosua nen ap Amori mene inogogwi raja fuaben aremnogo senfisasikhe wene.

¹⁶ Oba nen he, it raja Amori mene inebe fuaben aremnogo re lobonghogo wulibi lagaukwasik o Makeda oumo misik meneba andoma hinago welagaukwa.

¹⁷ It a'nogo hinago were'ma nen aben ineilenggen isasukwasik he Yosua yagasi lagaukwa.

¹⁸ Yagasi lagaukwama at Yosua nen ikhi logolik he, ”Helep hokho mene limbilogo oumo andi elema yagat fuluk he, ap kagalek mene ekhe yaga logouwageluk fisano.

¹⁹ Oba nen hit andem huli re kamo u fuk. It andi inoba nen he Tuhan nen hit hinalong werek mene hilinghinobagaikhe hilingi'mo re. it inawi kota ba andoma kwi loageluk herak fisa fuk! It muginarek he inambot fikhiren inoarik kwino,” iluk yagaisasikhe.

²⁰ Yosua inom afuni Israel mene inomen it afuni Amori mene andoma inoatukwa. Oba nen he, it fena re heise inawi kota ba omanogo lagaukwasik hina'lasi lagaukwama re inebe inoatukwa lek.

²¹ A'nogo hilingitukwasik Yosua agoromi sikhe fisogo mene omanogo re, inagap telogo o Makeda sabumo andoma ambit wagaukwa. Afuni o kweang andiba welagaukwa mene nen it afuni Israel mene inoba inane weak ekhe ikhi lagaukwa mondok lek.

²² Andi mondogat hilingitukwasik, at Yosua nen ikhi logolik he, ”Yogondak oumo helep kwe yagarek mene a'nogo hurogo ap raja inebe fuaben aremnogo woginarek wulibi we'ni,” iluk yagaisasikhe.

²³ Yagaisasikhemo oumo a'nogo huthasukwama re, it raja Yerusalem mene inom, Hebron mene inom, Yarmut mene inom, Lakhis mene inom, Eglon mene inom omanogo lirinarek wulibi wagaukwasik,

²⁴ Yosua were'ma woginarek wagaukwa. Andi nen Yosua nen afuni Israel mene abirengge wolinafikhesik, it ap sikhe fisogo mene inogogwi perwira at inom weim yabi lagaukwa mene omanogo woginarek we'luk, ap raja andoma ineisogen inalonggop pereli wesuageluk miminginafikhe. A'nogo miminginafikhemo re, it ap sikhe fisogo mene inogogwi omanogo wagaukwasik he, ap raja omanogo inalonggop pereli wagaukwa.

²⁵ A'nogo mondogat hilingfuluk Yosua nen ap perwira omanogo inoba ikhi logolik he, ”Hinendawi sebe imbik hinailo asu fugo. Tuhan nen ap hit hinaselei mene inoba a'nogo nek hilingfisikhi logogin enggere, hinailo lek hinendawi hambukhogo logoni,” iluk yagaisasikhe.

²⁶ A'nogo yagaisasikhesik, at Yosua nen ap raja aremnogo inoatikhesik he, e fuaben mendek meneba kologo fisasikhe. It inebe warek aremnogo re andem herakfisasukwama werek kwelek enek he o hu'mo agaikhe.

²⁷ O mo ubuk ugu kwelek aremnogo re, at Yosua nen miminginafikhemo ap warek omanogo waluk lagaukwasik he, oumo it raja andem attak hinago welagaukwaba aremnogo hugisa lagaukwa. A'nogo hugisasukwasik helep hokho meneba oumo a'nogo kwe kugukwe te'met fesukwama re, helep andoma o yogondak huli nen inom andem werek.

At Yosua nen afuni Amori mene inawi sili ekhe inom hokhorogo telhikhe wene

²⁸ Linggene a'nogo sambul Yosua nen he o kota Makeda a'nogo sebeli kwikhi logolik inoe raja ogo ebe pinggi watukwa. Afuni o andiba werek mene re mondogat inoatukwaat, misik iluk ogo ineluk ekhe fisasukwa lek. At Yosua nen ap raja Makeda mene andi re attak raja Yerikho mene oba hilingfesikhe a'nogo higithogo hilingfesikhe.

²⁹ A'nogo hilingfuluk at Yosua agoromi tentara omanogo inom laga lagaukwasik he, o Makeda nen he o Libna lagaukwasik, afuni o andi welagaukwa mene inoasi lagaukwa.

³⁰ Tuhan nen o andi inom. inoe raja inom, oba nen it Israel mene inomamet fisasikhe. Ap misik iluk ekhe ineluk fisasukwa lek, afuni o kota andi mene re iren raja kota Yerikho meneba mangot fisasukwa a'nogo higithogo hilingitukwa.

³¹ Andi nen Yosua inom tentara inom a'nogo o Libna nen higilogo re o Lakhis lagaukwa. Iren he o andi hobesi lagaukwasik he pin mondok kwisukwa.

³² Linggene pirenek mene weim yafunemen he, Tuhan nen afuni Israel mene inoba o Lakhis oba nen inomamet fisasikhe. Iren o Libnaba hilingfisasukwa mene andem he, o Lakhis oba ogo a'nogoat hilingfesukwa. Ap misik iluk ogo ineluk ekhe fisigi'lek mondogat inoatukwa.

³³ Hun Horam, raja Gezer mene andi it Lakhis mene leberisagain iluk wagaikhe oba nen he, Yosua nen at ebe inom at agoromi tentara inom mondogat inomame leget fisasikhe, ap misik-masikhogo iluk ekhe wulifukwa lek, mondogat inoatukwa.

³⁴ Linggene ekheba re, Yosua inom agoromi tentara omanogo inom o Lakhis nen higilogo o Eglon lagaukwasik o kota andi mene inoasi kwisukwa.

³⁵ Linggene andi sambul iren o Eglon sebeli kwisukwasik he, iren it afuni Lakhis mene inoba hilingfisasukwa higithogo it andoma mene ogo mondogat inoatukwa.

³⁶ O Eglon nen he Yosua agoromi sikhe fisogo mene inom tomkwe andoma soganogo o kota Hebron lagasukwasik,

³⁷ o kota andi telogo helasukwa. Raja o andi mene inom, afuni o andi elonggoma welagaukwa mene inom, nen o kota era'lukwe andoma welagaukwa mene inom, mondogat inoatukwa. Yosua nen o Eglon mene hilingfisasikhe higithogo, aren o andi mondogat weagerogo fisasikhe. Ap we misik iluk ogo ekhe herakfisasikhe mondok lek.

³⁸ A'nogo hilingfisaluk at Yosua inom agoromi sikhe fisogo mene omanogo inom inambotkwe waga logolik o Debir wagaukwasik,

³⁹ inawi kota inom, inoe raja inom, nen o kota amu mene era'lukwe welagaikhe mene mondogat Yosua nen telhi logolik, afuni andoma welagaukwa mene mondogat inoatukwa. At Yosua nen raja Libna mene inom, Hebron mene inom inoba hilingfisasikhe higithogoat hilingfisasikhe andi.

⁴⁰ O kweang andoma mondogat at Yosua nen sebelasikhe. Aren he it raja-raja o tomkwe welagaikharek mene inom, tonggokwe welagaikharek mene inom, mo liabi wagarek fikhit welagaikharek mene inom, tom alem mo ubuk ikherek fikhit welagaikharek mene inom, nen o lei abel a'ma selatan fikhit welagaikharek mene inom mondogat inomame legaphogo fisasikhe. A'nogo hilingfisasikhe andi re Tuhan Allah Israel mene ineisena a'nogo nen isikhe mene higithogo ineluk ekhe fisigi'lek mondogat inoatikhe.

⁴¹ Yosua nen he o Kades-Barnea eil a'ma selatan fikhit andoma nen hiling-hiling he, o Gaza i aik oba andoma huli nen pikhit o Gosyen elonggo andoma nen hiling-hiling he, o Gibeon nen eil ambolkwe utara fikhit huli andoma mondogat inomame legaphogo fisasikhe.

⁴² Afuni Israel mene ineisena Tuhan he, it inebikhit a'luk it inobaget weim yabik lagunem a'luk he, we misigam weim yabik lagu meneba re, at Yosua nen raja-raja andoma inomame legaphogo fisasikhesik o it inomame a'ma welagaukwa mene omanogo telogo helasikhe.

⁴³ A'nogo mondogat hilingfuluk he at Yosua agoromi sikhe fisogo mene omanogo inom he inambotkwe o Gilgal inawi sabu wuri'mo wagaukwa.