YOSUA 1 - Allah Wene Fano Wene Hupla Inane

Allah nen he, ”O Kanaan sebeli kwino o,” iluk Yosua yagatikhe wene

¹ Tuhan nen he, At amingmingengge Musa ebe wa'lagaikhesik oba nen, at Musa agot Yosua, ap Nun amlogo a'nogo mel yagatikhe:

² ”An namingmingengge Musa ebe arat wa'lagama re, yogondak hat inom, afuni Israel mene mondogat inom, i Yordan palogo, o An nen wokhisagain oba andoma kwi lobagaigen he, yi mene ti mene tik-tukhogo feino o.

³ An nen Musa yagatigi andi hak, o hit hineisok sebeli logoin kwe andoma mondogat hat hebe inom, nagainafuri Israel mene mondogat inom, wokhisagain o.

⁴ Hinaiba logogun oba andoma ebe re, o leimo afuni le'ma i Yordan ambut higit andoma nen pikhit i Yordan elesi higit o Libanon tomkwe huli andoma inom, nen i hokho Efrat mo yegelogo liabi wagarek higiren pikhit afuni inunggulenu Het mene inaiba nen huli i Laut Tengah mo ubukhogo kwi lagarel huli andoma mondogat logogun o.

⁵ An nen attak Musa serogo mondok welagagi andi hak, hat herakhobagagi'lek setharek mondok logogin andi nen he, afuni ekhe nen hat mabenet hobagagun mondok lego.

⁶ An nen hinombalak o wogisageluk wene warisasigiba andoma haren it woginarek o andoma sebeli kwigin andi nen he, hendawinggen hambukhogo hailo lekhogo logoino o.

⁷ Ma re, An namingmingengge Musa nen he, yi'nogo hilingi'no, ti'nogo hilingi'no, iluk yagahisasikhe mene andi mondogat ekhe sagalogo hilingiti'lek hologo hilingi'nogen he, hendawingggen hambukhogo hailo lekhogo logoino o. Wene andi mene endebat halok ekhe pelakfigi'lek, higithogo nek hilingisigin halok, haren yi mene ti mene faget hilingitunem he, higirenek hilinglaga logogin o.

⁸ Haren he, wene An Allah nen, yi'nogo hilingi'no, ti'nogo hilingi'no, iluk isigi mene lisu palek werek andi, mondogat higithogo hilingiti logoinogen iluk, wene ebe lisu palek mene andi, linggene nen hubanggo nen enu salhu mondok logoino o. A'nogo hilingiti logolik, wene lisu palek werek mene andi mondogat An nagainafuri ineilhanem enu salhu mondok logoino o. Haren a'nogo mondogat hilingiti logogin halok, hat hebe fano logolik, yi mene ti mene faget ugunem elok enek hilinglaga logogin o.

⁹ An nen he, Hat hendawinggen hambukhogo hailo lekhogo logoino iluk komothafi mene andi hendawimo eberek mondok logoino. An heisena Tuhan Allah nen, hat hebe koma lagain halok, setharek mondok logogin andi nen he, hendawinggen firik logolik hailo-hailo hilingitik, haberali agik, hilingiti logogin lego,” iluk yagatikhe.

Yosua nen afuni Israel mene inoba, ”Yi'nogo hilingi'no, ti'nogo hilingi'no,” iluk yagaisasikhe wene

^10-11 A'nogo yagatikhemo, at Yosua nen he, afuni Israel mene mondogat inawi su meneba wurikwe were'ma inogogwi kaindek lombogen yagaisilik loageluk mel yagaisasikhe: ”O ninenggi 2 hari logombik, ninenggi ekheba re i Yordan palogo nineisena Allah nen wo'nisagain oba arat sebeli kugun andi nen he, hinafe hebelasimbik yi mene ti mene tik-tukhogo feino o,” iluk yagaisilik loageluk yagaisasikhe.

¹² A'nogo yagaisasikhesik, afuni inunggulenu Ruben mene inom, Gad mene inom, inunggulenu Manasye mene ekhe inomat inoba, mel yagaisasikhe:

¹³ ”At Musa Tuhan amingmingengge a'nogo nen he, o i Yordan aik yomakwe mo yegelogo liabi wagarek higit yoma hit hinawi eise asubagaigen iluk nineisena Tuhan Allah nen wokhisagain o, iluk yagahisasikhe a'nogo hinendawimo eberek logoino o.

¹⁴ Ma re, hinagagwi hinagainafuri mondogat inom, hinanggo inom, o yoma werek kwelek he, hinagoromi tentara hit faget weim yabugun mene nek he, inagaila'lak Israel mene inunggulenu ekhe mene hobuk weim yafunem leberisouwogeluk, it tak sikhe sige waluk attak-attak i Yordan palogo wulibi loago.

¹⁵ Wulibi lambik he, iren leberisambik, o i Yordan aik elikwe o mo ubukhogo kwikherek higit nineisena Tuhan Allah nen wo'nisikheba andoma sebeli kuago. A'nogo sebeli kugunem, nineisena Tuhan nen it Israel mene inunggulenu ekhe mondogat fano liokhogo hilingisogo fisikhe halok enek he, it inambotkwe o Tuhan amingmingengge Musa nen o mo yegelogo liabi wagarek higit wogisasikheba inawi eroma yoma wesuago,” iluk yagaisasikhe.

¹⁶ A'nogo yagaisasikhemo, it ap inunggulenu Ruben mene inom, Gad mene inom, inunggulenu Manasye mene ekhe inom, omanogo nen he mel yagatukwa: ”Haren he, Yi'nogo hilingi'no, iluk yaganisegen halok he, niren hilingisugun aro. Nen, yomakwe lani, iluk yaganisegen halok he, logoin aro isukwa.

¹⁷ Niren Musa nen yaganisugunem ane hologo mondok hilingiti lago andi hak, hat hane hologo hilingiti logogun aro. Nineisena Tuhan Allah nen Musa serogo mondok welagaikhe andi hak, harogo setharek mondok logouwago.

¹⁸ Afuni ekhe haren fetninarek were'ma hawe a'ma soma imbik hane hologo hilingisu inabit mene halok, inebe mondogat inoasugun o. Ma re, hat he hendawinggen hambukhogo hailo lekhogo logoino o,” iluk yagatukwa.